ކޮވިޑަށް ޕޮޒިޓިވްވެފައިވާ ކޮމިޝަނާ އޮފް ޕޮލިސް މުހައްމަދު ހަމީދު މިއަދު ބޭއްވި ފުލުހުންގެ ބޯޑުގެ ފުރަތަމަ ބައްދަލުވުމުގައި އޮންލައިންކޮށް ބައިވެރިވެވަޑައިގެންފި އެވެ.
ފުލުހުންނާ ގުޅޭ ކަންކަމުގައި ގިނަ ބާރުތަކެއް ދީފައިވާ ބޯޑުގެ ބައްދަލުވުމުގައި އޮންލައިންކޮށް ބައިވެރިވެ ވަޑައިގެން އިންނަވަނިކޮށް ނަގައިފައިވާ ފޮޓޯއެއް ޓްވީޓް ކުރައްވައި ސީޕީ ހަމީދު ވިދާޅުވީ އެ ބޯޑުގެ މެމްބަރުންނަށް މަރުހަބާ ދަންނަވާ ކަމަށެވެ.
އެ ބޯޑަކީ ފުލުހުންގެ ހިދުމަތް އިތުރަށް ހަރުދަނާކޮށް މުއައްސަސާ ޖަވާބުދާރީ ކުރުމުގެ މުހިންމު ބައިވެރިއެއް ކަމަށް ވެސް ހަމީދު ވިދާޅުވި އެވެ.
ހަމީދު ކޮވިޑަށް ޕޮޒިޓިވްވީ ކޮން ދުވަހަކު ކަމެއް އަދި އޭނާއާ ބައްދަލުވެގެން ފުލުހުންގެ އިތުރު ވެރިންތަކެއް ކަރަންޓީންވާން ޖެހުނު ކަމެއް ނުވަތަ ނޫން ކަމެއް ވެސް އަދި ނޭންގެ އެވެ.
ސީޕީ ވަނީ މި މަހުގެ އަށްވަނަ ދުވަހު ކޮވިޑް ވެކްސިންގެ ދެވަނަ ޑޯޒް ވެސް ޖައްސަވާފަ އެވެ.
މިދިޔަ ހުކުރު ދުވަހު ރައީސް އިބްރާހިމް މުހައްމަދު ސޯލިހް އެކުލަވާލެއްވި، ފުލުހުންގެ ބޯޑަކީ ހަތް މެންބަރުންގެ މައްޗަށް އެކުލެވޭ ގޮތަށް އުފައްދާ ބޯޑެކެވެ. އޭގެ ތެރޭގައި ހިމެނެނީ ރައީސް އައްޔަން ކުރާ ދެ މެންބަރުންނާއި އާންމުންގެ ފަރާތުން ދެ މެންބަރުންނާއި ފަންނީ ތިން މެންބަރުންނެވެ.
ފުލުހުންގެ ބޯޑް މެމްބަރުން
- އަހުމަދު ފަޔާޟް ހަސަން، މ.ހަޒާރީވިލާ
- އާއިޝަތު ނޫރާ މުހައްމަދު، ހ.ނޫމުތީ
- އަލީ ފާއިޒު، މއ.މަނާގެ
- އަހުމަދު ނާޝިދު، މއ.ގޯލްޑަންމޫން
- އާދަމް އިބްރާހީމް، ގ.ޑިމްލައިޓް
- ހާމިދު އަބްދުލްޣަފޫރު، ހ.ޝޭޑީކޯނާ
- ސަފާ ޝަރީފް، ދެތަޑިމާގެ / ސ.ހުޅުދޫ
އަލަށް އުފެދިގެންދާ މި ބޯޑަކީ، ވަރަށް ބޮޑެތި ބާރުތަކެއް ލިބިގެންދާނެ ބޯޑެވެ. މިދިޔަ މަހު ފަހުކޮޅު އަމަލު ކުރަން ފެށި ފުލުހުންގެ އާ ގާނޫނުގެ ދަށުން ބޯޑަށް ކޮމިޝަނާ އޮފް ޕޮލިސް ފިޔަވައި އެހެން މަގާމުތަކުގެ ފުލުހުންގެ މައްސަލަތައް ބެލުމުގެ ބާރު ލިބެ އެވެ.
