މި އަހަރުގެ ފުރަތަމަ ކުއާޓާގައި ފަތުރުވެރިކަމުގެ ދާއިރާއިން އާމްދަނީގެ ގޮތުގައި 2.1 ބިލިއަން ރުފިޔާ ލިބިފައިވާ ކަމަށް މީރާގެ ތަފާސްހިސާބުތަކުން ދައްކައިފި އެވެ.
މީރާގެ ޓޯޓަލް ރެވެނިއު ސީރީސްއިން ލިބެން ހުރި މައުލޫމާތަށް ބަލާއިރު އަހަރުގެ ފުރަތަމަ ތިން މަސް ދުވަހުގެ ތެރޭގައި ފަތުރުވެރިކަމުގެ ދާއިރާއިން ޓެކުހުގެ ގޮތުގައި 1.6 ބިލިއަން ރުފިޔާ ލިބިފައިވާއިރު، ޓެކްސް ނޫން އާމްދަނީގެ ގޮތުގައި 410 މިލިއަން ރުފިޔާ ލިބުނެވެ.
ޓީީޖީއެސްޓީ
ފަތުރުވެރިކަމުގެ ދާއިރާއިން އެންމެ ބޮޑު އާމްދަނީއެއް ލިބުނީ ޓީޖީއެސްޓީ އިންނެވެ. ޓީޖީއެސްޓީގެ ގޮތުގައި 1.4 ބިލިއަން ރުފިޔާ ލިބިފައި ވެއެވެ. މިއީ ދައުލަތަށް ލިބުނު ޖުމްލަ އާމްދަނީގެ 36.1 ޕަސެންޓެވެ. އެއް ދާއިރާއަކުން ދައުލަތަށް އެންމެ ބޮޑު އާމްދަނީއެއް ލިބުނީ ވެސް ޓީޖީއެސްޓީ އިންނެވެ.
ޓީޖީއެސްޓީ އިތުރުވެފައިވާ ސަބަބުތަކުގެ ތެރޭގައި ފާއިތުވި ހަ މަސް ދުވަހުގެ ތެރޭގައި ރާއްޖެއަށް އައި ފަތުރުވެރިންގެ އަދަދު ބައި މިލިއަނަށް ވުރެ އިތުރުވުން ހިމެނެ އެވެ.
ގްރީން ޓެކްސް
ގްރީން ޓެކުހަކީ ރާއްޖެ އަންނަ ކޮންމެ ފަތުރުވެރިއެއްގެ އަތުން ބޮލަކަށް ހަ ޑޮލަރުގެ ރޭޓުގައި ނަގާ ޓެކުހެކެވެ. މި ޓެކުހުން ލިބޭ އާމްދަނީ އޮންނަނީ ސީދާ ގޮތުން ފަތުރުވެރިން އަންނަ އަދަދުތަކާ ގުޅިފަ އެވެ. ފުރަތަމަ ކުއާޓާގައި ގްރީން ޓެކުހުގެ ގޮތުގައި 190 މިލިއަން ރުފިޔާ ލިބުނެވެ. މިއީ ދައުލަތަށް ލިބުނު ޖުމްލަ އާމްދަނީގެ 4.6 ޕަސެންޓެވެ.
ބިމު ކުލި
ޓޫރިޒަމްގެ ބޭނުންތަކަށް ދޫކޮށްފައިވާ ތަންތަނުގެ ބިމު ކުލީގެ ގޮތުގައި ފުރަތަމަ ކްއާޓާގައި ލިބުނު އާމްދަނީއަކީ 397 މިލިއަން ރުފިޔާ އެވެ. މި އަހަރު ރިސޯޓްތަކުން ދެއްކި ބިމު ކުލީގެ ބޮޑު ޕަސެންޓަކީ، ކޮވިޑް-19 ގެ ސަބަބުން ރާއްޖޭގެ ޓޫރިޒަމް ދަށަށް ދިއުމާ ގުޅިގެން ފަސްކޮށްދިން ކުއްޔެވެ.
ލޭންޑް އެކުއިޒިޝަން އެންޑް ކޮންވާޝަން ފީ
މިއީ ރިސޯޓްތަކުގެ އޯނާޝިޕް ބަދަލުކުރުމާއި ރިސޯޓެއްގެ އެކުއިޒިޝަން ކޮސްޓުގެ ގޮތުގައި ލިބޭ އާމްދަނީ އެވެ. މި ދާއިރާއިން އާމްދަނީގެ ގޮތުގައި 12 މިލިއަން ރުފިޔާ ލިބުނެވެ. މިއީ، ރިސޯޓް ވިއްކާލުމުގެ މުއާމަލާތްތަކާއި އާ ރިސޯޓްތައް ކުއްޔަށް ދޫކުރުމާ ސީދާ ގުޅިފައިވާ އާމްދަނީއެއް ކަމުން، މި އާމްދަނީ ލިބެނީ ފަތުރުވެރިކަމަށް ރަށްތައް ދޫކުރާ ދުވަސްވަރުގަ އެވެ.
