ކޮމިޝަނާ އޮފް ޕޮލިސް މުހައްމަދު ހަމީދު ކޮވިޑަށް ޕޮޒިޓިވް ވުމުން ފުލުހުންގެ ގިނަ އޮފިސަރުންތަކެއް ކޮވިޑަށް އިއްޔެ ޓެސްޓް ކޮށްފި އެވެ.
ސީޕީ ހަމީދު ކޮވިޑަށް ޕޮޒިޓިވްވިކަން އިއްޔެ ހާމަ ކުރައްވާފައިވާއިރު އޭނާ ހުންނެވީ ގޭގައި އައިސޮލޭޝަންގަ އެވެ. އަލަށް އެކުލަވާލި ފުލުހުންގެ ބޯޑުގެ ފުރަތަމަ ބައްދަލުވުމުގައި ވެސް ބައިވެރިވެ ވަޑައިގަތީ އޮންލައިންކޮށެވެ.
"އަދަދު" އަށް އެނގިފައިވާގޮތުގައި ހަމީދު ޕޮޒިޓިވްވުމާ ގުޅިގެން ޑެޕިއުޓީ ކޮމިޝަނާއިންނާއި އެސިސްޓެންޓް ކޮމިޝަނާއިން ހިމެނޭގޮތަށް ފުލުހުންގެ އިސްވެރިންތަކެއް އިއްޔެ ވަނީ ކޮވިޑަށް ޓެސްޓް ކޮށްފަ އެވެ. އެ ބޭފުޅުންގެ ނަތީޖާ އަދި ނުލިބެ އެވެ.
ހަމީދުއާ ކޮންޓެކްޓް ވެގެން ފުލުހުންގެ އިސްވެރިންތަކެއް ކަރަންޓީން ވާން ޖެހުނު ކަމެއް ނުވަތަ ނޫން ކަމެއް އަދި ނޭނގެ އެވެ.
އެކަމާ ގުޅޭގޮތުން ފުލުހުންގެ ރަސްމީ ބަހެއް އަދި ވަނީ ލިބޭ ގޮތް ނުވެފަ އެވެ.
ސީޕީ ހަމީދުގެ އިތުރުން ރައީސް އިބްރާހިމް މުހައްމަދު ސޯލިހުގެ އަނބިކަނބަލުން ފަޒްނާ އަހުމަދު ވެސް ވަނީ ކޮވިޑަށް ޕޮޒިޓިވް ވެފަ އެވެ. ހަމީދު ކައިވެނިބައްލަވައިގެން އުޅުއްވަނީ ފަޒްނާގެ ކޮއްކޯފުޅު، ނަޒީހާ އަހުމަދާ އެވެ.
ފަޒްނާ އާއި ހަމީދު ވެސް ޕޮޒިޓިވް ވީ ވެކްސިންގެ ދެ ވަނަ ޑޯޒް ފުރިހަމަ ކުރެއްވި ފަހުންނެވެ.
