މާދަމާ ރޯދަ މަސް ފެށޭތީ، ކޮވިޑް ވެކްސިންގެ ދެވަނަ ޑޯޒް ޖެހުމަށް ގިނަ އަދަދެއްގެ މީހުން ކިޔުގައި ޖެހިއްޖެ އެވެ.
މާލޭގެ ތިން ސަރަހައްދެއްގައި އާއި ވިލިމާލެ އަދި ހުޅުމާލޭގައި ކޮވިޑް ވެކްސިން ޖެހުމުގެ އިންތިޒާމް މިއަދު އޮތްއިރު، އެ ފަސް ސަރަހައްދަށް ވެސް ގިނަ ބަޔަކު ވަނީ އެއްވެފަ އެވެ.
އެގޮތުން، އާޓް ގެލެރީން ވެކްސިން ޖެހުމަށް އޮތް ކިޔު، ސީއެޗްއެސްސީއާ ހަމައަށް އެބަ އޮތެވެ. ސެނެހިޔާ، ސޯޝަލް ސެންޓަރު ދޮށުގައި ވެސް އަވީގައި ގިނަ ބަޔަކު ކިޔޫގައި އެބަ ތިއްބެވެ.
ވިލިމާލޭ އާއި ހުޅުމާލޭގައި ވެސް ވެކްސިން ޖެހުމަށް މިއަދު ކިޔު ބޮޑުއިރު، ވިލިމާލެ ސެންޓަރުން މިހާރު ނަންބަރު ހުސްވެފައިވާ ކަމަށް ކިޔޫގައި ހުރި މީހަކު ބުންޏެވެ.
"ވިލިމާލެއިން މިތަނަށް އައިސް މިހުރީ، އެ ސެންޓަރުން ނަންބަރު މިއަދަށް ވަނީ ހުސްވެފައި،" ސޯޝަލް ސެންޓަރުގެ ކިޔުގައި ހުރި މީހަކު ބުންޏެވެ.
އެ ތަނުގައި ކިޔުގައި ހުރި އެހެން މީހަކު ބުނި ގޮތުގައި، އޭނާ ވެކްސިން ޖެހުމަށް މަންމަ ގޮވައިގެން އައީ ދެވަނަ ޑޯޒް ޖެހުމަށް އެޗްޕީއޭއިން އެންގި ދުވަސް ކަމަށްވާތީ އެވެ. އެކަމަކު، އެ ތަނުގައި އެފަދަ އެއްވެސް ތަރުތީބެއް ނެތްކަން އޭނާ ފާހަގަކުރި އެވެ.
"މިތަނުގައި އެބަ ތިބި ދެވަނަ ޑޯޒް ޖަހަންޖެހޭ ތާރީހު ފަހަނަ އަޅާފައި ތިބި މީހުން ވެސް، ތަރުތީބު އިންތިޒާމެއް ނެތް،" 12:30 ގައި ސޯޝަލް ސެންޓަރުގެ ކިޔުގައި ޖެހުނު މީހާ ބުންޏެވެ. އޭނާ ނަންބަރު ޖެހެން އަދި ގާތެއް ނުވެ އެވެ.
އެޗްޕީއޭއިން އިއުލާން ކޮށްފައިވާ ގޮތުގައި މިއަދު ދެވަނަ ޑޯޒް ވެކްސިން ޖަހައިދެނީ ފެބުރުއަރީ މަހުގެ 1-15 އަށް ފުރަތަމަ ޑޯޒް ޖެހި މީހުންނާއި ފުރަތަމަ ޑޯޒް ޖެހުމަށްފަހު އަށް ހަފުތާވެފައިވާ ފަރާތްތަކަށެވެ.
ނެޝަނަލް އާޓް ގެލެރީގެ ކައިރީގައި ވެކްސިން ޖަހަން ގިނަ ބަޔަކު ކިޔު ޖެހިފައި. -- ފޮޓޯ: ހުސެއިން ޝަޔާހު/އަދަދު
"އަހަރެން މިއަދު މިހާ ވަރަކުން ކިޔުގައި ޖެހިގެން މިހުރީ މާދަމާ ރޯދަ މަސް ފެށޭތީ،" ކިޔުގައި ތިބި ގިނަ މީހުން، މިއަދު ކިޔުގައި ޖެހުނު ސަބަބަކީ މިއީ އެވެ.
ރޯދަ މަހު، ވެކްސިން ޖެހުމަށް އެޗްޕީއޭއިން ހަމަޖައްސާފައިވަނީ ރޭގަނޑުގެ ކުޑަ ވަގުތުކޮޅަކަށެވެ. ނަމަވެސް، ގިނަ މީހުންނަށް ދެވަނަ ޑޯޒް ޖަހަން ޖެހޭނީ ރޯދަ މަހުގެ ތެރޭގަ އެވެ.
ވެކްސިން މިހާތަނަށް ޖެހި މީހުންގެ ތަފާސް ހިސާބުތައް ދައްކާ ގޮތުން، މިއަދު ކުއްލިއަކަށް ކިޔު ދިގުވެފައިވީ ނަމަވެސް މިދިޔަ ހަފުތާ ބަންދުގައި މާލޭން ދެވަނަ ޑޯޒް އެއްވެސް މީހަކު ޖަހާފައިނުވެ އެވެ.
ވެކްސިން ކިޔުތައް މީގެކުރިން ވެސް ކުއްލިއަކަށް ދިގުވެގެން ދިޔައީ، ފުރަތަމަ ޑޯޒް ޖެހުމުގެ އެންމެ ފަހު ދުވަސް ޖެހުމުންނެވެ.
މާލޭގައި އަދިވެސް ރަޖިސްޓްރީކޮށްގެން ފުރަތަމަ ޑޯޒް ވެސް ޖެހެ އެވެ. އެގޮތުން، ޓްރީޓޮޕް ހޮސްޕިޓަލާއި ރައްޔިތުންގެ މަޖިލީހުން ފުރަތަމަ ޑޯޒް ޖަހައިދެމުންދާއިރު އެ ދެ ތަނުގައި ވެސް ކޮންމެ ވެސް ވަރެއްގެ ކިޔުއެއް މިއަދު އެބަ އޮތެވެ.
ރާއްޖޭގައި ކޮވިޑް ވެކްސިން ޕްރޮގްރާމް ފެށި ފަހުން، 260،000 އަށް ވުރެ ގިނަ މީހުން ވަނީ ފުރަތަމަ ޑޯޒް ޖަހައިފަ އެވެ.
އަދި ދެވަނަ ޑޯޒްއާއެކު މިހާތަނަށް ވެކްސިން ފުރިހަމަކުރި މީހުންގެ އަދަދު ވަނީ 15،000 ހުރަސްކޮށްފަ އެވެ.ެޝަނަލް އާޓް ގެލެރީގެ ކައިރީގައި ވެކްސިން ޖަހަން ގިނަ ބަޔަކު ކިޔު ޖެހިފައި.
