މެދުފަންތީގެ އާއިލާތަކަށް ހާއްސަކޮށްގެން ހުޅުމާލޭގައި 120 އެޕާޓްމަންޓުގެ ބިންގާ އިއްޔެ އަޅައިފި އެވެ.
އިންޑިއާގެ ސެންޑަލް މޮރިޝަސް ކުންފުންޏާ ހަވާލުކޮށްފައިވާ "ވަން ސެންޓްރަލް ޕާކް" މަޝްރޫއު އަލުން މި ފެށީ ފަސް އަހަރު ފަހުންނެވެ. މި ހައުސިން ޕްރޮޖެކްޓް ހިންގަން އެ ކުންފުންޏާ އެކު ސަރުކާރުން ފުރަތަމަ ސޮއި ކުރީ މާޗު 19، 2015ގަ އެވެ. އެކަމަކު އެކި ސަބަބުތަކާ ހެދި ހުއްޓިފައި އޮތުމަށް ފަހު ފްލެޓް އެޅުމުގެ ބިން ހަވާލުކުރީ އޮކްޓޫބަރު، 8، 2020ގަ އެވެ.
މި އެޕާޓްމަންޓް ކޮމްޕްލެކްސްގެ ބިންގާ އެޅުމުގެ ރަސްމިއްޔާތުގައި، މިއީ ނުފެށި ގިނަ ދުވަސްތަކެއްވެފައި އޮތް މަޝްރޫއެއް ކަން ހައުސިން މިނިސްޓަރު އަސްލަމް ވެސް ފާހަގަކުރެއްވި އެވެ. މި މަޝްރޫއުގައި ފުރަތަމަ ސޮއިކުރެއްވީ އޭނާ ހައުސިން މިނިސްޓަރަކަށް ހުންނެވިއިރެވެ.
މިއީ ސަރުކާރުގެ ބޯހިޔާވަހިކަމުގެ މަސައްކަތުގެ ތެރެއިން ގެންގުޅޭ މިކްސްޑް ރެސިޑެންޝަލް ޑިވެލޮޕްމަންޓްސް ތަރައްގީ ކުރުމުގެ ސިޔާސަތުގެ ދަށުން ހިންގާ ޕްރޮޖެކްޓެއް ކަމަށް މިނިސްޓަރު ވިދާޅުވި އެވެ.
އެޕާާޓްމަންޓުތައް ވިއްކަނީ ފުރަތަމަ ގެޔެއް/އެޕާޓްމަންޓެއް ގަންނަ ފަރާތްތަކަށް
ސެންޑަލް މޮރިޝަސްއާ ހައުސިން މިނިސްޓްރީއާ އެކު ވެފައިވާ އެއްބަސްވުމުގެ ދަށުން މިތަނުގައި ތަރައްގީކުރާ 120 އެޕާޓްމަންޓު ވިއްކަން ޖެހެނީ ފުރަތަމަ ފަހަރަށް ގެއެއް ނުވަތަ އެޕާޓްމަންޓެއް ގަންނަ ފަރާތްތަކަށެވެ.
ވަން ސެެންޓްރަލް ޕާކުގެ ބިންގާ އެޅުމުގެ ރަސްމިއްޔާތު -- ފޮޓޯ: ހުސެއިން ވަހީދު/އަދަދު
މެދުފަންތީގެ އާއިލާތަކަށް އަމާޒުކުރާ މި މަޝްރޫއުގައި އެޕާޓްމަންޓެއްގެ ވިއްކަން ފަށާ އަގަކީ ދެ މިލިއަން ރުފިޔާ އެވެ.
ސެންޑަލް މޮރިޝަސް ކުންފުނީގެ މެނޭޖިން ޑިރެކްޓަރު ނީރަޖް ގުޕްތާ ވިދާޅުވީ، މިހާރު ވެސް 75 ޕަސެންޓު އެޕާޓްމަންޓުގެ ބުކިން ހައްދާފައިވާ ކަމަށެވެ. އެކަމަކު އަދި އެއްވެސް މީހެއްގެ އަތުން ބުކިން ފީއެއް ނުވަތަ އެ ނޫން ވެސް ފައިސާއެއް ވެސް ނުނަގަ އެވެ. މިކަމުން ވެސް އަންގައިދެނީ އެ މަޝްރޫއާ މެދު ކުރާ އިތުރާބު ކަަމަށް އޭނާ ވިދާޅުވި އެވެ.
މި ޕްރޮޖެކްޓުގެ ކޮންޓްރެކްޓަރަކީ ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އެވެ. އެ ކުންފުނިން ލަފާކުރަނީ އެޕާޓްމަންޓުތައް ފެބްރުއަރީ، 2023 ގައި ހަވާލުކުރެވޭ ވަރު ވާނެ ކަަމަށެވެ.
