"އަދަދު" ނޫހުގެ ހަޔާތުގައި ބައްދަލުކުރާ ފުރަތަމަ ރޯދަ މަސް މިއައީ އެވެ. މިއީ ހާއްސަ މަހެއްކަމުން "އަދަދު" ގެ ކިޔުންތެރިންނާއި ބެލުންތެރންނަށް ހާއްސަ ކޮންޓެންޓްތަކެއް ގެނެސްދޭން ނޫހުގެ ލިޔުންތެރިންނާއި އުފެއްދުންތެރިން އައީ މިދިޔަ ދުވަސްތަކުގައި ބުރަކޮށް މަސައްކަތްކުރަމުންނެވެ.
"އަދަދު" އިން ރޯދަ މަހަށް ހާއްސަ ދެ ސެގްމަންޓެއް ގެނެސްދޭނެ އެވެ. ފުރަތަމަ ސެގްމަންޓަކީ ތަފާތު ލިޔުންތަކުން ފުރިފައިވާ، "ރޯދަ އަދަދު" އެވެ. ވެބްސައިޓުގައި ވަކިން ގާއިމްކޮށްފައިވާ "ރޯދަ އަދަދު" ޕޭޖުން ރޯދައާ ގުޅިގެން ހުރި ހަބަރާއި މައުލޫމާތުގެ އިތުރުން ރެސްޓޯރެންޓްތަކާއި ކެފޭތައް ފީޗާކުރެވޭނެ އެވެ. ރޯދައަދަދު ގައި ފީޗާކުރަން ބޭނުންވާ ރެސްޓޯރެންޓް ކެފޭތަކަށް ހާއްސަ ޕެކޭޖްތަކެއް ތައާރަފުކޮށްފައިވެ އެވެ. "އަދަދު" ގެ ނޫސްވެރިންގެ އިތުރުން ގެސްޓް ރައިޓަރުންގެ ތަފާތު ލިޔުންތަކެއް މި ސެގްމަންޓުން ކޮންމެ ދުވަހަކު ކިޔަން ލިބޭނެ އެވެ.
ދެން އޮތީ އެންމެ ހާއްސަ ސެގްމަންޓެވެ. އެއީ "އަދަދު" ގެ ވީޑިއޯ ޕްރޮގްރާމްތަކަށް ހާއްސަ، "އަދަދު ސްކްރީން" އަށް ރޯދަ މަހަށް ހާއްސަކޮށްގެން ގެނެސްދޭ ވީޑިއޯ ޝޯތަކެވެ.
މި ފަހަރު ގެންނަ ޝޯތަކުގެ ތެރޭގައި ދީނީ މައުލޫމާތަށް ހާއްސަ ޝޯ އަކާއި ދިވެހި ތާރީހާ ގުޅޭ ޝޯއެއްގެ އިތުރުން ޅެންވެރިކަމާ ގުޅޭ ޝޯ އަކާއި ލޯބީގެ ޝޯއެއް އަދި ކެއްކުމާ ގުޅޭ ޝޯއެއް ހިމެނެ އެވެ.
"މި ފަހަރު އަޅުގަނޑުމެންގެ ރޯދަ ކޮންޓެންޓްގެ ވަރަށް ބޮޑު ބައެއް ވީޑިއޯއަކީ. މީޑިއާ ބޭނުންކުރާ ގޮތް ބަދަލުވަމުން އަންނައިރު، އަދަދު ވެސް ދާނީ އެގޮތަށް ބަދަލުވަމުން. އެހެންވެ ވީޑިއޯ ކޮންޓެންޓް އިތުރުކުރީ،" "އަދަދު" ނޫހުގެ މެނޭޖިން އެޑިޓަރު މުހައްމަދު ހަމްދޫން ވިދާޅުވި އެވެ.
"އަދަދުގެ ސްކްރީން"
ސުންދުސް: ދީނީ އެކި މައުލޫމާތު ހިމެނޭ ގޮތަށް ގެނެސްދޭ ފަސް މިނެޓްގެ މި ޝޯގައި މައުލޫމާތު ދެއްވާނީ މަޝްހޫރު ދީނީ އިލްމުވެރިޔާ ޑރ. މޫސާ އަންވަރު ހަސަން އެވެ. މި ޕްރޮގްރާމްގެ ފުރަތަމަ އެޕިސޯޑް މި ހަފުތާގެ ތެރޭގައި ގެނެސްދޭނެ އެވެ.
ފުރަތަަމަ: ކޮންމެ މީހެއްގެ ވެސް ފުރަތަމަ ތަޖުރިބާ ތަފާތު ވާނެ އެވެ. މި ޝޯގައި ގެނެސްދޭނީ މުޖުތަމައުގެ އެކި ދާއިރާތަކުގެ މީހުންނަށް، އެ ދާއިރާއެއްގައި އެންމެ ފުރަތަމަ ކުރެވުނު ތަޖުރިބާތަކެވެ.
