އެއްޗެއް ގޮއްވާލައިގެން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ހަށިކޮޅަށް މިރޭ ދިން ހަމަލާ އިދިކޮޅުން ކުށްވެރިކޮށްފި އެވެ.
އިދިކޮޅު ކޯލިޝަންގައި ހިމެނޭ ޕީޕީއެމާއި ޕީއެންސީއަށް ނިސްބަތްވާ ގިނަ މެންބަރުންތަކެއް ވަނީ ރައީސް ނަޝީދަށް ދިން ހަމަލާއާ ގުޅިގެން މައްސަލަ ކުށްވެރިކޮށް ޓްވީޓް ކުރައްވާފަ އެވެ.
ކުރީ ސަރުކާރުގެ ޑިފެންސް މިނިސްޓަރު އަދި މަޑުއްވަރީ ދާއިރާގެ މެންބަރު އާދަމް ޝަރީފް ވަނީ "ނާތަހުޒީބު" އަމަލެއްގެ ގޮތުގައި އެ ހަމަލާ ސިފަ ކުރައްވާފަ އެވެ. އަދި ވީ އެންމެ އަވަހަކަށް މައްސަލަ ތަހުގީގުކޮށް، އެކަމުގައި ޝާމިލުވާ މީހުން އިންސާފުގެ ކުރިމައްޗަށް ގެނައުމަށް އޭނާ ވަނީ ގޮވާލައްވާފަ އެވެ.
ޕީޕީއެމްގެ މެންބަރު އަދި ގުރައިދޫ ދާއިރާގެ މަޖިލިސް މެންބަރު، ގައްސާން މައުމޫން ވެސް ވަނީ ރައީސް ނަޝީދަށް ދިން ހަމަލާ ކުށްވެރިކުރައްވާފަ އެވެ. އޭނާ ވިދާޅުވީ، "ހިޔާލު ތަފާތުވުމުގެ ހައްލަކީ އަނިޔާއެއް ނޫން،" ކަމަށެވެ.
ޕީޕީއެމްގެ ކުރީގެ ނައިބު ރައީސް އަދި މިހާރު ޕީއެންސީގެ ރައީސް، އަބްދުއްރަހީމް އަބްދުﷲ ވެސް ވަނީ މި ހަމަލާއާ ގުޅިގެން ޓުވީޓު ކުރައްވައި މައްސަލަ ވީ އެންމެ އަވަހަކަށް ތަހުގީގުކޮށް ކުށްވެރިން އިންސާފުގެ ކުރިމައްޗަށް ގެނައުމަށް ގޮވާލައްވާފަ އެވެ.
މީގެއިތުރުން ވެސް، އެންމެ ފަހުން ބޭއްވި އިންތިހާބުގައި މާލޭ ސިޓީގެ މޭޔަރުގެ ގޮނޑި ކާމިޔާބުކުރެއްވި ކުރީގެ ހައުސިން މިނިސްޓަރު ޑރ މުހައްމަދު މުއިއްޒު އާއި ކުރީގެ ރައީސް އޮފީހުގެ މިނިސްޓަރު މުހައްމަދު ހުސައިން ޝަރީފް (މުންދު) އާއި ޕީޕީއެމަށް ނިބަތްވާ މަޖިލިސް އެހެން މެންބަރުން ވެސް ވަނީ ހަމަލާ ކުށްވެރިކޮށް ޓުވީޓުކުރައްވާފަ އެވެ.
މިރޭގެ ހަމަލާގައި ރައީސް ނަޝީދުގެ ހަށިކޮޅަށް ވަނީ ޒަހަމްތަކެއް ލިބިފައިވާއިރު، އެމަނިކުފާނަށް އޭޑީކޭގައި ހާއްސަ ޑޮކްޓަރުންގެ ޓީމަކުން އަންނަނީ ފަރުވާދެމުންނެވެ.
ރައީސް ނަޝީދުގެ އިތުރުން، މި ހާދިސާގައި ތިން ސިފައިންނާއި އާއްމު މީހެއްގެ އިތުރުން ބިދޭސީއަކަށް އަނިޔާވި އެވެ.
