އިރާނުގެ ނިއުކްލިއާ ފެސިލިޓީއަކަށް އިޒްރޭލުން ދިން ކަމަށް ބުނާ ސައިބާ ހަމަލާއާ ގުޅިގެން ބަދަލު ހިފާނެ ކަމުގެ އިންޒާރު ދީފި އެވެ.
ނަތާންޒް ފެސިލިޓީއަށް ދިން ހަމަލާއަކީ އިޒްރޭލުގެ ޖާސޫސީ އިދާރާ މޮއްސަދުގެ ބައިވެރިވުމާއެކު ދިން ހަމަލާއެއް ކަމަށް ޖާސޫސީ އިސް އޮފިޝަލަކު ވަނީ ބުނެފަ އެވެ.
އިރާނުން ވެސް އެ ހަމަލާގެ ތުހުމަތު ކުރަނީ އިޒްރޭލަށެވެ. އިރާނުގެ ފޮރިން މިނިސްޓަރު މިއަދު ވިދާޅުވީ އެ ހަމަލާއާ ގުޅިގެން "ބަދަލު ހިފާނެ" ކަމަށެވެ.
އެޓޮމިކް އެނާޖީ އޮގަނައިޒޭޝަން އޮފް އިރާންގެ ތަރުޖަމާނު ބެހްރޫޒް ކަމަލްވަންދީ އިއްޔެ ނޫސްތަކަށް ވިދާޅުވީ ނަތާންޒް ފެސިލިޓީގައި ހިނގި ކަމެއްގެ ސަބަބުން އެ ތަނުން ކަރަންޓު ކެނޑުނު ކަމަށެވެ.
އޭގެ އެއް ދުވަސް ކުރިން އިރާނުން ވަނީ ޔުރޭނިއަމް މުއްސަނދި ކުރަން ބޭނުންވާ އެޑްވާންސްޑް ސެންޓްރިފިއުޖުތަކެއް އެތަނުގައި އެކްޓިވޭޓުކޮށްފަ އެވެ.
އިޒްރޭލަށް ކުރާ ތުހުމަތާ ގުޅިގެން އެ ގައުމުން މިހާތަނަށް ރަސްމީކޮށް ވަކި އެއްޗެއް ބުނެފައެއް ނުވެ އެވެ. ނަމަވެސް އިޒްރޭލުގެ ޕަބްލިކް ރޭޑިއޯއަށް މައުލޫމާތު ދިން ނަން ހާމަނުކުރާ ޖާސޫސީ އޮފިޝަލަކު ބުނެފައި ވަނީ އެ ހަމަލާގެ ސަބަބުން އިރާނުން ހާމަކުރި ވަރަށް ވުރެ ބޮޑު ގެއްލުމެއް ލިބުނު ކަމަށެވެ.
އެމެރިކާގެ ޖާސޫސީ އޮފިޝަލުންނާ ހަވާލަދީ ނިއުޔޯކް ޓައިމްސް އިން ބުނީ ބޮޑު ގޮވުމަކާއެކު ނަތާންޒް ފެސިލިޓީއަށް ކަރަންޓުދޭ ނިޒާމު އެއްކޮށް ހަލާކުވެފައިވާ ކަމަށެވެ. ސެންޓްރިފިއުޖުތަކަށް ކަރަންޓު ދެނީ އެ ނިޒާމުގެ ތެރެއިންނެވެ.
އެމެރިކާގެ ޖާސޫސީ އޮފިޝަލުން އަންދާޒާ ކުރާ ގޮތުގައި އެ ތަނުގައި ޔުރޭނިއަން މުއްސަނދި ކުރުމުގެ މަސައްކަތް އަލުން ފަށަން މަދުވެގެން ނުވަ މަސް ދުވަސް ހޭދަވާނެ އެވެ.
