ޕީޕީއެމްގެ އޮފީސް ކުރިމަތީގައި މިރޭ ބޭއްވި އެއްވުން ފުލުހުން ރޫޅާލި ގޮތުން ސަޕޯޓަރުންތަކަކަށް އަނިޔާވެގެން ހޮސްޕިޓަލަށް ގެންގޮސް ފަރުވާދީފައިވާ ކަމަށް އިދިކޮޅު ޕްރޮގްރެސިވް ކޮންގްރެސް ކޯލިޝަނުން ބުނެފި އެވެ.
މައުލޫމާތު ލިބިފައިވާ ގޮތުގައި މި މުޒާހަރާގެ ތެރެއިން 14 މީހަކަށް އަނިޔާ ވެގެން ހޮސްޕިޓަލަށް ގެންދިޔަ އެވެ.
"އަދަދު" އަށް ލިބިފައިވާ މުޒާހަރާގެ ފޮޓޯތަކުން ފެންނަ ގޮތުގައި ބައެއް މީހުންނަށް އެކިވަރުގެ އަނިޔާތައް ލިބިފައިވެ އެވެ. އެއް ފޮޓޯ އިން މީހެއްގެ ނޭފަތުން ގިނަ އަދަދެއްގެ ލޭ ބޭރުވެފައިވާ ތަން ވެސް ފެނެ އެވެ.
އިދިކޮޅު ކޯލިޝަންގެ ހަރަކާތްތަކުގައި އިސްކޮށް އުޅުއްވާ ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު އިސްމާއިލް ޗެނަލް 13ގައި ވިދާޅުވީ، ސަޕޯޓަރުންނަށް އަނިޔާވީ ފުލުހުންގެ ސަބަބުން ކަމަށެވެ. ޕެޕާ ސްޕްރޭ ޖެހުމުގެ އިތުރުން ހާލަތާ ނުބައްދަލު ބާރުގެ ބޭނުންކޮށްފައިވާ ކަމަށް އޭނާ ތުހުމަތު ކުރެއްވި އެވެ.
މުޒާހަރާގައި އަނިޔާވެގެން ހޮސްޕިޓަލަށް ގެންދިޔަ ބައެއް މީހުން ވަނީ ފަރުވާއަށް ފަހު ދޫކޮށްލައިފަ އެވެ.
އިދިކޮޅުން ސިލްސިލާކޮށް ކުރިއަށް ގެންދާ މި މުޒާހަރާތަކަކީ، މާފުށީ ޖަލުގައި ހުކުމް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން ގެއަށް މިނިވަންކުރަން ގޮވާލައި ބާއްވާ އެއްވުންތަކެކެވެ. އިދިކޮޅުން ތުހުމަތުކުރާ ގޮތުގައި އެމަނިކުފާނަށް ފަސް އަހަރުގެ ހުކުމެއް އިއްވައި ޖަލަށް ލާފައި ވަނީ ނުހައްގުންނެވެ.
