ކުޅިވަރު އިންފްރާސްޓްރަކްޗާ ތަރައްގީ ކުރަން ސަރުކާރުން ހާއްސަ އަހައްމިއްޔަތު ކަމެއް ދީގެން ކުރެވޭ މަސައްކަތުގެ ތެރެއިން މާލޭގައި ދުނިޔޭގެ ފެންވަރުގެ ބިލިއާޑް ފެސިލިޓީއެއް ރޭ ރަސްމީކޮށް ހުޅުވައިފި އެވެ.
ރޭ ބޭއްވި ހާއްސަ ރަސްމިއްޔާތެއްގައި މި ފެސިލިޓީ ހުޅުވައިދެއްވީ އިކޮނޮމިކް މިނިސްޓަ ފައްޔާޒު އިސްމާއިލް އެވެ. ސްޕޯޓްސް މިނިސްޓަރު އަހުމަދު މަހުލޫފާއި އިންޑިއާ އިން ރާއްޖެ އަށް ކަނޑައަޅާފައި ހުންނަވާ ސަފީރު ސަންޖޭ ސުދީރު ވެސް ބައިވެރިވެވަޑައިގެންނެވި އެވެ.
އަދި ރޭގެ އިވެންޓްގައި މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ)ގެ އިސްވެރިންގެ އިތުރުން ކުޅިވަރު އެސޯސިއޭޝަންތަކުގެ އިސްވެރިން ބައިވެރިވެވަޑައިގެންނެވި އެވެ. މި އިވެންޓްގައި ދުނިޔޭގެ ޓްރިކްޝޮޓް ރެކޯޑް ހޯލްޑަރެއް ކަމަށްވާ ފްލޯރިއަން ކޮލާ ވެސް ބައިވެރިވި އެވެ.
ރަސްމިއްޔާތުގައި ވާހަކަ ދައްކަވަމުން މިނިސްޓަރު މަހުލޫފް ވިދާޅުވީ މިދިޔަ ދޮޅު އަހަރެއްހާ ދުވަހު ކޮވިޑް-19ގެ ސަބަބުން ކުޅިވަރު ހަރަކާތްތައް ހުއްޓިފައި އޮތް މުއްދަތުގައި ބަޖެޓްގެ ތާށިކަމުގެ ތެރޭގައި ވެސް އިސްކަމެއް ދިނީ ކުޅިވަރު އިންފްރާސްޓްރަކްޗާ ތަރައްގީ ކުރަން ކަމަށެވެ. އެ ގޮތުން ކުރެވުނު އެންމެ ރަނގަޅު މަސައްކަތްތަކުގެ ތެރޭގައި މި ޕޫލް ބިލިއާޑް ފެސިލިޓީ ހިމެނިގެންދާނެ ކަމަށް މިނިސްޓަރު ވިދާޅުވި އެވެ.
ރޭގެ އިވެންޓްގެ ތެރެއިން ކޮލާ (ކ) އާއި މިނިސްޓަރު މަހުލޫފް.-- ފޮޓޯ: އަބްދުﷲ އަބީދު
މިނިސްޓަރެއްގެ މަގާމަށް ވަޑައިނުގަންނަވަނީސް ވެސް ބިލިއާޑް ހޯލަށް އިވެންޓެއް ޝަރަފްވެރިކުރަން އައުމުގެ ފުރުސަތު ލިބުނު ކަމަށް މަހުލޫފް ވިދާޅުވި އެވެ. އޭރު ހަތަރު ވަރަކަށް މޭޒު ބަހައްޓައިގެން ބިލިއާޑް އެސޯސިއޭޝަނުން މި ކުޅިވަރު ތަރައްގީކުރަން ކުރި މަސައްކަތަށް މިއަދު ބޮޑު ކަމެއް ކޮށްދެވުމަކީ ހަގީގަތުގައި ވެސް ލިބޭ އުފަލެއް ކަމަށް މިނިސްޓަރު ވިދާޅުވި އެވެ.
"އަޅުގަނޑުމެންނަށް މި މަސައްކަތް ހަގީގަތުގައި މި ކުރެވެނީ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ކުޅިވަރަށްޓަކައި އެ ދެއްވާ ހާއްސަ އަހައްމިއްޔަތުގެ ސަބަބުން،" މިނިސްޓަރު ވިދާޅުވި އެވެ.
ރޭގެ އިވެންޓުގައި ވާހަކަ ދައްކަމުން ޓްރިކްޝޮޓް ލެޖެންޑް ކޮލާ ބުނީ ހަގީގަތުގައި ވެސް މި ފެސިލިޓީ އަކީ ބިލިއާޑްގައި ބަޔަކަށް ލިބޭނެ އެންމެ ފުރިހަމަ އެއް އިންފްރާސްޓްރަކްޗާ ކަމަށެވެ. އަދި ރާއްޖެ ކަހަލަ ގައުމެއްގައި މި ފަދަ ފެސިލިޓީއެއް ހުޅުވުން މިއީ މި ކުޅިވަރަށް ވެސް ލިބޭނެ ކުރިއެރުމެއްގެ ގޮތުގައި ކޮލާ ދެކެ އެވެ.
"އަހަރެން އެދެނީ މި ފެސިލިޓީގައި ކުޅެގެން ރާއްޖޭގެ ކުޅުންތެރިން ފުރަތަމަ އޭޝިއާގެ ލެވަލްގައި ކުރިއަރައި ދުނިޔޭގެ ލެވަލްގައި ވެސް ކުރިއަށް ދިއުން،" ވެނަމްގެ ނަމުން މަޝްހޫރުވެފައިވާ ކޮލާ ބުންޏެވެ.
ރޭގެ އިވެންޓްގެ ރަސްމީ ބަޔަކަށް ފަހު ކޮލާ ވަނީ އޭނާގެ އުކުޅުތައް ދައްކާލައިފަ އެވެ.
މިދިޔަ ނޮވެމްބަރު މަހު ވަނީ ހުޅުމާލޭ ސްޕޯޓްސް ކޮމްޕްލެކްސްގައި ހެދި ބިލިއާޑް ހައުސް ވެސް ހުޅުވައިފަ އެވެ.
މާލޭގައި ތަރައްގީކުރި މި ބިލިއާޑް ފެސިލިޓީގައި 12 މޭޒު ވަނީ ބަހައްޓައިފަ އެވެ. ރޭގެ އިވެންޓުގައި އެމްޕީބީއޭ އިން ވަނީ އެ އެސޯސިއޭޝަންގެ ރަސްމީ ވެބްސައިޓާއި ބުކިން އެޕްލިކޭޝަން ރަސްމީކޮށް ލޯންޗްކޮށްފަ އެވެ. އާ ވެބްސައިޓާއި އެޕްލިކޭޝަނާ އެކު ކުޅުންތެރިންގެ މައުލޫމާތާއި ކުޅެން ބޭނުންވާ ކުޅުންތެރިންނަށް އެތައް ފަސޭހަތަކެއް ލިބޭނެ އެވެ.
