ވެރިކަން ކުރާ މައި ޕާޓީ، އެމްޑީޕީގެ އޮފީހުގެ މައި ދޮރުގެ ބިއްލޫރި ގަނޑެއް ތަޅާލި މައްސަލައިގައި ތިން މީހަކު ހައްޔަރު ކޮށްފައިވާ ކަމަށް ފުލުހުން މިއަދު ބުނެފި އެވެ.
އަންގާރަ ދުވަހު އެމްޑީޕީ އޮފީހަށް ގެއްލުން ދީފައިވާ މައްސަލައިގައި ފުލުހުންގެ މީޑިއާ އޮފިޝަލް، "އަދަދު" އަށް ވިދާޅުވީ އިއްޔެ އާއި ރޭ ތިން މީހުން ހައްޔަރުކުރީ ކޯޓު އަމުރެއްގެ ދަށުން ކަމަށެވެ.
ހައްޔަރުކޮށްފައިވަނީ 23 އަހަރާއި 24 އަހަރާއި 36 އަހަރުގެ ދިވެހި ތިން ފިރިހެނުންނެވެ.
ޕޭމަންޓު ގަލަކުން ޖަހައި އެމްޑީޕީ އޮފީހުގެ ބޭރު ބިއްލޫރިގަނޑު ތަޅާލީ, މިދިޔަ ހޮނިހިރު ދުވަހު ބޭއްވި ލޯކަލް ކައުންސިލް އިންތިހާބުގެ ވަގުތީ ނަތީޖާ ކަށަވަރުނުވާ 18 ވޯޓު ފޮއްޓެއް އަލުން ގުނަން އުޅުމުން އިދިކޮޅާއި އެމްޑީޕީ ސަޕޯޓަރުންނާ ދެމެދު އަންގާރަ ދުވަހު ހިނގި ހަމަނުޖެހުންތަކަށް ފަހު އެވެ.
