އިންޓަނެޓުގެ އަގު ހެޔޮކުރަން ސަރުކާރުން ވީ ވައުދު ލަސްވެ ޝަކުވާ ބޮޑުވެފައި ވަނިކޮށް، އަގަށް ހެޔޮ ބަދަލުތަކެއް ކުރިއަށް އޮތް ދުވަސްތަކުގައި ގެންނަވާނެ ކަމުގެ ޔަގީންކަން އިކޮނޮމިކް މިނިސްޓަރު ފައްޔާޒް އިސްމާއިލް މިރޭ ދެއްވައިފި އެވެ.
ސައިންސް އެންޑް ޓެކްނޮލޮޖީ މިނިސްޓްރީ ހިންގެވުމާ ހަވާލުވެ ހުންނެވި ފައްޔާޒް މި އުއްމީދު އާ ކޮށްދެއްވީ އިންޓަނެޓުގެ އަގު ސަރުކާރުން ހެޔޮކޮށްދީފައިވާ ކަމަށް ޑެޕިއުޓީ މިނިސްޓަރު އަލީ ސޯލިހް ވިދާޅުވުމުން އާއްމުންގެ ފާޑުކިއުން އަމާޒުވެފައި ވަނިކޮށެވެ.
އަލީ ސޯލިހް ވިދާޅުވި ގޮތުގައި އިންޓަނެޓުގެ އަގު ވެސް ހުރީ ރައްޔިތުންގެ އަތްފޯރާފަށަށް ތިރިކޮށްދީފަ އެވެ. އެހެން ގައުމުތަކާ އަޅާބަލާއިރު ރާއްޖޭގެ އަގުތައް ހެޔޮކަމަށް އޭނާ ވިދާޅުވި އެވެ. މި ފަހުން އިންޓަނެޓުގެ އަގަށް އައި ބަދަލުތައް ރާއްޖެ ޓީވީގެ ޕްރޮގްރާމެއްގައި އަލީ ވިދާޅުވެދެއްވިއިރު އެއީ ސަރުކާރުން ގެނައި ބަދަލެއް ނޫނެވެ.
އޭނާ އިޝާރާތް ކުރެއްވީ ދިރާގާއި އުރީދޫން ރޯދަ މަހަށް ހާއްސަކޮށްގެންނާއި އެކި ޕްރޮމޯޝަންތަކުގައި އިންޓަނެޓުގެ އަގަށް ގެނެސްފައިވާ ބަދަލަށެވެ.
މިނިސްޓަރު ފައްޔާޒް ވެސް ފާހަގަކުރެއްވި ގޮތުގައި އިންޓަނެޓުގެ އަގު ކޮންމެވެސް މިންވަރަކަށް ދަށްވީ ސަރުކާރުގެ ބައިވެރިވުން އޮވެގެން ނޫނެވެ. އެކަމަކު އިންޓަނެޓުގެ އަގު ހެޔޮކުރުމަކީ ސަރުކާރުން ކުރަމުން އަންނަ މަސައްކަތެއް ކަމަށް ވިދާޅުވި އެވެ.
އޭނާ ވިދާޅުވި ގޮތުގައި ކުރިއަށް އޮތް ދުވަސްތަކުގައި ބަދަލުތަކެއް ގެންނާނެ އެވެ.
އިންޓަނެޓުގެ އަގު ހެޔޮކުރުމަކީ ރައީސް އިބްރާހިމް މުހައްމަދު ސޯލިހްގެ ވައުދެކެވެ. އެ ވައުދު ފުއްދޭނެ ކަމަށް ރައީސް އޮފީހުން އެންމެ ފަހުން އާއްމުކުރި މައުލޫމާތަށް ބަލާއިރު ލަފާކުރެވެނީ ކުރިއަށް އޮތް ދެ އަހަރުގެ ތެރޭގަ އެވެ.
އިތުބާރު ނެތް ކަމުގެ ވޯޓަކުން މަގާމުން ދުރުކޮށްފައިވާ ކުރީގެ މިނިސްޓަރު މަލީހް ޖަމާލް ހުންނެވިއިރު ވެސް އެ މިނިސްޓްރީއާ މެދު އޮންނަ އެންމެ ބޮޑު ޝަކުވާއަކީ އިންޓަނެޓުގެ އަގު ހެޔޮ ނުކުރުމެވެ. އޭނާ ވިދާޅުވަމުން ގެންދެވީ އަގު ހެޔޮކުރަން އެ މިނިސްޓްރީން ކުރަން ޖެހޭ ކަންކަން ނިންމައި ރައީސް އޮފީހަށް ފޮނުވާފައިވާ ކަމަށެވެ.
