ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ރޭ ޓެރަރިޒަމްގެ ހަމަލާ ދިން ކަމަށް ޝައްކުކުރެވޭ ހަތަރު މީހަކު ދެނެގަނެވިފައިވާ ކަމަށް، ކޮމިޝަނާ އޮފް ޕޮލިސް މުހައްމަދު ހަމީދު މިއަދު ވިދާޅުވެއްޖެ އެވެ.
ނަޝީދުގެ ގެކޮޅު ކައިރީގައި އެމަނިކުފާނަށް އަމާޒުކޮށް ދިން ހަމަލާއާ ގުޅިިގެން ފުލުހުން ފުރަތަމަ ބޭއްވި ނޫސްވެރިންގެ ބައްދަލުވުމުގައި ކޮމިޝަނާ އޮފް ޕޮލިސް ހަމީދު ވިދާޅުވީ ހަމަލާދިން ކަމަށް ޝައްކު ކުރެވޭ އެ ހަތަރު މީހުންނާ ގުޅޭގޮތުން ޕްރޮސެކިޔުޓާ ޖެނެރަލް، ހުސައިން ޝަމީމާ މަޝްވަރާކޮށްފައިވާ ކަމަށެވެ.
"އެ ހަތަރު މީހުންނާ މެދު ސަސްޕިޝަން އުފެދިގެން މިއުޅެނީ ކީއްވެގެންކަން ހާމަ ކުރެވޭކަށް ނެތް،" ސީޕީ ހަމީދު ވިދާޅުވި އެވެ.
ހަމީދު ވިދާޅުވި ގޮތުގައި މި ހަމަލާ ދޭން އުޅޭކަމުގެ އިންޓެލިޖެންސް މައުލޫމާތު ކުރިން ފުލުހުންނަށް ލިބިފައެއް ނުވެ އެވެ. މި ހަމަލާގެ ޒިންމާ އެއްވެސް ބަޔަކު ރަސްމީކޮށް އަދި ނަގާފައި ނުވާ ކަމަށް ފުލުހުން ބުންޏެވެ.
މި މައްސަލައިގެ ތަހުގީގަށް އެކުވެރި ގައުމުތަކުން އެހީތެރިކަން ފޯރުކޮށްދިނުމަށް ހުށަހަޅާފައިވާ ކަމަށް ވެސް ސީޕީ ވިދާޅުވި އެވެ. މިހާރު ވެސް އިނގިރޭސިވިލާތުގެ ދެ އެކްސްޕާޓުން ތަހުގީގުގައި މަސައްކަތް ކުރަމުން އަންނައިރު، އޮސްޓްރޭލިއާގެ ފެޑްރަލް ފުލުހުން މާދަމާ ރާއްޖެ އައިސް ތަހުގީގާ ގުޅޭނެ ކަމަށް ވެސް ސީޕީ ވިދާޅުވި އެވެ.
ހަމީދު ވިދާޅުވީ ރައީސް ނަޝީދަށް ރޭ ހަމަލާދީގެން ފުލުހުންނަށް ހުށަހެޅިތާ ދެ މިނެޓްގެ ތެރޭގައި ފުލުހުން ހާދިސާ ހިނގި ސަރަަހައްދަށް ދިޔަ ކަމަށެވެ. ފުލުހުން ވަނީ އެ ސަރަހައްދު ބަންދުކޮށް، ބަލާ، ކްލިއާކޮށްފައި ކަމަށް ވެސް އޭނާ ވިދާޅުވި އެވެ.
ނަޝީދުގެ އިތުރުން އެމަނިކުފާނުގެ ތިން ބޮޑީގާޑުންނާއި އާއްމު މީހަކާއި ބިދޭސީއަކަށް ވަނީ އަނިޔާވެފަ އެވެ. އެ އެންމެންގެ ހާލު ވެސް މިހާރު ރަނގަޅެވެ.
