ފުލުހުންގެ ބަންދުގައި ވިލިމާލެ ޑިޓެންޝަން ސެންޓަރުގައި މިދިޔަ އާދީއްތަދުވަހު އަމިއްލައަށް މަރުވި ޔޫކޭ މީހާއަކީ މަސްތުވާތަކެތީގެ މައްސަލައެއްގައި ހައްޔަރުކޮށްފައިވާ މީހެއް ކަމަށް ފުލުހުން މިއަދު ބުނެފި އެވެ.
ފުލުހުން އޭނާ އަށް ކުރަނީ ރާއްޖެއަށް މަސްތުވާތަކެތި އެތެރެ ކުރި ކަމުގެ ތުހުމަތެވެ. އޭނާ އާއި އިތުރު މީހަކު އަތުލައިގަތީ ޑްރަގް އެންފޯސްމަންޓް ޑިޕާޓްމަންޓާއި ފުލުހުންގެ އިންޓެލިޖެންސް އަދި މޯލްޑިވްސް ކަސްޓަމްސް ގުޅިގެން ހިންގި އޮޕަރޭޝަނެއްގަ އެވެ.
އެ ދެ މީހުންގެ އަތުން 3.4 ކިލޯގެ މަސްތުވާތަކެތި އަތުލައިގަނެވުނު ކަމަށް ފުލުހުން ބުންޏެވެ. ޔޫކޭ މީހާގެ އިތުރުން ހައްޔަރުކުރީ ތައިލެންޑުގެ މީހެކެވެ.
ފުލުހުން ބުނި ގޮތުގައި މި ދެ މީހުން ހައްޔަރުކުރީ މިދިޔަ އެޕްރީލް މަހުގެ 25 ވަނަ ދުވަހުން ފެށިގެން އަށް ދުވަހުގެ މުއްދަތަށް ކުރިއަށް ގެންދިޔަ އޮޕަރޭޝަނެއްގަ އެވެ.
ޖަލުގައި އަމިއްލައަށް މަރުވި މީހާގެ ފޮށިން މަސްތުވާތަކެތި ކަމަށް ޝައްކުކުރެވޭ އެއްޗެއްހުރި ބޮޑު ދެ ރަބަރު ޕެކެޓު ފެނިފައިވާ ކަމަށް ފުލުހުން ބުންޏެވެ.
މި ދެ މީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބެހެއްޓުމަށް މުއްދަތު ވަނީ ދީފަ އެވެ. އެގޮތުން 43 އަހަރުގެ މީހާއަށް 15 ދުވަހުގެ މުއްދަތެއް ޖަހާފައިވާ އިރު 30 އަހަރުގެ ޔޫކޭ މީހާއަށް ދެ މަސް ދުވަހުގެ މުއްދަތު ދީފައިވެ އެވެ.
ފުލުހުންގެ ބެލުމުގެދަށުގައި ހުއްޓައި އެ މީހާ އަމިއްލައަށް މަރުވި މައްސަލަ ފުލުހުންނާއި ކަމާ ގުޅުން ހުރި އިދާރާތައް ގުޅިގެން އަންނަނީ ކުރަމުންނެވެ. އަދި މަސްތުވާތަކެތީގެ މައްސަލަ ޑްރަގް އެންފޯސްމަންޓް ޑިޕާޓްމަންޓުން ދަނީ ތަހުގީގު ކުރަމުންނެވެ.
