ކުރީގެ ރައީސް މުހައްމަދު ނަޝީދަށް އަމާޒުކޮށް މިރޭ މާލޭގައި ގޮއްވާލި ޑިވައިސް ހަރުކޮށްފައިވާ ސައިކަލްގައި ވަނީ ސައްހަ ނަމްބަރު ޕްލޭޓެއް ނޫން ކަން "އަދަދު"އަށް ކަށަވަރުވެއްޖެ އެވެ.
އެމަނިކުފާނު ދިރިއުޅުއްވާ ގ. ކެނެރީގެ އިން ނުކުމެވަޑައިގެން ކާރަށް އަރާވަޑައިގަންނަވާ ވަގުތުކޮޅާ ދިމާކޮށް ނީލޯފަރުމަގުގައި ހަމަލާ ދިނީ ސައިކަލްގައި އެއްޗެއް ގޮއްވާލައިގެންނެވެ. އެ ސައިކަލް ހުރީ ކެނެރީގޭ ހުންނަ ނީލޯފަރުހިނގުން، މަޖީދީ މަގާ ވީ ކަންމަތީގަ އެވެ.
ގޮއްވާލުމަށް ބޭނުންކުރި ޑިވައިސް އެ ސަރަހައްދުގައި ފެންނަން އޮތެވެ.
އިތުބާރު ހިފޭ މަސްދަރަކުން "އަދަދު"އަށް މައުލޫމާތު ދީފައިވާ ގޮތުގައި ސައިކަލުގައި ބޭނުންކޮށްފައި ހުރި AA0F P6758 ނަންބަރު ޕްލޭޓަކީ ޓްރާންސްޕޯޓު މިނިސްޓްރީގެ ރެކޯޑުތަކުން ދައްކާ ގޮތުގައި ޕީ.ސީ.އެކްސް. ބްރޭންޑުގެ ސައިކަލެެއްގެ ނަންބަރު ޕްލޭޓެކެވެ. އެކަމަކު އެއްޗެއް ގޮއްވާލި ހާދިސާގައި މި ނަންބަރު ޕުލޭޓް ހަރުކޮށްފައި ވަނީ ވޭވް125 ސައިކަލެއްގަ އެވެ.
ސީރިއަސްކޮށް ތަހުގީގު ކުރަމުން އަންނަ މިހާދިސާއާ ގުޅޭ ގޮތުން ފުލުހުންގެ ބަހެއް އަދި ނުލިބެ އެވެ.
މި ހާދިސާގައި ނަޝީދުގެ ހަށިކޮޅަށް ލިބުނު ގެއްލުންތަކަށް އޭޑީކޭގައި އަންނަނީ ފަރުވާ ދެމުންނެވެ. ހޭނައްތައިގެން އެމަނިކުފާނުގެ އޮޕަރޭޝަނެއް ކުރަމުން އައި ނަމަވެސް ހާލު ސީރިއަސް ނޫން ކަމަށް އޭޑީކޭ އިން ބުނެ އެވެ. އެމަނިކުފާނު ހިމެނިވަޑައިގަންނަވާ ގޮތުން ފަސް މީހުންނަށް ވަނީ އަނިޔާވެފަ އެވެ. އެއީ ތިން ސިފައިންނާއި އާއްމު މީހެއްގެ އިތުރުން ބިދޭސީއަކަށެވެ.
