މިދިޔަ ހޮނިހިރު ބޭއްވި ލޯކަލް ކައުންސިލް އިންތިހާބުގެ ވަގުތީ ނަތީޖާ އިއުލާނުކުރަން އިލެކްޝަންސް ކޮމިޝަނުން ތައްޔާރުވަމުން އަންނައިރު، ވަގުތީ ނަތީޖާ ކަށަވަރުނުވާ 18 ވޯޓު ފޮއްޓެއް އަލުން ގުނަން ނިންމާފައިވާކަމަށް އެ ކޮމިޝަނުން ބުނެފި އެވެ.
އީސީން ބުނީ އެ ފޮށިތަކުގެ ވަގުތީ ނަތީޖާ ކަށަވަރު ކުރުމަށް މިއަދު މެންދުރު އިންތިހާބާ ބެހޭ މަރުކަޒުގައި ވޯޓު ކަރުދާސްތައް އަލުން ގުނަން ހަމަޖެހިފައިވާ ކަމަށެވެ.
އަދި އެ ފޮށިތަކާ ގުޅުންހުރި ކެންޑިޑޭޓުންނަށް އެސްއެމްއެސް މެދުވެރިކޮށް ދައުވަތު އަރުވާފައިވާކަމަށް އީސީން ބުންޏެވެ.
އަލުން ގުނަން ނިންމާފައިވާ 18 ފޮށީގެ ލިސްޓެއް އީސީގެ ނައިބު ރައީސް އިސްމާއިލް ހަބީބު ޓްވިޓާ މެދުވެރިކޮށް ވަނީ އާއްމުކުރައްވައިފަ އެވެ.
ނަމަވެސް، އެ ލިސްޓުގައި ވެރިކަން ކުރާ މައި ޕާޓީ، އެމްޑީޕީން ފަރަގު ކުޑަކަމަށް ބުނެ ނަތީޖާއާ މެދު ސުވާލު އުފެއްދި މާލެ އާއި އައްޑޫ ސިޓީގެ އެއްވެސް ދާއިރާއެއް ނުހިމެނެ އެވެ.
ކައުންސިލް އިންތިހާބުގައި ބާތިލު ވޯޓުތައް އާދަޔާ ހިލާފަށް ގިނަ ވެފައިވާތީ އެ ވޯޓްތައް އަލުން ގުނުމަށް އިދިކޮޅު ކޯލިޝަނުން، ވަނީ އީސީގެ ކިބައިން އެދިފަ އެވެ.
