ތަރައްގީއަށް އެންމެ ބޮޑު ދިރުމެއް އަންނާނީ ވަޒީފާގެ ބާޒާރުގައި ބިދޭސީން ފުރަމުން އަންނަ ޖާގަތަކަށް ދިވެހި ޒުވާނުން ނުކުމެގެންކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ބައިނަލްއަގުވާމީ ގޮތުން މިއަދު ފާހަގަކުރާ މަސައްކަތްތެރިންގެ ދުވަހުގެ މުނާސަބަތުގައި ރައީސް ދެއްވި ހިތާބުގައި ވިދާޅުވީ، ގައުމެއް ތަރައްގީ ކުރެވޭނީ، އެ ގައުމެއްގެ އަމިއްލަ ދަރިން، ގައުމު ބިނާކޮށް އާރާސްތުކުރުމުގެ މަސައްކަތާ ހާވާލުވެގެން ކަމަށެވެ.
އަދި ދިވެހިންގެ އުފެއްދުންތެރި ވިސްނުމާއެކު، ޒުވާނުން ނުކުމެ ގައުމު ތަރައްގީކުރަން ފަށައިފި ނަމަ، މިހާރަށްވުރެ މާ ފުރިހަމަ ތަރައްގީއެއް ހޯދޭނެކަން ޔަގީންވާކަމަށް އެމަނިކުފާނު ވިދާޅުވި އެވެ.
ކޮވިޑް-19ގެ ހާލަތުގައި ގިނަ އަދަދެއްގެ މަސައްކަތްތެރިންނަށް ނިކަމެތިކަން ލިބުނު ފާހަގަކުރައްވައި، ރައީސް ވިދާޅުވީ އެފަދަ ފަރާތްތަކުގެ ހައްގުތައް ހިމާޔަތްކޮށްދިނުމުގެ ގޮތުން، 16000 އަށް ވުރެ ގިނަ ބިދޭސީ މަސައްކަތްތެރިން، މިދިޔަ އަހަރެއްހާ ދުވަހުގެ ތެރޭގައި، އެމީހުންގެ ގައުމަށް އަނބުރާ ފޮނުވައިދީފައިވާނެ ކަމަށެވެ.
އަދި މީގެއިތުރުންވެސް މަސައްކަތްތެރިންނާ ގުޅިފައިވާ އެކި މައްސަލަތައް ހައްލުކޮށް، އެމީހުންގެ ހައްގުތައް ފުރިހަމައަށް ލިބިދިނުމަށް، ހާއްސަ އިސްކަމެއް ދީގެން ސަރުކާރުން މަސައްކަތް ކުރަމުން އަންނަ ކަމަށް އެމަނިކުފާނު ވިދާޅުވި އެވެ.
މިގޮތުން ރާއްޖޭގައި މަސައްކަތްކުރާ މީހުންނަށް މުސާރައިގެ ގޮތުން، މިނިމަމް ވޭޖު ކަނޑައެޅުން ފަދަ ގާނޫނަށް ގެނެވުނު މުހިއްމު ބަދަލުތައް ފާހަގަކުރައްވައިފަ އެވެ.
އެ ހިތާބުގައި ގައުމުގެ ތަރައްގީއަށް މަސައްކަތްތެރިން އަދާކުރަމުންދާ މުހިންމު ދައުރު ފާހަގަކުރައްވައި ރައީސް ވިދާޅުވީ އެއީ ތަރައްގީގެ ތަސައްވުރުތައް ހަގީގަތަކަށް ހަދައިދޭ މީހުން ކަމަށެވެ.
