އިންޑިއާ ސަރުކާރުގެ އެހީގައި މާލެ އާއި ވިލިމާލެ، ތިލަފުށި އަދި ގުޅީފަޅު ގުޅާލަން އަޅާ ބުރިޖުގެ މަޝްރޫއުއަށް އިންޑިއާގެ ހަތަރު ކުންފުންޏެއް ޕްރީކޮލިފައި ކޮށްފި އެވެ.
ބުރިޖުގެ މަސައްކަތަށް ފިނޭންސް މިނިސްޓްރީން ހުޅުވާލާފައިވާ ބީލަމުގައި ބައިވެރިވުމަށް މި ކުންފުނިތައް ޕްރީކޮލިފައިކުރީ އިންޑިއާގެ އެގްޒިމް ބޭންކުންނެވެ.
މި ހަތަރު ކުންފުންޏަކީވެސް މިފަދަ މަޝްރޫއުތަކުގެ މަސައްކަތުގެ ތަޖުރިބާ އާއި، މަޝްރޫއުއަށް ބޭނުންވާ ޓެކްނިކަލް މާހިރުކަމާއި ގާބިލިއްޔަތު، އަދި މާލީ ތަނަވަސްކަން ލިބިފައިވާ ކުންފުނިތަކެއްގެ ޔަގީންކަން ވަނީ ދީފަ އެވެ.
އެ މަޝްރޫއު އަށް ބިޑް ހުށައެޅުމުގެ ސުންގަޑި އަންނަ ބުދަ ދުވަހު ހަމަވާއިރު، ބިޑުތައް ލިބުމާއެކު ވީއެންމެ އަވަހަކަށް ބަޔަކު ކަނޑައަޅައި މަސައްކަތް ކުރެވޭނެކަމަށް ޕްލޭނިން އަދި ހައުސިން މިނިސްޓަރު މުހައްމަދު އަސްލަމް ދާދި ފަހުން "އަދަދު" އަށް ދެއްވި އިންޓަވިއުއެއްގައި ވިދާޅުވެފައިވެ އެވެ.
އަދި މި އަހަރު ތެރޭގައި ބުރިޖުގެ އަމަލީ މަސައްކަތް ފެށޭނެކަމަށް ވެސް އަސްލަމް ވަނީ ވިދާޅުވެފަ އެވެ.
"ގްރޭޓާ މާލެ ކަނެކްޓިވިޓީ ޕްރޮޖެކްޓް" އަކީ މިހާތަނަށް ރާއްޖޭގައި ހިންގޭ އެންމެ ބޮޑު އުމްރާނީ ތަރައްގީގެ މަޝްރޫއު އެވެ.
އެ މަޝްރޫއުގެ ދަށުން ގާތްގަނޑަކަށް 6.7 ކިލޯމީޓަރުގެ ބުރިޖާއި ކޯޒްވޭ އެޅިގެންދާނެ އެވެ.
މާލެ-ތިލަފުށި ބުރިޖު އެޅުމަށް އިންޑިއާ ސަރުކާރުން ވަނީ 400 މިލިއަން ޑޮލަރުގެ ލޯނެއްގެ އިތުރުން 100 މިލިއަން ޑޮލަރުގެ ހިލޭ އެހީ ފޯރުކޮށްދިނުމަށް ދިވެހި ސަރުކާރާއެކު އެއްބަސްވެފަ އެވެ.
