މަސައްކަތު މާހައުލުގައި ކުރިމަތިވާ ޖިންސީ ފުރައްސާރައިގެ މައްސަލަތައް ނުބަލާތީ އަޑުއުފުލަން ރަސްފަންނު ސަރަހައްދަށް އެއްވި މަދު ބަޔަކާ ދެކޮޅަށް ފުލުހުން ހާލަތާ ނުބައްދަލު ބާރާ އެކު އަނިޔާވެރިކޮށް މުޒާހަރާ ރޫޅާލި ކަމުގެ ޝަކުވާ ބޮޑުވުމުން، އެކަމާ ގުޅިގެން ހޯމް މިނިސްޓަރު އިމްރާން އަބްދުﷲ ޖަވާބުދާރީ ކުރުވުމަށް ރައްޔިތުންގެ މަޖިލީހަށް ހުށަހަޅައިފި އެވެ.
ކޮވިޑާ ގުޅިގެން ހެލްތު ޕްރޮޓެކްޝަން އެޖެންސީން އަޅާފައިވާ ރައްކާތެރިކަމުގެ ފިޔަވަޅެއްގެ ގޮތުން، ގިނަ ބަޔަކު އެއްވެ މުޒާހަރާކުރުން މަނަލެވެ. މުޒާހަރާކުރާ ސަރަހައްދަށް އެއްވެ އެކަން ހުއްޓުވަން ފުލުހުން އުޅުމުން މުޒާހަރާގެ ބައިވެރިން އެ ސަރަހައްދު ދޫކޮށް ނުދިޔައީ އެވެ.
އެހެންވެ ފުލުހުން ބާރުގެ ބޭނުންކުރީ އެވެ. މުޒާހަރާ ހުއްޓުވުމުގެ ތެރޭގައި ބައެއް މީހުންގެ ލޮލަށް އަމާޒުކޮށް ފުލުހަކު ޕެޕާ ސްޕްރޭ ޖެހި ވީޑިއޯއެއް ސޯޝަލްމީޑިއާގައި ވަނީ އާއްމުވެފަ އެވެ. މީގެއިތުރުން މުޒާހަރާގެ ތެރެއިން އަންހެނަކު ހައްޔަރުކުރުމުގެ ތެރޭގައި އޭނާއަށް ވަރަށް ބޮޑަށް އަނިޔާވާ ގޮތަށް އަމަލުކުރި މައްސަލައިގައި ވެސް ފުލުހުންނަށް ވަނީ ނުރުހުން އަމާޒުވެފަ އެވެ.
ފުލުހުންނާމެދު ޝަކުވާ ބޮޑުވެފައިވަނިކޮށް ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއީލް އަހުމަދު ނަސީމް ވަނީ މުޒާހަރާ ރޫޅާލުމުގައި އަމަލުކޮށްފައިވާ ގޮތް ހޯމް މިނިސްޓަރުގެ އަރިހުން ސާފުކުރުމަށް މިއަދު ހުށަހަޅުއްވައިފަ އެވެ.
މި އަހަރުގެ ފުރަތަމަ ދައުރު ނިންމައި، މިވަގުތު މަޖިލިސް ޗުއްޓީގައި އޮތުމުން، މަޖިލީހުގެ އިދާރާ މެދުވެރިކޮށް މީކާއީލް އެދިވަޑައިގަންނަވާފައިވަނީ އިމްރާންގެ އަރިހުން ފަސް ސުވާލެއްގެ ޖަވާބު ލިޔުމުން ހޯއްދެވުމަށެވެ.
މިގޮތުން، ރޭގެ މުޒާހަރާ ރޫޅާލުމުގައި ހާލަތާ ނުބައްދަލު ބޭނުންކޮށްގެން އެއްވެސް ފުލުހަކާ މެދު ފިޔަވަޅެއް އަޅާފައިވޭތޯ އާއި، މުޒާހަރާ ކޮންޓްރޯލް ކުރަން ދިޔަ ފުލުހުންގެ ޔުނިފޯމުގައި ސާވިސް ނަންބަރު ފެންނަ ގޮތަށް ހަރުކޮށްފައިވޭތޯ އާއި އެ ފުލުހުންނަކީ އެކަށީގެންވާ ތަމްރީނު ލިބިފައިވާ ފުލުހުންތޯ ބަލަން ވެސް މީކާއީލް ވަނީ ހުށަހަޅުއްވައިފަ އެވެ.
މީގެ އިތުރުން، މުޒާހަރާ ރޫޅާލުމުގައި ހަރަކާތްތެރިވާ ފުލުހުން ބޮޑީކެމެރާ ބޭނުންނުކުރަނީ ކީއްވެތޯ އިމްރާންގެ އަރިހުން ސާފުކުރަން އެ ސިޓީގައި އެދިފައިވެ އެވެ.
އަދި ރޭގެ މުޒާހަރާއާ ސީދާ ނުގުޅޭ ގޮތަށް ބޮޑެތި ކުށްތަކަށް ތުހުމަތު ކުރެވޭ ފަރާތްތަކުގެ ވަނަވަރު ހާމަކުރާއިރު އެއް އުސޫލަކުން އަމަލުނުކުރަނީ ކީއްވެތޯ ވެސް މީކާއީލް ވަނީ އިމްރާންގެ އަރިހުން އައްސަވައިފަ އެވެ.
ރޭގެ މުޒާހަރާގެ ބައިވެރިންގެ އިތުރުން، މުޒާހަރާ ކަވަރުކުރުމުގައި އުޅުނު ނޫސްވެރިންނަށް ހުރަސްއަޅައި ބައެއް ނޫސްވެރިންނާ ދިމާލަށް ފުލުން ހަޑިހުތުރު ބަހުން މުއާމަލާތު ކުރި މައްސަލަ ނޫސްވެރިންގެ ޖަމިއްޔާ އާއި މީޑިއާ ކައުންސިލުން ވަނީ ކުށްވެރިކޮށްފަ އެވެ.
އެ ހުރިހާ ކަންބޮޑުވުންތަކާ ގުޅިގެން، ރޭ ފުލުހުން އަމަލުކުރި ގޮތުގެ ހާއްސަ ތަހުގީގެއް ކުރަމުން އަންނަ ކަމަށް ޕޮލިސް ކޮމިޝަނަރު މުހައްމަދު ހަމީދު ވަނީ ވިދާޅުވެފަ އެވެ.
