ދަނޑުވެރިކަމާއި މަސްވެރިކަމަށް ދޫކުރާ ރަށްތަކުގެ އަދަދު މާ ބޮޑަށް އިތުރުވެއްޖެއްޔާ ބޭރުގެ އިންވެސްޓްމަންޓުތައް ރާއްޖެ ގެންނަން ދަތިވާނެ ކަމަށް މަސްވެރިކަމާ ބެހޭ މިނިސްޓަރު އަހުމަދު ޝިޔާމް މިރޭ ވިދާޅުވެއްޖެ އެވެ.
"އަހާ" ފޯރަމުގައި ވާހަކަ ދައްކަވަމުން މިނިސްޓަރު ވިދާޅުވީ ފުޑް ސެކިއުރިޓީގެ ލަނޑުދަނޑިތައް ހާސިލު ކުރުމަށްޓަކައި ދަނޑުވެރިކަމުން އުފައްދާ ތަކެތި އިތުރު ކުރަންޖެހޭ ކަމަށެވެ. ނަމަވެސް އެކަން ކުރަންޖެހޭ ގޮތަކީ އިތުރު ރަށްތައް ދިނުމުގެ ބަދަލުގައި، މިހާރު ވެސް ދަނޑުވެރިކަމަށް ދީފައި ހުރި ރަށްތަކުގެ ޕްރޮޑަކްޝަން އިތުރު ކުރުން ކަމަށެވެ.
"ހުރިހާ ރަށެއްގައި ބަރާބަރަށް އެބޭފުޅުން ހުށަހަޅުއްވާފައި ހުރި ގޮތަށް މަސައްކަތުގެ ވޯކް ޕްލޭނާ އެއްގޮތަށް މަސައްކަތް ކުރިއަށްދާ ނަމަ އަޅުގަނޑުމެންނަށް އިރާދަކުރެއްވިއްޔާ ބައެއް ބާވަތްތައް، މަދުވެގެން ބައެއް ބާވަތްތައް ސަބްސްޓިޓިއުޓް ކުރެވޭނެ،" ޝިޔާމް ވިދާޅުވި އެވެ.
ދަނޑުވެރިކަމާއި މަސްވެރިކަމަށް ރާއްޖޭގެ ޖުމްލަ 56 ރަށެއް ދޫކޮށްފައިވާއިރު، އޭގެ ތެރެއިން ދަނޑުވެރިކަން ކުރަން ހާއްސަކޮށް ދޫކޮށްފައިވާ 39 ރަށް ހިމެނެ އެވެ.
ޝިޔާމް ވިދާޅުވީ، ރާއްޖެއަށް ބޭނުންވާ މިންވަރަށް ކާނާ ހެއްދުމަށްޓަކައި، އިތުރު ރަށްތައް ދޫކުރުމަކީ ގޯހެއް ކަމަށެވެ. އޭނާ ވިދާޅުވީ މިހާ ކުޑަ އާބާދީއެއްގައި އެހާ ގިނަ ރަށްތައް ދަނޑުވެރިކަމަށް ދޫކޮށްފި ނަމަ ބޭރުގެ ވިޔަފާރިތައް ގެންނަން އުނދަގޫވާނެ ކަމަށެވެ.
"އަޅުގަނޑުމެން މިހާ ބޮޑު ފުޑް ސެކިއުރިޓީގެ ގޯލެއް އެޗީވްކުރަން ބަލާއިރުގަ، ދިވެހިރާއްޖޭގައި މިހާ އަދަދަށް އެބަހުއްޓޭ ދަނޑުވެރިކަން ކުރަން ދެވިފައި، އެހެންވެއްޖެއްޔާ މިތަނަށް އިންވެސްޓު ކުރާނެ މީހަކު ނާންނާނެ. އެހެންނޫންތޯ ވާނީ؟ މިކަހަލަ ކުޑަ އާބާދީއެއްގައި މިހާ ގިނަ ރަށްރަށް ދަނޑުވެރިކަމަށް ދެވިފައި ހުރެއްޖެ ކަމަށްވަންޏާމު އެއީ ވަރަށް ބޮޑު ޗެލެންޖަކަށް ވާނީ އަޅުގަނޑުމެންނަށް ފޮރިން އިންވެސްޓްމެންޓްސް މިތަނަށް އެޓްރެކްޓް ކުރުވަން،" އޭނާ ވިދާޅުވި އެވެ.
