ހުޅުމާލޭގައި ހުންނަ ޓްރީޓޮޕް ހޮސްޕިޓަލުގައި އެޑްމިޓުކޮށްފައި އޮތް ކުޑަކުއްޖަކަށް ގަދަކަމުން ޖިންސީ އަނިޔާ ކުރި ކަމަށް ތުހުމަތު ކުރެވޭ ފިރިހެން ނަރުހަކު ރާއްޖެއިން ފުރުވާލާފައިވާތީ ހޮސްޕިޓަލުގެ މެނޭޖްމަންޓުގެ މައްސަލަ ތަހުގީގު ކުރުމަށް އަންގަވާފައިވާނެ ކަމަށް ޕްރޮސިކިއުޓާ ޖެނެރަލް ހުސައިން ޝަމީމް ވިދާޅުވެއްޖެ އެވެ.
ޕްރޮސެކިއުޓާ ޖެނެރަލް ޝަމީމް "އަދަދު" އަށް ވިދާޅުވީ މި މައްސަލައިގައި ކުޑަ ކުއްޖަކަށް ޖިންސީ ގޯނާ ކުރިކަން އެނގި ހުރެ ނާންގާ ހުރުމާއި ހެކި ފޮރުވުމުގެ ތުހުމަތު ހޮސްޕިޓަލްގެ މެނޭޖުމަންޓުގެ މައްޗަށް ކުރެވޭ ކަމަށެވެ. އެހެންކަމުން އެ ހޮސްޕިޓަލްގެ މެނޭޖްމަންޓުގެ މައްޗަށް ޖިނާއީ ތަހުގީގެއް ހިންގުމަށް އަންގާފައިވާނީ މާޗް 15 ގައި ކަމަށް އޭނާ ވިދާޅުވި އެވެ.
"ސީރިއަސް މައްސަލައެއްގެ ގޮތުގައި އެކަން ބަލަން އަޅުގަނޑުމެން ވާނީ އަންގައިފައި. އަޅުގަނޑުމެން އެ މައްސަލައިގެ ފޮލޯއަޕް ވެސް ބަލާނަން،" ޝަމީމް ވިދާޅުވި އެވެ.
ޓްރީޓޮޕް ހޮސްޕިޓަލުގެ ފިރިހެން ނަރުހަކު އެޑްމިޓް ކޮށްފައި އޮތް ކުޑަ ފިރިހެން ކުއްޖަކަށް ޖިންސީ ގޯނާ ކުރި މައްސަލަ ޖެނުއަރީ މަހުގެ 14 ވަނަ ދުވަހު އެ ހޮސްޕިޓަލުން ވަނީ ފުލުހުންނަށް ހުށަހަޅައިފަ އެވެ. ނަމަވެސް މައްސަލަ ހުށަހެޅީ އެ ނަރުސް މީހާ ރާއްޖެއިން ފުރުވާލުމަށް ފަހު އެވެ.
ނަރުސް މީހާ ރާއްޖޭގައި ނެތުމުން ކަމަށް ބުނެ ފުލުހުން ވަނީ މިހާރު އެ މައްސަލަ ފައިލުކޮށްފަ އެވެ.
މި ނޫހަށް އެނގިފައިވާ ގޮތުގައި މިއީ މިފަދަ މައްސަލައެއް އެ ހޮސްޕިޓަލުން ސިއްރު ކޮށް، ހެކި ފޮރުވި ކަމަށް ތުހުމަތު ކުރެވޭ ދެވަނަ ފަހަރެވެ. ޖިންސީ ގޯނާ ކުރި ކަމަށް ތުހްމަތު ކުރެވޭ މައްސަލަ ފައިލްކުރި ނަމަވެސް، ޖިންސީ ގޯނާ ކުރިކަން އެނގި ހުރެ ނާންގާ ހުރުމާއި ހެކި ފޮރުވުމަށް ހޮސްޕިޓަލްގެ މެނޭޖުމަންޓުގެ މައްޗަށް ކުރެވޭ ތުހުމަތުގެ ތަހުގީގު ފުލުހުން ކުރިއަށް ގެންދާ ކަމަށް ޝަމީމު ވިދާޅުވި އެވެ.
ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނު ބުނާގޮތުން ކުޑަކުއްޖަކަށް ޖިންސީ ގޯނާ ކުރިކަން އެނގި ހުރެ އެކަން ރިޕޯޓް ނުކުރުމަކީ ކުށެކެވެ. އެ ކުށުގެ އަދަބަކީ ހަ މަސް ދުވަހާއި ތިން އަހަރާ ދެމެދުގެ މުއްދަތަކަށް ޖަލަށް ލުމެވެ.
މި މައްސަލައިގައި ޓްރީޓޮޕް ހޮސްޕިޓަލަށް ގުޅުމުން އަދި ހޮސްޕިޓަލުން އެދުނު ގޮތަށް އީމެއިލް ކުރުމުން ވެސް މައްސަލައިގައި ކޮމެންޓެއް ކުރުމަށް ވަނީ ދެކޮޅު ހަދައިފަ އެވެ.
ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނު ބުނާގޮތުން ކުޑަކުއްޖަކު އިތުބާރުކުރަންޖެހޭ މަގާމެއްގައި ހުރި މީހަކު އެ ކުޑަކުއްޖަކާއެކު ޖިންސީ އަމަލެއް ހިންގައިފި ނަމަ އެއީ 15 އަހަރާއި 18 އަހަރާ ދެމެދުގެ މުއްތަކަށް ޖަލަށް ލެވޭ ކުށެކެވެ.
އިތުރުބާރު ކުރަންޖެހޭ މަގާމުތައް ގާނޫނުގައި މާނަ ކޮށްފައިވާއިރު ހޮސްޕިޓަލް، ނުވަތަ ކްލިނިކް، ނުވަތަ ކުޑަކުދިން ބަލަހައްޓައިދޭ ގެ ފަދަ ހިދުމަތްދޭ ތަންތަނުގެ މީހުން ހިމެނެ އެވެ.
ޓްރީޓޮޕް ހޮސްޕިޓަލުގައި ޖިންސީ ގޯނާ ކުރާ ކަމަށް ތުހުމަތު ކުރެވޭ އެހެން މައްސަލަތަކެއް ވެސް މީގެ ކުރިން ފެންމަތިވެފައިވެ އެވެ. އެގޮތުން އެތަނުގެ ފިރިހެން ޑޮކްޓަރަކު އަންހެން މުވައްޒަފަކާ ގަދަކަމުން ޖިންސީ ގުޅުން ހިންގަން އުޅުނު މައްސަލައެއް ވެސް މީގެ ކުރިން އޮތީ ފެންމަތިވެފައިވެ އެވެ.
