މާލޭ ނޯތު ހާބަރުގައި މިހާރު ދެމުން އަންނަ ހިދުމަތްތައް ބަދަލުކޮށް، ވިޔަފާރި ބަނދަރު ތަރައްގީކުރަން ހިންގާ މަޝްރޫއުގައި ހިމެނޭ ގުޅީފަޅު ހިއްކުމުގެ ދެ ވަނަ ފިޔަވަހި، ލޯން ހަމަޖެހުމާ އެކު ފަށާނެ ކަމަށް ހައުސިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
މިނިސްޓަރު އަސްލަމް މީގެ ހަފުތާއެއްހާ ދުވަސްކުރިން "އަދަދު"އަށް ވިދާޅުވި ގޮތުގައި ގުޅީފަޅުން ހިއްކަން ބޭނުންވާ ވަރަށް އަދި ބިން ނުހިއްކެ އެވެ. އެކަމަކު ޕޯޓަށް ބޭނުންވާ މުހިއްމު ސަރަަހައްދެއް ފުރަތަމަ ފިޔަވަހީގައި ހިއްކާ ނިމިއްޖެ ކަމަށް ވިދާޅުވި އެވެ.
"ގުޅީފަޅުގައި އަދި އެބައޮތް ހިއްކަން ޖެހޭ ސަރަހައްދެއް،" މިނިސްޓަރު ވިދާޅުވި އެވެ.
މި ޕްރޮޖެކްޓް ފެށީ އައިއެންޖީ ލޯނެއް މީގެ ތެރެއިން ހަމަޖެހިގެން ބާކީ ބައި ވެސް ބޮސްކާލިސްއާ އެކު ހިއްކާ ގޮތަށެވެ. އެ ލޯނު ހޯދުމުގެ މަސައްކަތް އަދިވެސް ކުރިއަށް އެބަދެ އެވެ.
އަސްލަމް ވިދާޅުވީ ލޯނު ލިބުން ލަސްވީ ކޮވިޑް-19އާ ގުޅިގެން ކަމަށެވެ. ފިނޭންސް މިނިސްޓަރު އިބްރާހިމް އަމީރު އެ މަސައްކަތް ކުރިއަށް އެބަ ގެންދަވާ ކަމަށާއި ލޯން ހަމަޖެހުމާ އެކު އެ ފިޔަވަހި ފަށާނެ ކަމަށް ވިދާޅުވި އެވެ.
ޕޯޓު ބަދަލުކުރަން ފުރަތަމަ ފިޔަވަހީގައި ޕްލޭންކޮށްފައި އޮތީ ހަ މިލިއަން ކިއުބިކް މީޓަރު ހިއްކާށެވެ.
"ގުޅިފަޅުގެ ލޭންޑް ޔޫސް ޕްލޭނެއް އެބައޮތް. ދެން އަޅުގަނޑުމެން ގުޅިފަޅާއި މާލޭ ނޯތު ޕޯޓް ސަރަހައްދުގެ ރީޕްލޭނިނިން ސިންގަޕޫރުގެ ކޮންސަލްޓަންޓަކާ އެކު އެބަކުރިއަށް ގެންދަން،" އަސްލަމް ވިދާޅުވި އެވެ.
މާސްޓާ ޕްލޭނާ އެއްގޮތަށް ގުޅިފަޅު ހިއްކުމުގެ މުޅި މަޝްރޫ އަށް 120 މިލިއަން ޑޮލަރު (1.86 ބިލިއަން ރުފިޔާ) އަރާނެ ކަމަށް ޕްލޭނިން މިނިސްޓްރީން ވަނީ ލަފާކޮށްފަ އެވެ. ބީލަމަށް ނުލައި ބޮސްކާލިސްއާ ފުރަތަމަ ފިޔަވަހި ހަވާލުކުރީ 53 މިލިއަން ޑޮލަރު (817 މިލިއަން ރުފިޔާ) އަށެވެ.
ގުޅީފަޅު ހިއްކުމަށް ފަހު މާލޭ ނޯތު ހާބަރުގައި މިހާރު ހުރި ގުދަންތަކާއި ހޯލްސޭލް ފިހާރަތައް އެތަނަށް ބަދަލުކުރާނެ އެވެ.
