ކޮވިޑާ ގުޅިގެން ވަޒީފާ ގެއްލި ދިރިއުޅުން ދަތިވި މީހުންނަށް އެހީއެއްގެ ގޮތުގައި ސަރުކާރުން ދިން އިންކަމް ސަޕޯޓް އެލަވަންސް، އޮޅުވާލައިގެން ހޯދި ގާތްގަނޑަކަށް 1،000 މީހުންނާ ދެކޮޅަށް ފިޔަވަޅު އެޅުމުގެ މަސައްކަތް ފަށައިފި އެވެ.
ފިނޭންސް މިނިސްޓްރީގެ ހިސާބުތައް ދައްކާ ގޮތުގައި ކޮވިޑް-19ގެ ސަބަބުން ވަޒީފާ ގެއްލުނު ނުވަތަ އާމްދަނީއަށް އަސަރުކުރި 22،786 މީހަކަށް އިންކަމް ސަޕޯޓް އެލަވަންސް ލިބުނެވެ. އަދި މިކަމަށް 418 މިލިއަން ރުފިޔާ ހަރަދު ކުރި އެވެ.
އިންކަމް ސަޕޯޓަށް އޮޅުވާލި މީހުން ދެނެގަނެވުނީ މި މަސައްކަތް ކުރަން އިކޮނޮމިކް މިނިސްޓްރީން ހާއްސަ ކުރި ޖޮބް ސެންޓާ ޕޯޓަލް އާއި ޕެންޝަން އޮފީހުގެ ޑޭޓާބޭސް ގުޅާލުމުންނެވެ. މި ޑޭޓާތައް އަޅާ ކިޔުމުގެ ތެރޭގައި ވަޒީފާއެއްގައި އުޅޭ ހާހެއްހާ މީހުން، އަމިއްލަ މަސައްކަތް ކުރާ މީހުންގެ ގޮތުގައި މައުލޫމާތު ދީގެން އިންކަމް ސަޕޯޓް އެލަވަންސް ހޯދިކަން ފާހަގަ ކުރެވިފައިވާ ކަމަށް އިކޮނޮމިކް މިނިސްޓްރީން ބުންޏެވެ.
މިނިސްޓަރު ފައްޔާޒް އިސްމާއިލް "އަދަދު"އަށް ވިދާޅުވީ އެ މީހުންގެ އަތުން އެ ފައިސާ އަނބުރާ ހޯދާނެ ކަމަށެވެ. އެ މަސައްކަތް ވަރަށް އަވަހަށް ފަށާނެ ކަމުގެ ޔަގީންކަން ވެސް ދެއްވި އެވެ.
މި މީހުންނަށް އޮޅުވާލެވުނު ސަބަބާ ގުޅޭގޮތުން ސުވާލު ކުރުމުން ފައްޔާޒު ވިދާޅުވީ، އަމިއްލަ މަސައްކަތް ކުރާ ގިނަ މީހުންގެ މައުލޫމާތު ކަށަވަރު ކުރީ އެ މީހުން ހުށަހެޅި މައުލޫމާތުތަކަށް ކަަމަށެވެ. އަދި އޭރު ބެލީ އެ އެހީތެރިކަން ބޭނުންވާ ބަޔަކަށް ލުއި މިންގަނޑެއްގެ ތެރެެއިން ފައިސާގެ އެހީ ދެވޭތޯ ކަމަށް ވެސް ވިދާޅުވި އެވެ.
ކޮވިޑް ބަލިމަޑުކަމާ އެކު އިގުތިސޯދަށް އައި ހީނަރުކަމުގެ ތެރޭގައި ވަޒީފާ ގެއްލުނު ފަރާތްތަކަށް ސަރުކާރުން އިންކަމް ސަޕޯޓް އެލަވަންސް ދިނީ އޭޕްރިލް މަހުން ފެށިގެން ޑިސެމްބަރު މަހުގެ ނިޔަލަށެވެ. މީގެ ތެރެއިން ވަޒީފާ ގެއްލުން ނުވަތަ ނޯ ޕޭއަށް މީހުންނަށް ލިބުނީ މަހަކު 5000ރ. އެވެ. އަދި އާމްދަނީއަށް އަސަރުކުރި މީހުންނަށް ސަޕޯޓް އެލަވަންސް ލިބުނީ 5000ރ. އަށް ވުރެ ދަށުން މުސާރަ ލިބޭ ނަމަ އެވެ.
