ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމްގެ މައްޗަށް ތުހުމަތު ކުރި މަނީ ލޯންޑްރިންގެ މައްސަލައިގައި އޭނާގެ މައްޗަށް ދައުވާ ނުކުރަން ނިންމައި ފުލުހުން މައްސަލަ ފައިލް ކޮށްފި އެވެ.
ހައިލަމްގެ މައްޗަށް މަނީ ލޯންޑްރިންގެ ތުހުމަތު ކުރީ އޭނާ ފަނޑިޔާރަކަށް ހުންނަވަނިކޮށް ފޭދޫ ދާއިރާގެ ކުރީގެ މަޖިލިސް މެމްބަރު އަލްހާން ފަހުމީ ހައިލަމްގެ އެކައުންޓަށް 2019 ވަނަ އަހަރުގެ މެއި މަހު ދެ ލައްކަ ރުފިޔާ ފޮނުވުމުންނެވެ.
ފުލުހުންގެ މީޑިއާ އޮފިޝަލް މިއަދު "އަދަދު" އަށް ވިދާޅުވީ މައްސަލައިގެ ތަހުގީގު ނިންމައި ދައުވާ ކޮށްދިނުމަށް އެދި ޕްރޮސިކިއުޓާ ޖެނެރަލްއަށް ފޮނުވުމުން ދައުވާ ކުރެވޭ ވަރަށް ހެތްކާއި ގަރީނާ ނެތް ކަމަށް ފެންނާތީ މައްސަލަ އަނބުރާ ފުލުހަށް ފޮނުވާލާފައިވާ ކަމަށެވެ.
އެހެންވެ އެ މައްސަލަ މިހާރު ވަނީ ފައިލް ކޮށްފައި ކަމަށް އޭނާ ވިދާޅުވި އެވެ.
އެ މައްސަލަ ފުލުހުން ބަލަން ފެށުމުން އޭރު ހައިލަމް ވިދާޅުވީ ރައްޓެއްސެއްގެ އަތުން އަނބުރާ ދައްކާ ގޮތަށް ފާޅުކަން ބޮޑު ގޮތެއްގައި ދެ ލައްކަ ރުފިޔާ ޓްރާންސްފާ ކުރުމުން މަނީ ލޯންޑާ ކުރިކަމަށް ތުހުމަތު ކުރީ ކަމަށެވެ. އަދި އެހެން ބުނެ ބިރެއް ނުދެއްކޭނެ ކަމަށް އޭނާ ވިދާޅުވެފައިވެ އެވެ.
ކްރިމިނަލް ކޯޓުގެ އިސް ގާޒީ ކަމުން ހައިލަމް އިސްތިއުފާ ދެއްވީ ނަސްރުގެ ދުވަސް ފާހަގަ ކުރުމުގެ ގޮތުން އޭނާ ފޮނުއްވި މެސެޖެއްގައި ހިމެނޭ ކުރެހުމެއްގެ ސަބަބުން އޭނާގެ މައްސަލަ ޖޭއެސްސީއިން ބަލަން ފެށުމުންނެވެ. ހައިލަމް ފޮނުވި މެސެޖްގައިވާ ކުރެހުމުން ފެންނަނީ ރައީސް އިބްރާހިމް މުހައްމަދު ސޯލިހާއި މަޖިލީހުގެ ރައީސް މުހައްމަދު ނަޝީދާއި އިތުރު ބައެއްގެ ކަރުގައި ވާ ޖަހައިފައިވާ ތަނެވެ.
