ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ ފުރާނައަށް ނުރައްކާވާ ގޮތަށް އެއްޗެއް ގޮއްވާލައިގެން ދިން ހަމަލާއަކީ ރާއްޖޭގެ ޑިމޮކްރަސީ އާއި އިގްތިސާދަށް ދިން ހަމަލާއެއްގެ ގޮތުގައި ރައީސް އިބްރާހިމް މުހައްމަދު ސޯލިހް މިރޭ ސިފަކުރައްވައިފި އެވެ.
ނަޝީދަށް ހަމަލާދިނީ އެމަނިކުފާނު ދިރިއުޅުއްވާ ގ. ކެނެރީގެ އިން ނުކުމެވަޑައިގެން ކާރަށް އަރާވަޑައިގަންނަވާ ވަގުތުކޮޅާ ދިމާކޮށް ނީލޯފަރުމަގުގައި، ސައިކަލްގައި އެއްޗެއް ގޮއްވާލައިގެންނެވެ. އެ ސައިކަލް ހުރީ ކެނެރީގޭ ހުންނަ ނީލޯފަރުހިނގުން، މަޖީދީ މަގާ ވީ ކަންމަތީގަ އެވެ.
ނަޝީދުގެ ހަށިކޮޅަށް ދިން ގެއްލުމާ ގުޅިގެން ގައުމާ މުހާތަބްކުރައްވައި ރައީސް މިރޭ ވިދާޅުވީ ފުލުހުންނާއި ސިފައިން އެ ހަމަލާ ސީރިއަސްކޮށް ތަހުގީގު ކުރަމުން އަންނަ ކަމަށެވެ. އެއާއެކު ބައިނަލްއަގުވާމީ ތަޖުރިބާރުންގެ އެހީ ވެސް މި ތަހުގީގަށް ހޯދަން ނިންމާފައިވާ ކަމަށް ވިދާޅުވި އެވެ.
އެމަނިކުފާނު ވިދާޅުވި ގޮތުގައި މި ތަހުގީގަށް އޮސްޓްރޭލިއަން ފެޑްރަލް ޕޮލިސްގެ ޓީމެއް ހޮނިހިރުދުވަހުގެ ރާއްޖެ އަންނާނެ އެވެ.
"މިއީ ޑިމޮކްރަސީ އާއި އިގްތިސާދަށް ވެސް ދިން ހަމަލާއެއް. މިފަދަ އަމަލުތަކަށް މި ދިވެހި ބިމުގައި އެއްވެސް ޖާގައެއް ނޯންނާނެ،" ރައީސް ވިދާޅުވި އެވެ.
އެކަން ކަށަވަރުކުރަން އަޅަން ޖެހޭ ކޮންމެ ފިޔަވަޅެއް ފަސްޖެހުމެއް ނެތި އަޅުއްވާނެ ކަމުގެ ޔަގީންކަން ވެސް ދެއްވި އެވެ.
ނަޝީދުގެ ހަށިކޮޅަށް ލިބުނު ގެއްލުންތަކަށް އޭޑީކޭގައި އަންނަނީ ފަރުވާ ދެމުންނެވެ. ހޭނައްތައިގެން އެމަނިކުފާނުގެ އޮޕަރޭޝަނެއް ކުރަމުން އައި ނަމަވެސް ހާލު ސީރިއަސް ނޫން ކަމަށް އޭޑީކޭ އިން ބުނެ އެވެ. އެމަނިކުފާނު ހިމެނިވަޑައިގަންނަވާ ގޮތުން ހަ މީހަކަށް ވަނީ އަނިޔާވެފަ އެވެ. އެއީ ތިން ސިފައިންނާއި އާއްމު މީހެއްގެ އިތުރުން ބިދޭސީއަކަށެވެ.
