ލޯކަލް ކައުންސިލް އިންތިހާބުގެ ކެމްޕެއިން އިވެންޓެއްގައި، ރައްޔިތުންގެ މަޖިލީހުގެ އުނގޫފާރު ދާއިރާގެ އެމްޑީޕީ މެމްބަރު މުހައްމަދު ވަހީދު (ވައްޑެ) ދެއްކެވި ވާހަކައަކާ ގުޅުވައިގެން އޭނާގެ ފުރާނަ ނުރައްކަލަށް ހުށަހެޅުމުގެ ނިޔަތުގައި ބައެއް ފަރާތްތަކުން ހިންގަމުންގެންދާ އަމަލުތައް ހަރުއަޑުން ކުށްވެރިކޮށް އެ މައްސަލަ ތަހުގީގުކޮށް ފިޔަވަޅު އެޅުމަށް ކަމާބެހޭ ފަރާތްތަކަށް އެމްޑީޕީގެ ޕާލިމެންޓްރީ ގްރޫޕުން ގޮވާލައިފި އެވެ.
އެމްޑީޕީގެ "ރަށްވެހި ފަތިސް" ކެމްޕެއިން އިވެންޓެއްގައި ކުރީ ސަރުކާރަށް ނިސްބަތްވާ ގޮތަށް ވައްޑެ ވިދާޅުވެފައިވަނީ "އަޅުގަނޑުމެންގެ މުޅި މިނިވަންކަން ނަގާލަމުން މީހުން މަރާން ވެގެން ގިސާސް ހިފާނަމޭ ކިޔައިގެން ކެބިނެޓަށް، މިއޮށް ގަރުނުގައި ކެބިނެޓަށް އެ އިންޖެކްޝަން ޖަހާލީމާ މަރުވާންދާއިރު ހަށިގަނޑަށް ވާންވާ ގޮތް ޕްރެޒެންޓޭޝަން ހަދައިގެންހުށަހެޅި ބަޔެއް، ސިކުބަޔެއްގެ ވާހަކަ މިދައްކަނީ، ސިކު ބަޔެއްގެ ވާހަކަ މިދައްކަނީ،" މިހެންނެވެ.
އެމްޑީޕީން ރޭ މެންދަމު ނެރުނު ބަޔާނެއްގައި ބުނީ އެ ވާހަކައިގައި ވައްޑެ ފާހަގަކުރެއްވި ނުކުތާ އަމާޒުކުރައްވާފައިވަނީ ދީނަށް ނުވަތަ ދީނީ ހުކުމަކަށް ނޫންކަމެވެ.
"އެއާހިލާފަށް އޭނާގެ ވާހަކަ އަމާޒުކުރައްވާފައިވަނީ މަރުގެ އަދަބު ދިނުމުގެ ނަމުގައި ކުރީގެ ސަރުކާރުގައި ތިބި ބަޔަކު ކަންކުރި ގޮތަކަށް ކަމަށްވާއިރު، އެވާހަކަ ގަސްދުގައި އޮޅުވާލައިގެން ބައެއް ދީނީ އިލްމުވެރިންނާއި، ބައެއް ސިޔާސީ މީހުންނާއި އަދި ބައެއް މީޑިއާތަކުން އެކަން ފިތުނައަކަށް ވާގޮތަށް ހެދުމުގެ ސަބަބުން، އޭނާގެ ފުރާނައަށް ނުރައްކާކުރުވުމަށް ބައެއް ފަރާތްތަކުން ގޮވާލަމުންދާކަން ކަންބޮޑުވުމާއެކު ފާހަގަކުރަމެވެ،" ބަޔާނުގައިވެ އެވެ.
އުނގޫފާރު ދާއިރާގެ ގޮނޑި ކުރިން ފުރުއްވި ދީނީ އިލްމުވެރިޔާ ޑރ. އަފްރާޝީމް އަލީ ވެސް އަނިޔާވެރި ގޮތަކަށް އަވަހާރަކޮށްލާފައިވާކަން ފާހަގަކޮށް އެ ބަޔާނުގައި ބުނެފައިވާ ގޮތުގައި ތަހުގީގުތަކުން ދައްކާގޮތުގައި އަފްރާޝީމް އަވަހާރަކޮށްލާފައިވަނީ ވެސް ދީނުގެ ނަމުގައި ހައްދުފަހަނާޅާފައިވާ ބަޔަކު ހިންގަމުންދާ ހަރަކާތްތަކެއްގެ ތެރެއިންނެވެ. އަދި މުރުތައްދުވެ، ދީނުން ބޭރުވެއްޖެކަމަށް ބުނެ އަމިއްލައަށް ގޮތްތައް ނިންމައިގެން ދީނުގެ ނަމުގައި އެހެން ފަރާތްތަކެއް ވެސް ވަނީ ރާއްޖޭގައި ގަތުލުކޮށްފައިވާކަން ބަޔާނުގައި ފާހަގަކޮށްފައިވެ އެވެ.
