ކޮވިޑް-19ގެ ބަލިމަޑުކަމުގެ ހާލަތުގައި އިސްލާމީ މަރުކަޒަށް ގޮސް ޒަކާތް ދެއްކުމަކީ އެންމެ ރައްކާތެރި ގޮތަކަށް ނުވާނެތީވެ މި އަހަރުގެ ފިތުރު ޒަކާތް އޮންލައިންކޮށް ދައްކަން އިސްލާމިކް މިނިސްޓްރީން މިއަދު އެދިއްޖެ އެވެ.
ފިތުރު ޒަކާތް މިއަދު ބަލައިގަންނަން ފަށާފައިވާ އިރު މެއި 14ގެ ނިޔަލަށް ޒަކާތް ދެއްކޭނެ އެވެ.
އިސްލާމިކް މިނިސްޓްރީގެ އޮފިޝަލަކު ވިދާޅުވީ އޮންލައިންކޮށް ޒަކާތް ދައްކަން ބާރު އަޅާފައި ވަނިކޮށް ބައެއް މީހުން އިސްލާމީ މަރުކަޒަށް ޒަކާތް ދައްކަން މިއަދު ދިޔަ ކަމަށެވެ. އޭގެތެރޭގައި އޮންލައިންކޮށް ޒަކާތް ދައްކަން އުނދަގޫވާ ބަޔަކު ތިބި ކަމަށް އޭނާ ވިދާޅުވި އެވެ.
"އެހެންވެ މިހާރު ނިންމީ، އެ މީހުންނަށް އެއް ކައުންޓަރު ހާއްސަކުރަން،" އޮފިޝަލް ވިދާޅުވި އެވެ.
މި ލުއި ފަސޭހަކަން އޮންލައިންކޮށް ނުދެއްކޭ ފަރާތްތަކަށް ހަމަޖެއްސި ނަމަވެސް އޭނާ ވިދާޅުވި ގޮތުގައި ޒަކާތް ދެއްކުމުގެ އިންތިޒާމްތައް ހަމަޖެއްސީ މި އަހަރު އޮންލައިންކޮށް ކުރިއަށް ގެންދާ ގޮތަށެވެ.
ރަށްރަށުގައި ޒަކާތް ބަލައިގަންނާނީ އެ ރަށެއްގެ ކައުންސިލުންނެވެ. ފިތުރު ޒަކާތުގެ ގޮތުގައި ދައްކަން ޖެހެނީ އަހަރު ތެރޭގައި އެ ރަށެއްގައި ބަނޑުކެއުމުގެ ގޮތުގައި އާންމުކޮށް ކައި އުޅުނު ބާވަތަކުން 2.4 ކިލޯގެ އަގެވެ.
މިނިސްޓްރީ އިން ބުނި ގޮތުގައި ރަސްމީކޮށް ޒަކާތް ބަލައިގަންނަން ހަމަޖެހިފައިވަނީ 2.4 ކިލޯގެ ގޮވާމުގެ އަގަށްވާ ފައިސާއިންނެވެ.
މާލެ، ވިލިމާލެ އަދި ހުޅުމާލެ ސަރަހައްދުން ޒަކާތް ދައްކަން ޖެހޭ އަގުތައް
އާދައިގެ ހަނޑުލުން 12 ރުފިޔާ.
ތައިލެންޑު ހުދު ހަނޑުލުން 52 ރުފިޔާ
ރަތް ހަނޑުލުން 78 ރުފިޔާ
ބާސްމަތީ ހަނޑޫ (އާދައިގެ) 65 ރުފިޔާ
ބާސްމަތީ ހަނޑޫ (މޮޅު) 89 ރުފިޔާ
ބާސްމަތީ ހަނޑޫ (އެންމެ މޮޅު) 125 ރުފިޔާ
އާދައިގެ ފުށުން 10 ރުފިޔާ އަދި އާޓާ ފުށުން 59 ރުފިޔާ
އުރީދު އާއި ދިރާގު އަދި މޯލްޑިވްްސް އިސްލާމިކް ބޭންކް އަދި ފަހިޕޭ އެޕްލިކޭޝަނުން ޒަކާތް ދެއްކޭނެ އެވެ. ބޭންކް އޮފް މޯލްޑިވްސްގެ ވެބްސައިޓުންނާއި އިސްލާމިކް ބޭންކްގެ މެއިން ބްރާންޗް އަދި ހުޅުމާލެ ބްރާންޗް ގެ ކައުންޓަރުތަކުން ވެސް ޒަކާތް ބަލައިގަންނާނެ އެވެ.
