ކުޑަ އަންހެން ކުއްޖަކަށް ޖިންސީ ގޯނާކުރި ކަމަށް ތުހުމަތުގައި ދިވެއްސަކު ހައްޔަރުކޮށްފި އެވެ.
ފުލުހުން ބުނި ގޮތުގައި އެ ތުހުމަތުގައި ހައްޔަރުކޮށްފައިވަނީ 24 އަހަރުގެ ދިވެހި ފިރިހެނެކެވެ. އޭނާގެ ބަންދު ޖެހުމަށް އަދި ކޯޓަށް ހާޒިރެއް ނުކުރެ އެވެ.
ފުލުހުން އިއްޔެ ބުނީ ތިން އަހަރު ކުއްޖާއަށް ޖިންސީގޯނާކުރި ކަމަށް ތުހުމަތުކުރެވޭ މައްސަލަ ސީރިއަސްކޮށް ބަލަމުން އަންނަ ކަމަށެވެ. އެ ކުއްޖާއަށް އެއްވެސް ކަހަލަ އަނިޔާއެއް ލިބިފައިވޭތޯ ބަލަން ޑޮކްޓަރަށް ވެސް ވަނީ ދައްކައިފަ އެވެ. އެކަމަކު އަނިޔާއެއް ލިބިފައިވޭތޯ ނުވަތަ ނޫންތޯ އަދި ނުބުނެ އެވެ.
ނަފްސާނީ ގޮތުން އަސަރެއްކޮށްފައިވޭތޯ ބަލަން ސައިކޮލޮޖިސްޓަކަށް ދައްކައި ރިޕޯޓު އަންނަނީ ތައްޔާރުކުރަމުންނެވެ. މައްސަލައާ ގުޅުން ހުރި އެހެން ކަންކަން ވެސް ބަލަމުން އަންނައިރު އެ ކުއްޖާއަށް ރައްކާތެރިކަން ކަށަވަރުކުރަން ކުރަން ޖެހޭ ކަންކަން ޗައިލްޑް އެންޑް ފެމިލީ ޕްރޮޓެކްޝަންސް ސާވިސްއާ ގުޅިގެން އަންނަނީ ކުރަމުންނެވެ.
"މި މައްސަލައަކީ ސީރިއަސް މައްސަލައަކަށްވާތީ ތަހުގީގަށް ބޭނުންވާ ހެއްކާއި ގަރީނާ ހޯދުމަށް ކުރަން ޖެހޭ މަސައްކަތްތައް ކުރަމުންދާނެ ކަމުގައި ދަންނަވަމެވެ،" ފުލުހުން މި މައްސަލާގައި ނެރުނު ބަޔާނުގައިވެ އެވެ.
ފުލުހުން ޔަގީންކަން ދޭ ގޮތުގައި މި މައްސަލައާ ގުޅިގެން އަޅަން ޖެހޭ ފިޔަވަޅުތައް ލަސްނުކޮށް އަޅާނެ އެވެ.
ކުޑަކުދިންނާ މެދު ހިންގާ އެކި ބާވަތުގެ އަނިޔާގެ މައްސަލަތައް ސީރިއަސް މައްސަލަތަކެއްގެ ގޮތުގައި ތަހުގީގު ކުރާނެތީ އެ ބާވާތުގެ އެއްވެސް މައްސަލައެއް ލިބިއްޖެ ނަމަ ލަސްނުކޮށް އަންގަން ވެސް އެދިފައިވެ އެވެ. ޗައިލްޑް ޕްރޮޓެކްޝަން ސާވިސަސްގެ ހިލޭ ގުޅޭ ނަމްބަރަކީ 1412 އެވެ.