ރޭހުރި: ސުފުރާމަތީގައި އިތުރުވެފައި ހުންނަ ތަކެތިން ނުވަތަ ރޭގައި ބާކީވެފައި ހުންނަ ތަކެތިން އަނެއް ދުވަހު އެއްޗެއް ތައްޔާރުކޮށްލެވޭނެ ގޮތް މި ޝޯގައި ގެނެސްދޭނެ އެވެ. މި އާދަ ހިފައިފި ނަމަ، ރޯދައިގެ އިސްރާފު ކުޑަވެގެންދާނެ އެވެ. މަޝްހޫރު ކެއްކުންތެރިޔާ ޖުވައިރިއާ ވަޖުދީއާ ގުޅިގެން "ރޭހުރި"ގެ 10 ޝޯ މި ރޯދަ މަހު ގެނެސްދޭނެ އެވެ.
އަލިފުގެތާ: މިއީ ރާއްޖޭގެ ތާރީހުގައި ފާހަގަކޮށްލެވޭ މަޝްހޫރު ލަވަތަކާއި ޅެންތައް ހާއްސަ ޝޯ އެކެވެ. އެ ލަވަތަކާއި ޅެންތަކުގެ ފަހަތުގައި ފޮރުވިފައިވާ ވާހަކަ ގެނެސްދޭނީ ދިވެހި ތާރީހު ދިރާސާކުރަމުން އަންނަ އަހުމަދު އަލާ ދީދީ އެވެ. އަދި ޅެންވެރިކަމުގެ ނަޒަރުން ފާޑުވިދާޅުވާނީ މަޝްހޫރު އަދީބު، އާދަމް ނަސީރު އިބްރާހީމެވެ. "އަލިފުގެތާ" ގެ ހަތަރު އެޕިސޯޑް ރޯދަ މަހު ގެނެސްދޭނެ އެވެ.
އެހާރުން: ދިވެހިރާއްޖޭގެ މާޒީ އަށް ބަލާއިރު އެކު ފަންނުތަކުގެ ހުނަރުވެރިން ވަނީ ފާހަގަކުރެވިފަ އެވެ. އެކަމަކު އޭގެ ތެރެއިން ގިނަ ބަޔަކު ވަނީ ފަރުދާވެފަ އެވެ. މި ޝޯގައި ގެނެސްދޭނީ އެފަދަ ހުނަރުވެރިންގެ ވާހަކަތަކެވެ. ވަރަށް ޝައުގުވެރި ހަތަރު އެޕިސޯޑެއް ބެލުންތެރިންނަށް ގެނެސްދެވޭނެ އެވެ.
ނަފްސުގެ ވާހަކަ: ނިމިގެންދިޔަ އަހަރެއްހާ ދުވަހު މުޅި ދުނިޔެ ތަޖުރިބާކުރަންޖެހުނު ކޮވިޑް-19 ގެ ބަލިމަޑުކަމުގެ ސަބަބުން ކޮންމެ މުޖުތަމައެއްގައި ވެސް ނަފުސާނީ ބޮޑެތި މައްސަލަތަކެއް ވަނީ ކުރިމަތިވެފަ އެވެ. އެ މައްސަލަތަކަކީ ކޮބައިތޯ އާއި އެކަމުގެ ހައްލާއެކު، ހިތާއި ނަފުސަށް ހިތްހަމަ ޖެހުން ގެނެސްދޭނެ ޕްރޮގްރާމަކަށް، މަޝްހޫރު ނަފްސާނީ ބަލިތަކުގެ އިލްމުވެރިޔާ ޑރ. އައިޝަތު އަލީ ނާޒުއާއެކު ގެނެސްދޭ މި ޕްރޮގްރާމް ވެގެންދާނެ އެވެ. މި ޝޯގެ ހަތަރު އެޕިސޯޑް ރޯދަ މަހު ގެނެސްދޭނެ އެވެ.
ލޯބިވެވުނީ ކިހިނެއް؟: އިޝްގާ ވަކިވެ، އެކަނިވެރިކަމުގައި އުޅެވޭނީ ކޮން ހިތަކަށް ހެއްޔެވެ؟ ދުނިޔެވީ ތޮބީއަތަކީ، ދެ ޖިންސްގެ ގުޅިލާމެހުމެވެ. މި ގުޅިލާމެހުމުގެ މަރުހަލާތަކުގައި ހިތާމާއި އުފާވެރިކަމުގެ ވާހަކަތައް ހިމެނެ އެވެ. މި ފަހަރު މި ގެނެސްދެނީ އެ ވާހަކަތަކެވެ. މި ޝޯގެ ހަތަރު އެޕިސޯޑް ރޯދަ މަހު ގެނެސްދޭނެ އެވެ.
"ރޯދައަދަދު" އަދި "އަދަދު ސްކްރީން: ގައި އިޝްތިހާރުކުރުމުގެ ފުރުސަތު އަދިވެސް އެބައޮތެވެ. މައުލޫމާތު ސާފުކުރަން ގުޅުއްވާނީ 9907975 އަށެވެ. އީމެއިލް ކުރައްވާނީ info@adhadhu.com އަށެވެ.
