އިރާނުގެ ނަތާންޒް ނިއުކްލިއާ ފެސިލިޓީއަށް އިޒްރޭލުން ސައިބާ ހަމަލާއެއް ދިން ކަމަށް ބުނިތާ އެއް ދުވަސް ފަހުން، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ބަހުގެ ހަމަލާތަކެއް އިރާނަށް ރައްދު ކުރައްވައިފި އެވެ.
ނަތަންޔާހޫ ވިދާޅުވީ އިރާނުގެ "ރުޅިވެރިކަމާއި ޓެރަރިޒަމުން" ދިފާއުވާން ކުރަން ޖެހުނު ކޮންމެ ކަމެއް އިޒްރޭލުން ކުރާނެ ކަމަށެވެ. އޭނާ އެހެން ވިދާޅުވިއިރު، ސައިބާ ހަމަލާއަށް ބަދަލު ހިފާނެ ކަމަށް އިރާނުން ބުނެފައި ވެއެވެ.
ނަތަންޔާހޫ ވިދާޅުވީ މެދުއިރުމަތީގައި އިޒްރޭލަށް އޮތް އެންމެ ބޮޑު ނުރައްކަލަކީ އިރާނު ކަމަށެވެ. ނިއުކްލިއާ ހަތިޔާރާއި މިސައިލް އުފައްދަން ކުރާ މަސައްކަތް އިރާނުން ހުއްޓާނުލާ ކަމަށާއި، ނަމަވެސް އެ ލަނޑުދަނޑި ހާސިލްކުރުމުގެ ފުރުސަތު އިޒްރޭލުން ނުދޭނެ ކަމަށް އޭނާ ވިދާޅުވި އެވެ.
އިޒްރޭލު ނައްތާލުމުގެ ބޭނުމުގައި އިރާނުން ނިއުކްލިއާ ހަތިޔާރު އުފައްދަން ކުރާ މަސައްކަތް ކާމިޔާބުވިޔަކަ ނުދޭނަން. -- ނަތަންޔާހޫ
ނަތަންޔާހޫ އެފަދަ ގޮތަކަށް ވާހަކަދެއްކެވީ މިހާރު އިޒްރޭލަށް ވަޑައިގެން އުޅުއްވާ އެމެރިކާ ޑިފެންސް ސެކެޓްރީ ލޮއިޑް އޯސްޓިން އާއެކު ދެއްވި ޕްރެސް އެއްގަ އެވެ.
އެ ޕްރެސްގައި އޯސްޓިން ވިދާޅުވީ މެދުއިރުމަތީގައި އިޒްރޭލުގެ ބާރު ދަމަހައްޓަން އެމެރިކާގެ އެއްބާރުލުން ލިބޭނެ ކަމަށެވެ.
