މާފުށީ ޖަލުގައި ހުކުމް ތަންފީޒުކުރައްވަމުން ގެންދަވާ ކުރީގެ ރައީސް އަބްދުالله ޔާމީންގެ މައްޗަށް އިތުރު ތަހުގީގެއް ހިންގަން ފަށަން ނިންމާފައިވާކަން ވަކީލުންނަށް މިއަދު އަންގާފައިވާ ކަމަށް އިދިކޮޅު ކޯލިޝަނުން ބުނެފި އެވެ.
ޔާމީންގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ. މުހައްމަދު ޖަމީލް އަހްމަދު ވިދާޅުވި ގޮތުގައި، ރައީސް ޔާމީންގެ މައްޗަށް ހިންގާ ތަހުގީގުގައި މާދަމާ ސުވާލު ކުރަން ހަމަޖެހިފައިވާކަން ވަކީލުންނަށް އަންގާފައިވާ ކަމަށެވެ. އެ ތަހުގީގުގައި ސުވާލުކުރަނީ މާފުށީ ޖަލުގައި ކަމަށާއި ނަމަވެސް، ދަތުރުކުރަން ދަތިތަކެއް ހުއްޓައި އެފަދަ ގޮތަކަށް އެކަން ކުރުމަކީ ކަންބޮޑުވުމެއް ކަމަށް އޭނާ ވިދާޅުވި އެވެ.
މި މައްސަލައިގައި އިދިކޮޅުން ބޭއްވި ނޫސްވެރިންގެ ބައްދަލުވުމެއްގައި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ޔާމީންގެ މައްޗަށް ކުއްލި ގޮތަކަށް ތަހުގީގު ހިންގަން އުޅެނީ އެމަނިކުފާނަށް ތާއީދު ކުރާ ރައްޔިތުންނަށް ހިތްދަތި ކަމެއް ދިނުމަށް ފަހު ވޯޓު އޮޅުވާލުމަށް ކަމަށެވެ.
"މިއީ ސީދާ ސަރުކާރުން ރާވައިގެން ރައީސް ޔާމީނަށް ދެމުންގެންދާ އަނިޔާ އިތުރަށް ވަރުގަދަ ކުރުމުގެ ގޮތުން ކުރާ ކަމެއް. މިކަމުގެ އަޑީގައި ހުރީ ރައީސް ސޯލިހާއި ރައީސް ނަޝީދުއާ ދެ ބޭފުޅުން،" ލީޑާޝިޕުން ބޭއްވި ނޫސްވެރިންގެ ބައްދަލުވުމުގައި އަދުރޭ ތުހުމަތު ކުރެއްވި އެވެ.
އޭނާ ވިދާޅުވި ގޮތުގައި ރައީސް ޔާމީންގެ މައްޗަށް ކުއްލި ތަހުގީގެއް ހިންގަން ފެށުމުން ހާމަ ވަނީ މިހާރު ކުރިއަށް ދާ އިންތިހާބު ސަރުކާރަށް ނާކާމިޔާބުވާނެ ކަމެވެ.
ރައީސް ޔާމީންގެ މައްޗަށް ތުހުމަތުކޮށް މާދަމާ ފަށަނީ ކޮން މައްސަލައެއްގެ ތަހުގީގެއް ކަމެއް އޭނާ ވިދާޅެއް ނުވެ އެވެ. ފުލުހުން ބުނީ ކޮންމެ ދުވަހަކު ވެސް ގިނަ މައްސަލަތައް ފުލުހުން ތަހުގީގު ކުރަމުން އަންނަ ކަމަށާއި އެ ތަފްސީލުތައް ހާމަނުކުރާ ކަމަށެވެ.
އަބްދުއްރަހީމް ވިދާޅުވީ މިއަދު ބޭއްވި އިންތިހާބުގައި ވޯޓްލުމުގެ ފުރުސަތު ވެސް ރައީސް ޔާމީނަށް ނުދެއްވި ކަމަށާއި އެކަން ކުރީ ސަރުކާރުން ރާވައިގެން ކަމަށެވެ. ނަމަވެސް ރައީސް ޔާމީނަށް ވޯޓުލުމަށް ރަޖިސްޓްރީވާން ފުރުސަތު ދެއްވުމުން އެ ފުރުސަތުގެ ބޭނުން އެމަނިކުފާނު ނުހިއްޕެވީ އަމިއްލަފުޅަށް ކަމަށް މައުލޫމާތު ލިބެ އެވެ.
ފަސް އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ރައީސް ޔާމީންގެ މައްޗަށް މަނީ ލޯންޑްރިންގެ އިތުރު ދައުވާއަކާއި ރިޝްވަތު ހިފުމުގެ ދައުވާއެއް ވެސް ވަނީ އުފުލައިފަ އެވެ.
