މަނީލޯންޑްރިންގެ ކުށް ސާބިތުވެ ފަސް އަހަރަށް ޖަލަށް ލައިފައިވާ ކުރީގެ ރައީސް އަބްދުﷲ ޔާމީން މިނިވަން ކުރަން ގޮވާލައި އިދިކޮޅު ކޯލިޝަނުން މިރޭ މުޒާހަރާ ކޮށްފި އެވެ.
ޔާމީން ޖަލު ބަންދުގައި ހުންނަވާތާ 500 އަށް ވުރެ ގިނަ ދުވަސްވުމާ ގުޅިގެން ބޭއްވި މުޒާހަރާ އޮތީ ބޮޑުތަކުރުފާނުމަގުގައި ހުންނަ ޕީޕީއެމް އޮފީސް ކުރިމަތީގަ އެވެ.
މުޒާހަރާ ފަށަންވާއިރު ފުލުހުން ވަނީ މުޒާހަރާގެ ބައިވެރިން ކުރިއަށް ނުދެވޭ ގޮތަށް އާޓިފިޝަލް ބީޗާ ދިމާލުން މަޖީދީމަގުގެ ކަންމައްޗާއި ބޮޑުތަކުރުފާނު މަގުން ރާޅުގަނޑު ސަރަހައްދުގައި ބެރިކޭޑް ޖަހައި ބަންދު ކޮށްފަ އެވެ.
ގިނަ ބަޔަކު ބައިވެރިވި މުޒާހަރާގެ ބައިވެރިންނަށް ކުރިއަށް ނުދެވުމުން އެ މީހުން އަޑުއުފުލީ ޕީޕީއެމް އޮފީސް ދޮރުމަތީގައިތިބެ އެވެ. ޕީޕީއެމްގެ ދިދަ ހިފައިގެން މުޒާހަރާގެ ބައިވެރިން ތިބީ ޔާމީންގެ މޫނުގެ ކުރެހުމެއް ހިމެނޭ މާސްކްތަކެއް އަޅައިގެންނެވެ.
ޔާމީން އަބްދުލްގައްޔޫމް ގެކޮޅަށް ބަދަލު ކުރުމަށް ކުރަން ޖެހޭ މަޝްވަރާތައް ކުރައްވަމުން ގެންދަވާ ކަމަށް ރައީސް އިބްރާހިމް މުހައްމަދު ސޯލިހު ވަރަށް ފަހުން ވިދާޅުވި ނަމަވެސް އެކަމަށް އަމަލީ އެއްވެސް ސިފައެއް ނާންނާތީ މުޒާހަރާގެ ބައިވެރިން ކަންބޮޑުވުން ފާޅުކުރި އެވެ.
މިރޭ 10:00 ކަންހާއިރު ފެށި މުޒާހަރާ ގަޑިއެއްހާއިރު ތެރޭގައި ނިންމާލީ މާދަމާ އިރުއޮއްސި 6:00 ގެ ކުރިން ޔާމީން މިނިވަން ނުކޮށްފި ނަމަ އަލުން މުޒާހަރާ ކުރާނެ ކަމުގެ އިންޒާރު ދެމުންނެވެ.
ގިނަ ފުލުހުންތަކެއް އެ ސަރަހައްދުގައި ހަރަކާތްތެރިވި ނަމަވެސް މިރޭ އެއްވެސް ކުރިމަތިލުމެއް ނުހިނގަ އެވެ. އަދި އެއްވެސް މީހަކު ހައްޔަރު ކޮށްފައެއްވެސް ނުވެ އެވެ.
