މިދިޔަ ހޮނިހިރު ދުވަހު ބޭއްވި ލޯކަލް ކައުންސިލް އިންތިހާބުގެ ވަގުތީ ނަތީޖާ ކަށަވަރުނުވާ 18 ވޯޓު ފޮއްޓެއް އަލުން ގުނަން އުޅުމުން، އިލެކްޝަންސް ކޮމިޝަން (އީސީ)ގެ އިންތިހާބީ މަރުކަޒުގެ ތެރޭގައި އިދިކޮޅުގެ ސަޕޯޓަރުން ބޮޑެތި ހަމަނުޖެހުންތައް ހިންގައި މާރާމާރީ ހިންގާފައިވާތީ، ފިޔަވަޅު އަޅައި ދިނުމަށް ވެރިކަން ކުރާ މައި ޕާޓީ، އެމްޑީޕީން ގޮވާލައިފި އެވެ.
މިއަދު މެންދުރު 1:30 ގައި 18 ފޮއްޓެއް އަލުން ގުނަން ހަމަޖައްސައި، އެ ފޮށިތަކާ ގުޅުންހުރި ކެންޑިޑޭޓުންނަށް އިލެކްޝަންސް ކޮމިޝަން (އީސީ)އިން ދައުވަތު ދިނެވެ.
އެ ވަގުތާ ދިމާކޮށް އިދިކޮޅާއި އެމްޑީޕީގެ ބައެއް މެމްބަރުން ވަނީ އިންތިހާބީ މަރުކަޒަށް އެއްވެފަ އެވެ.
ނަމަވެސް، މައުލޫމާތު ލިބޭ ގޮތުގައި، މަރުކަޒުގެ ތެރޭގައި ހޫނުވީ، އެ ސަރަހައްދަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވަޑައިގެންނެވި ހިސާބުންނެވެ.
ރައީސް ނަޝީދު އިންތިހާބީ މަރުކަޒުގެ ތެރޭގައި. މައްސަލަ ހޫނުވީ އެކަމަނިކުފާނު އެތަނަށް ވަޑައިގެންނެވުމުން. -- ފޮޓޯ: ހުސެއިން ޝަޔާހް/އަދަދު
ނަޝީދު ވަޑައިގެންނެވުމާއެކު، އެއްވެ ތިބި އިދިކޮޅު ސަޕޯޓަރުން ވަނީ އެމްޑީޕީން ނަތީޖާ އޮޅުވާލަން މަސައްކަތް ކުރާ ކަމަށް ބުނެ އަޑުގަދަކޮށް، ނަޝީދު އެ މަރުކަޒުން ނެރުމަށް ގޮވާލައިފަ އެވެ.
އެއާއެކު، ފުލުހުން ވެސް އެ ސަރަހައްދަށް ގޮސްފައިވާއިރު، ހަމަނުޖެހުން ކޮންޓްރޯލްކުރަން ފުލުހުން ޕެޕާ ސްޕްރޭގެ ބޭނުންވެސް ވަނީ ކޮށްފަ އެވެ.
އެކަމާ ގުޅިގެން އެމްޑީޕީން ނެރުނު ބަޔާނެއްގައި ބުނީ، ވޯޓު ގުނުމުގެ މަސައްކަތް ހިނގަމުން ދަނިކޮށް އެތަނަށް ޕީޕީއެމްގެ އިސްވެރިންނާއި ޕީއެންސީގެ ރައީސް ގޮސް އީސީގެ މުވައްޒަފުންގެ މަސައްކަތް ކުރިޔަ ނުދީ ހުރަސްއަޅާފައިވާ ކަމަށެވެ.
އަދި އެތަނުގައި ހަމަނުޖެހުން ހިންގައި ގަޔަށް އަތްލައި މާރާމާރީ ހިންގާފައިވުމަކީ އިންތިހާއަށް ކަންބޮޑުވާ ކަމެއް ކަމަށް ބުންޏެވެ.
"އެފަރާތްތަކާމެދު ގާނޫނީ ގޮތުން އަޅަން ޖެހޭ ފިޔަވަޅު އެޅުމަށް ގޮވާލަމެވެ،" ބަޔާނުގައި ބުންޏެވެ.
އަދި ވޯޓުގެ ނަތީޖާ އިއުލާނު ކުރުމުގެ މަސައްކަތް ދެފުށް ފެންނަގޮތަށް އިލެކްޝަންސް ކޮމިޝަނުން ކުރުމުގެ ޖާގަ ދިނުމަށްވެސް އެމްޑީޕީން ވަނީ އިތުރަށް ގޮވާލައިފަ އެވެ.
ނަމަވެސް، އިދިކޮޅުން ބުނީ، ހަމަނުޖެހުން ހިނގަން މެދުވެރިވީ ނަޝީދާއެކު އެމްޑީޕީގެ ބައެއް އިސް ބޭފުޅުން މަރުކަޒަށް ވަޑައިގެންނެވުމުންނެވެ.
އަދި ނަޝީދު އިސްވެ މަސައްކަތް ކުރެއްވީ، އެ ނަތީޖާތައް އޮޅުވާލަންކަމަށް ވެސް އިދިކޮޅުން ވަނީ ތުހުމަތުކޮށްފަ އެވެ.
އެކަން ދިފާއުކޮށް ނަޝީދު ވިދާޅުވީ އީސީގެ އިދާރާއަށް ވަޑައިގެންނެވީ އިދިކޮޅުގެ އިސްވެރިން އެތަނަށް ވަޑައިގެން ނުނިކުންނެވީމާ ކަމަށެވެ.
"އޮފިޝަލުން ނޫން އެއްވެސް މީހަކަށް އީސީގެ އިދާރާއަށް ވަދެވިގެން ނުވާނެ. އަޅުގަނޑު ހުރީ ބޭރުގަ،" ނަޝީދު ވިދާޅުވި އެވެ.
ހޮނިހިރު ދުވަހުގެ އިންތިހާބުގައި މުޅި ރާއްޖޭގެ ގިނަ ކައުންސިލްތަކެއްގެ މެޖޯރިޓީ އެމްޑީޕީއަށް ލިބުނު ނަމަވެސް ބޮޑެތި ކައުންސިލްތަކެއްގެ ބާރު ވަނީ ގެއްލިފަ އެވެ. އެގޮތުން މާލޭ ސިޓީ ކައުންސިލްގެ އަގުލަބިއްޔަތު ލިބުނީ ވެސް އިދިކޮޅު ޕީޕީއެމަށެވެ.
