ކުޑަކުއްޖަކަށް ޖިންސީ ގޯނާ ކުރުމުގެ ތުހުމަތުގައި ފުލުހުންގެ ބަންދުގައި ހުރި މީހަކު، ރަށެއްގެ ކައުންސިލްގެ ރައީސް ކަމަށް އިންތިހާބު ވެއްޖެ އެވެ.
އެއީ، ގދ. ގައްދޫ ކައުންސިލްގެ ރައީސް ކަމަށް އިންތިހާބުވި މުހައްމަދު އަހުމަދު (އެމްޑީ) އެވެ. އޭނާއަކީ އެ ގޮނޑިއަށް ވާދަ ކުރި ޕީޕީއެމްގެ ކެންޑިޑޭޓެވެ.
މުހައްމަދު އަހުމަދު ކައުންސިލުގެ ރައީސްގެ މަގާމަށް ހޮވުނީ، ވާދަވެރި ކެނޑިޑޭޓުގެ މައްޗަށް 85 ވޯޓުގެ ކުރި ހޯދައިގެންނެވެ. އޭނާއަކީ މީގެ ކުރިން ވެސް ގައްދޫ ކައުންސިލްގެ ރައީސްކަން ކޮށްފައިވާ މީހެކެވެ.
އިންތިހާބުގެ ކުރިން މުހައްމަދު އަހުމަދުގެ ކެނޑިޑެސީއާ ގުޅިގެން ގިނަ ބަޔަކު ކަންބޮޑުވުން ފާޅުކުރުމުން، ސީރިއަސް މައްސަލައެއްގެ ގޮތުގައި އެ މައްސަލަ ބަލަމުންދާ ކަމަށް އޭނާ ނިސްބަތްވާ ޕީޕީއެމް އިން ބުންޏެވެ. ނަމަވެސް، އޭނާއާ ދެކޮޅަށް މިހާތަނަށް ފިޔަވަޅެއް އަޅާފައިވާ ކަމުގެ މައުލޫމާތެއް ނުލިބެ އެވެ.
އޭނާ އިންތިހާބުވުމުން ފާޑުކިޔުން އަމާޒުވެފައިވަނިކޮށް، އިލެކްޝަން ކޮމިޝަންގެ ރައީސް އަހުމަދު ޝަރީފް ވިދާޅުވި ގޮތުގައި، ކޯޓުގައި މައްސަލައެއް އޮތުމަކީ އިންތިހާބަށް ކުރިމަތިލާފައިވާ މީހެއްގެ ކެނޑިޑެސީ ބާތިލުވާ ކަމެއް ނޫން ކަމެވެ.
ގާނޫނުގައި ބުނާ ގޮތުން މީހެއްގެ ކެނޑިޑެސީ ބާތިލު ކުރެވޭނީ، ނުވަތަ އޭނާގެ ޝަރުތު ހަމަ ނުވާކަމަށް ބެލެވޭނީ ރާއްޖޭގެ އެއްވެސް ކޯޓެއްގައި އޭނާގެ މައްޗަށް ޖިނާއި ކުށެއް ނުވަތަ ދަރަނީގެ މައްސަލައެއް ޝަރީއަތަށް ސާބިތުވެފައިވާ ނަމަ އެވެ.
