އެއްޗެއް ގޮއްވާލައިގެން މިރޭ މާލޭގައި ދިން ޓެރަރިސްްޓް ހަމަލާއަކީ ރައީސް ނަޝީދަށް އަމާޒުކޮށްގެން ދެވުނު ހަމަލާއެއް ކަމަށް އެސްޓެބްލިޝްވާ ގޮތަށް ހޯމް މިނިސްޓަރު އިމްރާން އަބްދުﷲ ދާދި ދެންމެ އަކު ޓްވީޓެއްކުރައްވައިފި އެވެ.
ރައީސް ނަޝީދުގެ ގެކޮޅު. ގ. ކެނެރީގެއިން ނުކުމެވަޑައިގެން އެމަނިކުފާނު ކާރުކޮޅަށް އަރައިވަޑައިގަންނަވަނިކޮށް ދިން ހަމަލާއާ ގުޅިގެން އިމްރާން ކުރެއްވި ޓްވީޓެއްގައި ވިދާޅުވީ "ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް މިރޭ ދެވުނު ހަމަލާ ހަރުކަށި އިބާރާތުން ކުށްވެރިކުރާ" ކަމަށެވެ.
"މި މައްސަލަ އެންމެ މަތީ ދަރަޖައިގައި އަހައްމިޔައްތުކަން ދީގެން ދިވެހި ފުލުހުން ތަހުގީގު ކުރާކަން ކަށަވަރުކުރާނަން. ރައީސް ނަޝީދު އާއި ގެއްލުންވި ފަރާތްތަކަށް އަވަސް ޝިފާއަކަށް އެެދެން،" ޓްވީޓުގައިވެ އެވެ.
އިމްރާން މި މޭރުމުން ޓްވީޓްކުރެއްވި ނަމަވެސް ރައީސް އިބްރާހިމް މުހައްމަދު ސޯލިހު ކުރެއްވި ޓްވީޓެއްގައި، ވިދާޅުވެފައިވަނީ މާލޭ ނީލޯފަރުމަގުގައި ބާރުގަދަ އެއްޗެއް ގޮވައި ރައީސް ނަޝީދަށް އަނިޔާ ލިބިވަޑައިގެންފައިވާ ކަމަށެވެ. އެ ހަމަލާއަކީ ރައީސް ނަޝީދަށް އަމާޒުކޮށް ދެވުނު ހަމަލާއެއް ކަމަށް ރައީސްގެ ޓްވީޓުގައި ވިދާޅުވެފައެއް ނުވެ އެވެ.