މިކަމާ ބެހޭގޮތުން ވައްޑެ ވިދާޅުވީ، އޭނާ ދެއްކެވީ އަބުރު ގާނޫނު ހަދައިގެން ރައީސް ޔާމީނުގެ ވެރިކަމުގައި އެތައް ބަޔަކަށް ބޮޑެތި ދައުވާތައް އުފުލައި، އާއްމު ރައްޔިތުން ބިރުގަންނަވައި، އަދި އިތުރަށް ބިރު ގަންނަވަން މަރުގެ އަދަބު ދޭގޮތާއި ތަންފީޒުކުރާ ގޮތް ހަރަކާތާއެކު ކެބިނެޓަށް ހުށައަޅައިގެން ހޭންތިބި ‘ސިކު’ މީހުންގެ ވާހަކަ ކަމަށެވެ.
"އަދި އެ ބިރު ގެންނެވުމުގެ ތެރެއިން [ހަމައެކަނި ފާޑުކިޔައިގެން] އެތައް ފަހަރަކު، އެތައް ދުވަހެއް ޖަލުގައި ބޭއްވި މީހެއް އަޅުގަނޑަކީ،" ވައްޑެ ފޭސްބުކުގައި ލިޔުއްވާފައިވެ އެވެ.
ވައްޑެއް ލިޔުއްވާފައިވާ ގޮތުގައި އޮޅުމެއް އަރާކަމަށްވާނަމަ، އަލުން ވާހަކަ އަޑުއަހާލުން ވަރަށް އެދޭ ކަމަށާއި ދެއްކި ވާހަކަ އެންމެނަށް ފެންނަން ހުންނާނެ ކަމަށާއި އަދި އެ ވާހަކަ ދެއްކެވީ އެތައް ބައެއް ކުރިމަތީ ކަމަށެވެ.
"ސިއްރަކުން ކުރި ކަމެއްވެސް ނޫން އެއީކީ. ކަންކަމުގެ ދެކޮޅު ހޯދާ ބައްލަވާފައި ލިޔުއްވާ. އަދި އަމުދުން ކީރިތި ޤުރުއާނުގެ އާޔަތްތައް ތިޔަގޮތަށް މީހުން ގައިގާ ތަޅަން ބޭނުންކުރާ ހަތިޔާރަކަށް ނުހައްދަވާ މާތްالله އަށް ބިރުވެތިވެލައްވާ!،" ވައްޑެ ލިޔުއްވާފައިވެ އެވެ.
"އަދި ހަމައެހެންމެ، އަޅުގަނޑުގެ ވާހަކައިގެ ކުދިކުދި ތަންކޮޅުކޮޅު ކަނޑައިގެން ނަގައިގެން، މިބޮޑު ރޯދަމަހު ފިތުނަ ފަސާދަ އުފައްދަން ނޫޅުއްވުން އެދެން. އަދި އަބަދާއިއަބަދު މީހުން ދީނުން ބޭރުކޮށް، ކުފުރުކޮށް، ޚަވާރިޖުންގެ މަގަށް މީސްތަކުން ލަންބުވަން ނޫޅުއްވުމަށް ނަސޭހަތްތެރިވަން."
އެމްޑީޕީގެ ޕާލިމެންޓްރީ ގްރޫޕުން ވަނީ ވައްޑެއް ދެއްކެވި ވާހަކަ ގަސްދުގައި އޮޅުވާލައި ފިތުނަ އުފައްދައިގެން އޭނާގެ ފުރާނަ ނުރައްކަލަށް ހުށަހެޅުމުގެ ނިޔަތުގައި ޢަމަލުކުރާ ފަރާތްތަކުން އެކަން ވަގުތުން ހުއްޓާލުމަށް ގޮވާލާ ކަމަށެވެ.
"އަދި މިކަމުގައި ހުރި ނުރައްކާ ބޮޑުކަމަށްޓަކައި މިފަދަ މައްސަލަތައް ވަގުތުން ތަހުގީގުކުރައްވައި ފިޔަވަޅުއެޅުއްވުމަށް ދައުލަތުގެ ކަމާބެހޭ މުއައްސަސާތަކަށް ގޮވާލަމެވެ،" ބަޔާން ނިންމާލާފައިވެ އެވެ.