މީގެ ކުރިން ވެސް އެ ފެސިލިޓީއަށް ހަމަލާތައް އަމާޒުވެފައި ވެއެވެ. އެގޮތުން އެމެރިކާ އާއި އިޒްރޭލު ގުޅިގެން 2010 ވަނަ އަހަރު އުފެއްދި ކަމަށް ބެލެވޭ ސްޓަކްސްނެޓް ކޮމްޕިއުޓަރު ވައިރަސްގެ ސަބަބުން ނަތާންޒްގައި ހުރި ސެންޓްރިފިއުޖްތައް ހަލާކުވެފައި ވެއެވެ.
އޭގެ އިތުރުން މިދިޔަ ޖުލައި މަހު ވެސް ނަތާންޒްގެ ސެންޓްރިފިއުޖްތައް ރައްކާކޮށްފައި ހުންނަ ސަރަހައްދުގައި ގޮވުމެއް ގޮވި އެވެ. އެއީ ވެސް ސައިބާ ހަމަލާއެއް ކަމަށް އިރާނުން ބުންޏެވެ.
އިރާނުން މިހާރު ނަތާންޒް ފެސިލިޓީ ގާއިމްކޮށްފައިވަނީ ފަރުބަދައެއްގެ ތެރެއިން ބިމު އަޑީގަ އެވެ. މީގެ ކުރިން އެތަނަށް ދިން ހުރިހާ ހަމަލާއެއްގެ ފަހަތުގައި ވަނީ ވެސް އިޒްރޭލު ކަމަށް ބެލެވެ އެވެ.
އަނެއްކާވެސް ނިއުކްލިއާ ފެސިލިޓީއަކަށް ހަމަލާ ދިން ކަމަށް ބުނެފައި މި ވަނީ އިރާނާއެކު އެމެރިކާއިން އެކުލަވާލި ނިއުކްލިއާ އެއްބަސްވުމެއްގެ މަސައްކަތް އަލުން ފަށަން ތައްޔާރުވަމުން ދަނިކޮށެވެ. ދެ ހާސް ފަނަރަ ވަނަ އަހަރުގެ އެ އެއްބަސްވުން ހުއްޓުމަކަށް އައިސްފައި އޮތީ އެމެރިކާގެ ކުރީގެ ރައީސް ޑޮނަލްޑް ޓްރަމްޕް އެކަމަށް ހުރަސް އެޅުއްވުމުންނެވެ.
މިދިޔަ ހޮނިހިރު ދުވަހު އިރާނުގެ ރައީސް ހަސަން ރޫހާނީ ވަނީ ނަތާންޒް ފެސިލިޓީގައި މުޅިން އާ ސެންޓްރިފިއުޖުތަކެއް އިފްތިތާހު ކުރައްވާފަ އެވެ. އެއީ އިރާނުން ހިންގާ ޔުރޭނިއަމް މުއްސަނދި ކުރުމުގެ ޕްރޮގްރާމަށް މުހިއްމު ތަކެއްޗެވެ. ސެންޓްރިފިއުޖް މެދުވެރިކޮށް އުފައްދާ ޔުރޭނިއަމް ބޭނުންކޮށްގެން ހަކަތަ އުފައްދަން ރިއެކްޓާ ފިޔުލް ތައްޔާރު ކުރެވޭނެ އެވެ. ހަމަ އެއާއެކު އެ ޔުރޭނިއަމުން ނިއުކްލިއާ ހަތިޔާރު ވެސް އުފެއްދޭނެ އެވެ.
އާ ސެންޓްރިފިއުޖް އިފްތިތާހު ކުރުމަކީ 2015 ވަނަ އަހަރު އެމެރިކާ އާއެކު އެކުލަވާލި އެއްބަސްވުމާ ހިލާފު ކަމެކެވެ. އެ އެއްބަސްވުމުގެ ދަށުން އިރާނުގައި ޔުރޭނިއަމް ބެހެއްޓޭނީ ވަކި މިންވަރަކަށެވެ.
