ވިލިމާލޭ ކަސްޓޯޑިއަލް ފެސިލިޓީގައި ފުލުހުންގެ ބަންދުގައި ހުރި ބިދޭސީއަކު އަމިއްލައަށް މަރުވެއްޖެ އެވެ.
"އަދަދު"އަށް އެނގިފައިވާ ގޮތުގައި ދަންޖެހިގެން މަރުވެފައިވަނީ އިނގިރޭސިވިލާތަށް ނިސްބަތްވާ 29 އަހަރުގެ ފިރިހެނެކެވެ. އޭނާ މަރުވެފައިވަނީ ރޭގެ ވަގުތެއްގަ އެވެ.
އޭނާ ބަންދުގައި ހުރީ ކޮން ކުށެއްގެ ތުހުމަތުގައި ކަމެއް ސާފެއް ނޫނެވެ. އަދި އަމިއްލައަށް މަރުވި ސަބަބެއް ވެސް ސާފެއް ނުވެ އެވެ.
ފުލުހުންގެ މީޑިއާ އޮފިޝަލް މިރޭ "އަދަދު"އަށް ވިދާޅުވި ގޮތުގައި، މި މަރާ ގުޅޭ މައުލޫމާތު ކަމާ ގުޅުންހުރި އިދާރާތަކާ ހިއްސާކޮށް، އެ އިދާރާތަކާއެކު މައްސަލަ ތަހުގީގު ކުރަމުންދާ ކަމަށެވެ.
އޭގެ ތެރޭގައި ހިމެނޭ އެޗްއާރްސީއެމްއިން މިރޭ "އަދަދު"އަށް ބުނި ގޮތުގައި ބިދޭސީ މީހާ އަމިއްލައަށް މަރުވުމާ ގުޅިގެން، އެ ކޮމިޝަނުން ވަނީ އެކަމަށް އެޓެންޑްވެފަ އެވެ. ނަމަވެސް، މިކަމާ ގުޅޭ އިތުރު ތަފްސީލެއް ނުދެ އެވެ.
