އިރާނުގެ ނަތާންޒް ނިއުކްލިއާ ފެސިލިޓީއަށް އިއްޔެ ދިން ސައިބާ ހަމަލާގެ ފަހަތުގައި ވަނީ އިޒްރޭލުގެ ޖާސޫސީ އިދާރާ މޮއްސަދު ކަމަށް އިސް އޮފިޝަލުންނާ ހަވާލަދީ އިޒްރޭލުގެ ޕަބްލިކް ރޭޑިއޯއިން ހަބަރު ފަތުރައިފި އެވެ.
ނަން ހާމަނުކުރާ ޖާސޫސީ އޮފިޝަލުންނާ ހަވާލަދީ ކާން ރޭޑިއޯއިން ބުނީ ނަތާންޒް ފެސިލިޓީއަށް ދިން ހަމަލާއަކީ މޮއްސަދުގެ ބައިވެރިވުން ހިމެނޭ އިޒްރޭލުގެ ސައިބާ ހަމަލާއެއް ކަމަށާއި އިރާނުން ހާމަކުރި ވަރަށް ވުރެ ބޮޑު ގެއްލުމެއް އެ ފެސިލިޓީއަށް ލިބިފައިވާ ކަމަށެވެ.
އެޓޮމިކް އެނާޖީ އޮގަނައިޒޭޝަން އޮފް އިރާންގެ ތަރުޖަމާނު ބެހްރޫޒް ކަމަލްވަންދީ އިއްޔެ ނޫސްތަކަށް ވިދާޅުވީ ނަތާންޒް ފެސިލިޓީގައި ހިނގި ކަމެއްގެ ސަބަބުން އެ ތަނުން ކަރަންޓު ކެނޑުނު ކަމަށެވެ.
އެ އިދާރާގެ ވެރިޔާ އަލީ އަކްބަރު ސަލޭހީ އެކަން ސިފަކުރެއްވީ "ނިއުކްލިއާ ޓެރަރިޒަމް" ގެ ގޮތުގަ އެވެ. ނަމަވެސް އެކަމުގެ ތުހުމަތު ކުރެވެނީ ކޮން ބަޔަކަށް ކަމެއް ހާމަކޮށްފައެއް ނުވެ އެވެ.
އިރާނުގެ ދައުލަތުގެ މީޑިއާއަށް ސަލޭހީ ދެއްވި އިންޓަވިއުގައި ނަތާންޒް ފެސިލިޓީގައި ދިމާވި ކަންކަން ހިއްސާކުރައްވާފައެއް ނުވެ އެވެ. ނަމަވެސް މީގެ ކުރިން ވެސް އެ ފެސިލިޓީއަށް ހަމަލާތައް އަމާޒުވެފައި ވެއެވެ.
އެގޮތުން އެމެރިކާ އާއި އިޒްރޭލު ގުޅިގެން 2010 ވަނަ އަހަރު އުފެއްދި ކަމަށް ބެލެވޭ ސްޓަކްސްނެޓް ކޮމްޕިއުޓަރު ވައިރަސްގެ ސަބަބުން ނަތާންޒްގައި ހުރި ސެންޓްރިފިއުޖްތައް ހަލާކުވެފައި ވެއެވެ.
އޭގެ އިތުރުން މިދިޔަ ޖުލައި މަހު ވެސް ނަތާންޒްގެ ސެންޓްރިފިއުޖްތައް ރައްކާކޮށްފައި ހުންނަ ސަރަހައްދުގައި ގޮވުމެއް ގޮވި އެވެ. އެއީ ވެސް ސައިބާ ހަމަލާއެއް ކަމަށް އިރާނުން ބުންޏެވެ.
އިރާނުން މިހާރު ނަތާންޒް ފެސިލިޓީ ގާއިމްކޮށްފައިވަނީ ފަރުބަދައެއްގެ ތެރެއިން ބިމު އަޑީގަ އެވެ. މީގެ ކުރިން އެތަނަށް ދިން ހުރިހާ ހަމަލާއެއްގެ ފަހަތުގައި ވަނީ ވެސް އިޒްރޭލު ކަމަށް ބެލެވެ އެވެ.
އަނެއްކާވެސް ނިއުކްލިއާ ފެސިލިޓީއަކަށް ހަމަލާ ދިން ކަމަށް ބުނެފައި މި ވަނީ އިރާނާއެކު އެމެރިކާއިން އެކުލަވާލި ނިއުކްލިއާ އެއްބަސްވުމެއްގެ މަސައްކަތް އަލުން ފަށަން ތައްޔާރުވަމުން ދަނިކޮށެވެ. ދެ ހާސް ފަނަރަ ވަނަ އަހަރުގެ އެ އެއްބަސްވުން ހުއްޓުމަކަށް އައިސްފައި އޮތީ އެމެރިކާގެ ކުރީގެ ރައީސް ޑޮނަލްޑް ޓްރަމްޕް އެކަމަށް ހުރަސް އެޅުއްވުމުންނެވެ.
މިދިޔަ ހޮނިހިރު ދުވަހު އިރާނުގެ ރައީސް ހަސަން ރޫހާނީ ވަނީ ނަތާންޒް ފެސިލިޓީގައި މުޅިން އާ ސެންޓްރިފިއުޖުތަކެއް އިފްތިތާހު ކުރައްވާފަ އެވެ. އެއީ އިރާނުން ހިންގާ ޔުރޭނިއަމް މުއްސަނދި ކުރުމުގެ ޕްރޮގްރާމަށް މުހިއްމު ތަކެއްޗެވެ. ސެންޓްރިފިއުޖް މެދުވެރިކޮށް އުފައްދާ ޔުރޭނިއަމް ބޭނުންކޮށްގެން ހަކަތަ އުފައްދަން ރިއެކްޓާ ފިޔުލް ތައްޔާރު ކުރެވޭނެ އެވެ. ހަމަ އެއާއެކު އެ ޔުރޭނިއަމުން ނިއުކްލިއާ ހަތިޔާރު ވެސް އުފެއްދޭނެ އެވެ.
އާ ސެންޓްރިފިއުޖް އިފްތިތާހު ކުރުމަކީ 2015 ވަނަ އަހަރު އެމެރިކާ އާއެކު އެކުލަވާލި އެއްބަސްވުމާ ހިލާފު ކަމެކެވެ. އެ އެއްބަސްވުމުގެ ދަށުން އިރާނުގައި ޔުރޭނިއަމް ބެހެއްޓޭނީ ވަކި މިންވަރަކަށެވެ.
