އޭޑީކޭ ހޮސްޕިޓަލުގައި ވިހެއިތާ ގަޑިއިރުތަކެއް ފަހުން މަރުވި، ސަލްމާ ނަސީރުގެ މަރުގެ މައްސަލައިގައި އެ ހޮސްޕިޓަލްގެ އިހުމާލު އޮތް ކަމަށް ބުނެ ބަދަލު ހޯދުމަށް ފިރިމީހާގެ ފަރާތުން ކޯޓަށް ދާން ނިންމައިފި އެވެ.
މިދިޔަ ފެބުރުއަރީ މަހުގެ ތެރޭގައި ސަލްމާ މަރުވި މައްސަލަ ބަލައި ހެލްތު މިނިސްޓްރީން އޭނާގެ ފިރިމީހާއަށް ފޮނުވި، ކުރު ތަހުގީގު ރިޕޯޓެއްގައި ބުނެފައި ވަނީ ވިހެއުމަށް ފަހު އަންހެންމީހާގެ ހަށިގަނޑުން ވަރަށް ގިނައިން ލޭ ބޭރުވި ނަމަވެސް, ހޮސްޕިޓަލުން ލޭ އަޅާފައި ވަނީ އޭނާ ވިހެއިތާ ތިން ގަޑިއިރު ފަހުން ކަމަށެވެ. އެކަމަކު ވިހެއުމުގެ ކުރިން ސަލްމާއަށް ލޭ ދޭނެ ދެ މީހަކު އާއިލާއިން ހަމަޖައްސައި، ކްރޮސްމެޗު ހެދި ކަމަށް ވެސް މިނިސްޓްރީގެ ރިޕޯޓުން އެނގެ އެވެ.
އެހެން ކަމުން ތަހުގީގު ރިޕޯޓުން ނިންމައިފައިވަނީ ސަލްމާގެ ގަޔަށް ލޭ އެޅުން ލަސްވި ކަމަށެވެ.
ސަލްމާގެ ފިރިމީހާ އިބްރާހިމް އަދުހަމްގެ ގާނޫނީ ވަކީލް އަދި ކުރީގެ ޕްރޮސިކިއުޓާ ޖެނެރަލް މުހުތާޒް މުހުސިން މިއަދު "އަދަދު"އަށް ވިދާޅުވީ, ސަލްމާ މަރުވީ އޭޑީކޭގެ އިހުމާލުން ކަމަށް ބެލެވޭތީ ޖިނާއީ އަދި މަދަނީ ނިޒާމުގެ ތެރެއިން ހައްލު ހޯދުމުގެ މަސައްކަތް ފަށައިފައިވާ ކަމަށެވެ.
އެހެން ކަމުން އެ މައްސަލަ ބަލައިދިނުމަށް އެދި ފުލުހަށާއި މޯލްޑިވްސް މެޑިކަލް ކައުންސިލަށް ހުށަހަޅަން ތައްޔާރުވަމުން އަންނަ ކަމަށް އޭނާ ވިދާޅުވި އެވެ. އަދި ސަލްމާގެ މަރުގެ ބަދަލު ހޯދުމަށް ސިވިލް ކޯޓަށް މިހަފްތާގެ ތެރޭގައި ހުށަހަޅާނެ ކަމަށް އޭނާ ވިދާޅުވި އެވެ.
"އޭޑީކޭގެ އިހުމާލުން މަރުވީމަ އެ މައްސަލަ ހުށަހަޅަން މި ނިންމީ. ބަދަލުގެ ގޮތުގައި އެދެނީ ކިހާވަރެއް ހޯދަން ކަމެއް އަޅުގަނޑުމެން ކުރިއަށް އޮތްތަނުގައި ނިންމާނަން،" މުހުތާޒް ވިދާޅުވި އެވެ.
ސިއްހީ އިހުމާލުތަކުގެ ސަބަބުން މީގެ ކުރިން ސުޕްރީމް ކޯޓުން ވެސް ބަދަލު ނަގައިދީފައި އެބަހުއްޓެވެ.
ހެލްތު މިނިސްޓްރީގެ ތަހުގީގާ ގުޅޭގޮތުން "އަދަދު"ން ސުވާލު ކުރުމުން އޭޑީކޭގެ މެނޭޖިން ޑިރެކްޓާ، އަހުމަދު އަފްއާލް އިއްޔެ ވިދާޅުވީ އެ މައްސަލާގައި ހެލްތު މިނިސްޓްރީއާ ބައްދަލުކޮށް އެ މިނިސްޓްރީގެ ހޯދުންތަކަށް އިންކާރު ކޮށްފައިވާ ކަމަށެވެ. ސަލްމާގެ ގަޔަށް ލޭ އެޅުމުގައި ލަސް ކޮށްފައި ނުވާނެ ކަމަށް އަފްއާލް ވިދާޅުވި އެވެ.
ހެލްތު މިނިސްޓްރީގެ ރިޕޯޓުގައި ބުނެފައިވަނީ ސަލްމާ ގަޔަށް އަޅަންޖެހޭ ލޭ ގެންނަން ބުނީ ވެސް އޭނާ ވިހެއިތާ އެއް ގަޑިއިރު ފަހުން ކަމަށާއި ލޭ ގެނައުމަށްފަހު ވެސް ވިހާ ކޮޓަރީގައި އޮތް ސަލްމާ ގަޔަށް ޑޮކްޓަރުން ލޭ އަޅާފައިނުވާ ކަމަށެވެ. ލޭ ގެނައީ ވެސް ސަލްމާގެ މޫނު މައްޗަށް އަނިދިރިވާން ފެށުމުންނެވެ.
ވިހެއުމަށްފަހު ލޭ ފައިބާތީ އޭގެ ސަބަބު ދަނެގަތުމަށް މަސައްކަތްކޮށް ލޭ މަނާ ކުރުމަށް ޑޮކްޓަރުން ބޭސް ދީފައިވެ އެވެ. އަދި ސަލްމާގެ ފުރާނަ ސަލާމަތް ކުރަން ރަހިމު ނަގަންޖެހިދާނެކަން އާއިލާއަށް ވެސް ޑޮކްޓަރުން އެންގި އެވެ. ސަލްމާ ގަޔަށް ލޭ އަޅާފައި ވަނީ އޭގެ ވެސް އެއް ގަޑިއިރު ފަހުންނެވެ.
ސަލްމާ ގަޔަށް އެންމެ ފަހުން ލޭ އަޅާފައި ވަނީ އޮޕަރޭޝަން ތިއޭޓަރަށް ވެއްދުމަށްފަހު އެވެ. އެއިރު ސަލްމާ ބުނަމުންދިޔައީ އޭނާއަށް ނޭވާލާން އުނދަގޫވަމުންދާ ކަމަށެވެ. އެއިރު ސަލްމާގެ ލޭގެ ޕްރެޝަރެއް ނެތެވެ. އަދި ވިންދު ހުރީ ވަރަށް މަތިކޮށް މިނެޓަކު 190 ގަ އެވެ.
ހެލްތު މިނިސްޓްރީގެ ތަހުގީގުން އެނގިގެން ދިޔައީ ސަލްމާ ހަށިގަނޑުން ލޭ ބޭރުވެފައިވާ މިންވަރު އޭޑީކޭގެ ލިޔެކިޔެމުން ފެންނަން ނެތް ކަމަށެވެ.
