އިއްޔެ ބޭއްވި ލޯކަލް ކައުންސިލްތަކުގެ އިންތިހާބުގެ ނަތީޖާއަށް ބަދަލު އަންނަ ވަރުގެ ޝަކުވާއެއް ހުށަހަޅާފައި ނުވާ ކަމަށް، އިލެކްޝަންސް ކޮމިޝަން (އީސީ) އިން ރޭ ބުނެފި އެވެ.
އީސީގެ އިސް އޮފިޝަލަކު "އަދަދު" އަށް ވިދާޅުވީ ރާއްޖޭގެ އެއްވެސް ސަރަހައްދެއްގައި ވޯޓާ ގުޅިގެން ހަމަނުޖެހުމެއް ވެސް ހިނގާފައި ނުވާ ކަމަށެވެ. ޝަކުވާތައް ހުށަހެޅި ނަމަވެސް އިންތިހާބުގެ ނަތީޖާއަށް އަސަރު ފޯރާވަރުގެ ޝަކުވާއެއް ހުށަހަޅާފައި ނުވާ ކަމަށް ވެސް އޭނާ ވިދާޅުވި އެވެ.
"ވޯޓްގެ ކަންކަން ދިޔައީ ވަރަށް ރަނގަޅަށް. ބޮޑު އެއްވެސް މައްސަލައެއް ކުރި މައްޗެއް ނުވޭ،" އޮފިޝަލް ވިދާޅުވި އެވެ.
ހުށަހަޅާފައިވާ ޝަކުވާތަކުގެ ތަފްސީލް ފަހުން ހާމަ ކުރައްވާނެ ކަމަށް ވެސް އޭނާ ވިދާޅުވި އެވެ.
އިދިކޮޅު ޕީޕީއެމް/ޕީއެންސީ ކޯލިޝަނުން އިއްޔެ ވަނީ މަނާ ގަޑީގައި ރައީސް އިބްރާހިމް މުހައްމަދު ސޯލިހް އާއި މަޖިލީހުގެ ރައީސް މުހައްމަދު ނަޝީދު ކެމްޕެއިން ކުރެއްވި ކަމަށް ބުނެ މައްސަލައެއް އީސީއަށް ހުށަހަޅާފަ އެވެ. ނަމަވެސް އެއީ ވެސް އިންތިހާބުގެ ނަތީޖާއަށް އަސަރު ކުރާނެ މައްސަލައެއް ނޫނެވެ.
އިންތިހާބާ ބެހޭ ގާނޫނު ބުނާ ގޮތުން އިއްޔެ އިރުއޮއްސި 6:00 ފެށިގެން ވޯޓްލުން ނިމެންދެން ކެމްޕެއިިން ކުރުމަކީ މަނާ ކަމެކެވެ.
އެކަމަކު، ރައީސް ވޯޓުލެއްވުމަށް ފަހު ނޫސްވެރިންނާ ބައްދަލު ކުރައްވާ ވާހަކަފުޅު ދައްކަވަމުން، އެމަނިކުފާނު ނިސްބަތްވާ އެމްޑީޕީއަށް މި އިންތިހާބު ކާމިޔާބު ކުރެވޭނެ ކަމަށް ވަނީ ވިދާޅުވެފަ އެވެ. އަދި ވީހާވެސް ގިނަ ބަޔަކު ވޯޓުލާން އެދިވަޑައިގަތެވެ.
ރައީސް ނަޝީދު ވެސް ވަނީ ވޯޓު ލެއްވުމަށް ފަހު ނޫސްވެރިންނާ ވާހަކަފުޅު ދައްކަވަމުން އެމްޑީޕީއަށް އިންތިހާބު ކާމިޔާބު ކުރެވޭނެ ކަމަށް ވިދާޅުވެފަ އެވެ. އަދި މާލޭގެ ގިނަ ވޯޓްލާ ސަރަހައްދުތަކަކަށް އެމަނިކުފާނު ވަޑައިގަތެވެ.
ލޯކަލް ކައުންސިލްތަކުގެ އިންތިހާބުގައި އިދިކޮޅު ކޯލިޝަނުން ވަނީ ކުރިން އެމްޑީޕީ ވަރުގަދަ މާލެ އާއި އައްޑޫ ފަދަ ސިޓީތަކުން ބޮޑު ކާމިޔާބީއެއް ހޯދައިފަ އެވެ. މާލޭގެ މޭޔަރުގެ ގޮނޑި ކާމިޔާބު ކުރެއްވީ ޑރ. މުހައްމަދު މުއިއްޒެވެ.
ކޮވިޑްގެ ސަބަބުން ރައްކާތެރިކަމުގެ ފިޔަވަޅުތަކާއެކު ބޭއްވި ލޯކަލް ކައުންސިލްތަކުގެ އިންތިހާބުގައި ވޯޓް ލުމަށް ގިނަ އަދަދެއްގެ ބަޔަކު ނުކުތްއިރު ފެނިގެން ގޮސްފައިވަނީ ސުލްހަވެރި އިންތިހާބެކެވެ. ބޮޑު ހަމަނުޖެހުމެއް ފަދަ އެއްވެސް ކަމެއް ރާއްޖޭގެ އެއްވެސް ސަރަހައްދެއްގައި ނުހިނގަ އެވެ.
