ފަތުރުވެރިންގެ ޒިޔާރަތް ކުރާ ޓްރެންޑްތަކަށް ބަލާއިރު މި އަހަރު 1.5 މިލިއަން މީހުން ރާއްޖެ އަންނާނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެ އެވެ.
މިއަދު އެމެރިކާގެ ސީއެންބީސީ އިންޓަނޭޝަނަލް އަށް ދެއްވި އިންޓަވިއުއެއްގައި ޑރ. މައުސޫމް ވިދާޅުވީ ކުރިން އެއް މިލިއަން ފަތުރުވެރިން އަންނާނެކަމަށް އަންދާޒާކުރި ނަމަވެސް، މިހާރު ފަތުރުވެރިން އަންނަ އަދަދުތަކަށް ބަލާފައި އެ އަންދާޒާތައް އުފުލިފައިވާ ކަމަށެވެ.
ޑރ. މައުސޫމް އިތުރަށް ވިދާޅުވީ މިހާރު ރާއްޖެއަށް އަންނަ ފަތުރުވެރިންގެ ޗުއްޓީ ހޭދަކުރާ މުއްދަތު އިތުރުވަމުން އަންނަކަން ފާހަގަކުރެވޭ ކަމަށެވެ. އަދި މިހާރުގެ އާދަތަކަށް ބަލާއިރު މި އަހަރުގެ ތެރޭގައި 10 މިލިއަން ބެޑް ނައިޓްސްގެ އަމާޒަށް ވާސިލު ވެވޭނެ ކަމަށް ވިދާޅުވި އެވެ.
"ރާއްޖޭގައި ފަތުރުވެރިން ޗުއްޓީ ހޭދަކުރާ މުއްދަތު އިތުރުވެއްޖެ. އަދި މި އަހަރަށް ކަނޑައެޅި 10 މިލިއަން ބެޑް ނައިޓްސްގެ އަމާޒަށް ވާސިލު ވެވޭނެ" ޑރ. މައުސޫމް ވިދާޅުވި އެވެ.
ޓޫރިޒަމް މިނިސްޓްރީގެ ހިސާބުތަކަށް ބަލާއިރު ރާއްޖެއަށް ޒިޔާރަތްކުރާ ފަތުރުވެރިން އެވަރެޖްކޮށް ރާއްޖޭގައި ހޭދަކުރަނީ ގާތްގަނޑަކަށް އަށް ރެ އެވެ. މިއީ އެހެން އަހަރުތަކުގެ އެވަރެޖަށް ވުރެ އެއް ދުވަސް އިތުރު އަދަދެކެވެ.
ޑރ. މައުސޫމް ވިދާޅުވީ ފަތުރުވެރިކަމުގެ ސިނާއަތުގެ ޕާފޯމަންސް ރަނގަޅުވުމުގެ ސަބަބުން މި އަހަރު ދައުލަތުގެ އާމްދަނީ އިތުރުވުމަށް މަގުފަހިވާނެ ކަމަށެވެ. އަދި ރާއްޖޭގެ އިގްތިސާދަކީ ފަތުރުވެރިކަމަށް ބަރޯސާވާ އިގްތިސާދެއް ކަމުން، މިކަމުގެ ނަފާ އެންމެނަށް ކުރާނެ ކަމަށް ވިދާޅުވި އެވެ.
ސީއެންބީސީ އަށް ދިން އިންޓަވިއުއަކީ ރާއްޖެއަށް ވެކްސިން ޓޫރިޒަމް ފެށުމުގެ ގޮތުން ލޯންޗްކުރާ "ވިސިޓް، ވެކްސިނޭޓް، ވެކޭޝަން" އިނީޝިއޭޓިވްއާ ގުޅޭ މައުލޫމާތު ހިއްސާކުރުމަށް ޑރ. މައުސޫމް ބައިވެރިވެ ވަޑައިގެންނެވި އިންޓަވިއުއެކެވެ.
