މަސައްކަތު މާހައުލުގައި ކުރިމަތިވާ ޖިންސީ ފުރައްސާރައިގެ މައްސަލަތައް ނުބަލާތީ އަޑުއުފުލަން ރަސްފަންނު ސަރަހައްދުގައި ރޭ ކުރި މުޒާހަރާ ކަވަރު ކުރަން ހަރަކާތްތެރިވި ނޫސްވެރިންނާ މެދު ފުލުހުން އަމަލު ކުރިގޮތުން މީޑިއާގެ ބެލެނިވެރި ފަރާތްތަކުން މިއަދު ކަންބޮޑުވުން ފާޅުކޮށްފި އެވެ.
މޯލްޑިވްސް ބްރޮޑްކާސްޓިން ކޮމިޝަނާއި މޯލްޑިވްސް މީޑިއާ ކައުންސިލްގެ އިތުރުން، މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ވެސް ބުނީ ރޭގެ މުޒާހަރާ ކަވަރު ކުރަން އުޅުނު ނޫސްވެރިންނާ ބައެއް ފުލުހުން ހުތުރު ބަހުން ވާހަކަ ދައްކައި ބާރުގެ ބޭނުން ކުރި ކަމުގެ ޝަކުވާ ހުށަހަޅައިފައިވާ ކަމަށެވެ.
ފުލުހުންގެ އެ އަމަލަކީ އެއްވެސް ހާލަތެއްގައި ބަލައިގަނެވޭނެ ކަމެއް ނޫން ކަމަށް ބްރޯޑްކާސްޓިން ކޮމިޝަނުން ނެރުނު ބަޔާނުގައި ބުނެފައިވެ އެވެ.
"ކޮމިޝަންގެ ފަރާތުން ފުލުހުންނަށް އިލްތިމާސް ކުރަނީ، އެކި އެއްވުންތަކާއި މުޒާހަރާތައް ކަވަރުކުރުމަށް ހަރަކާތްތެރިވާ ނޫސްވެރިންނަށް ކުރިމަތިވާ ހުރަސްތައް ނައްތާލައި، ނޫސްވެރިންގެ ވާޖިބު އަދާ ކުރުމަށް ފުރިހަމަ ފަހި މާހައުލެއް ގާއިމްކޮށްދީ ރައްކާތެރިކަން ކަށަވަރު ކޮށް ދިނުމަށް،" ކޮމިޝަންގެ ބަޔާނުގައިވެ އެވެ.
އެމްޖޭއޭން ވަނީ ނޫސްވެރިންނަށް ކުރިމަތިވި ހުރަސްތައް ތަހުގީގު ކޮށް ދިނުމަށް ރައީސް އިބްރާހިމް މުހައްމަދު ސޯލިހަށާއި ހޯމް މިނިސްޓަރު އިމްރާން އަބްދުﷲގެ އިތުރުން ފުލުހުންގެ އިސްވެރިންނަށް ގޮވާލައިފަ އެވެ.
ބްރޮޑްކާސްޓިން ކޮމިޝާނާއި މީޑިއާ ކައުންސިލުން ފުލުހުންގެ އަމަލު ކުށްވެރި ކުރުމުގެ އިތުރުން މުޒާހަރާ ކަވަރު ކުރާ ނޫސްވެރިންގެ އަމަލުތައް ވެސް ރަނގަޅު ކުރުމަށް ވަނީ އިލްތިމާސް ކޮށްފަ އެވެ.
"ނޫސްވެރިންނަކީ މުޖުތަމައުގައި އުޅޭ އުޅުމުގައްޔާއި ހާއްސަކޮށް މަސައްކަތުގެ ތެރޭގައި ވަކި މިންގަނޑެއް ހިފަހައްޓާ، މުޅި މުޖުތަމައުއަށް ނަމޫނާ ބަޔަކަށް ވާންޖެހެ އެވެ. އަދި ނޫސްވެރިންގެ މިނިވަންކަމުގެ އިމުގެ ތެރޭގައި ޕްރޮފެޝަނަލް ވާޖިބު އަދާކުރަމުން ދާހާ ހިނދެއްގައި ހަމަ އެއްވެސް ފަރާތަކުން ނޫސްވެރިންގެ މަސައްކަތައް ދަތިކޮށް ހުރަސް އެޅުމަކީ ބަލައިގަނެވޭނެ ކަމެއް ނޫން،" މީޑިއާ ކައުންސިލްގެ ބަޔާނުގައިވެ އެވެ.
ނޫސްވެރިންނަށް ބޭއަދަބީކޮށް ވާހަކަ ދެއްކުމާއި ބާރުގެ ބޭނުން ކުރުން ފުލުހުން ތަކުރާރު ކުރާކަމަށް ބުނެ އެމްޖޭއޭން ވަނީ އެކަން ކުށްވެރި ކޮށްފަ އެވެ.
ރޭ މާލޭގައި ޒުވާނުންތަކެއް ކުރި މުޒާހަރާގެ ބައިވެރިންނަށް އަމާޒުކޮށް ފުލުހުން ހާލަތާ ނުބައްދަލު ބާރުގެ ބޭނުންކުރި މައްސަލަ ބަލައި ގޮތެއް ނިމެންދެން އެ ފުލުހުން، ފްރޮންޓް ލައިން ޕޮލިސިންގެ މަސްއޫލިއްޔަތުތަކުން މިއަދު ވަނީ ދުރުކޮށްފަ އެވެ.
