ލޯކަލް ކައުންސިލް އިންތިހާބުގައި ވޯޓުލާ ގަޑި އިރުއޮއްސި 6:00 އާ ހަމައަށް އިތުރު ކުރަން އިލެކްޝަންސް ކޮމިޝަން (އީސީ)ން ނިންމައިފި އެވެ.
އީސީން ކުރިން ނިންމާފައި އޮތީ، ހެނދުނު 7:00 އިން ފެށިގެން ހަވީރު 5:00 އާ ހަމައަށް ވޯޓުލުން ކުރިއަށް ގެންދާ ގޮތަށެވެ. އަދި އޭގެ ފަހުން، އިރުއޮއްސި 6:00 އާ ހަމައަށް ކޮވިޑް-19 އަށް ޕޮޒިޓިވް ވެގެން ނޫނީ ޕޮޒިޓިވް މީހަކާ ކޮންޓެކްޓް ވެގެން ވޯޓުލާ ގޮތަށެވެ.
އެގޮތަށް ހަމަޖެއްސީ، ކަރަންޓީނުގައި ތިބި މީހުން ވޯޓުލާންދާއިރު، އެހެން މީހުންނާ ބައްދަލުނުވާނެ ގޮތަށް އިންތިޒާމު ކުރުމަށެވެ.
އެކަމަކު ގައުމީ ލަފާ ދޭ ކޮމިޓީގެ ބައްދަލުވުމުގައި، ވޯޓުގެ ވަގުތާ ގުޅޭ ގޮތުން ބައެއް ޕާޓީތަކުން ވަނީ ކަންބޮޑުވުންފާޅުކޮށްފަ އެވެ.
އެ ކަންބޮޑުވުންތަކާ ގުޅިގެން އީސީގެ ރައީސް އަހުމަދު ޝަރީފް ވިދާޅުވީ، އާއްމު މީހުންނަށް ހަވީރު ފަހެއް ޖެހުމާ ހަމައަށް ވޯޓު ލެވޭ ގޮތަށް އޮތް ނަމަވެސް، ކަރަންޓީނުގައި ތިބި މީހުންނަށް އިރުއޮއްސި 6:00 އާ ހަމައަށް ވޯޓުލެވޭ ގޮތަށް އޮތިއްޔާ، އެންމެންނަށްވެސް އެ ފުރުސަތު ލިބެންވާނެ ކަމަށެވެ.
"އެހެންވީމާ، އެ ގަޑިއާ ހަމައަށް އެންމެންނަށް ވޯޓު ލެވޭނެ. ވޯޓު ފޮށި ބަންދުކުރާނީ، 6:00 ގައި ވޯޓުލާން އެއްވެސް މީހަކު ނެތިއްޔާ،" ޝަރީފް ވިދާޅުވި އެވެ.
ކަރަންޓީނުގައި ތިބި މީހުންގެ ޒިންމާ އެޗްޕީއޭ އިން ނަގަންޖެހޭ
އެ ބައްދަލުވުމުގައި ޝަރީފް ވިދާޅުވީ މިހާރު ކަރަންޓީނުވެފައި ތިބި މީހުންގެ ލިސްޓެއް ހެލްތު ޕްރޮޓެކްޝަން އޮތޯރިޓީ (އެޗްޕީ)އިން ނުދިން ކަމަށެވެ. އެކަމަށް ގާނޫނީ ހުރަހެއް އެބައޮތް ކަމަށް އެޗްޕީއޭ އިން ބުނެފައިވާ ކަމަށް އީސީން ބުންޏެވެ.
އެ ލިސްޓު ލިބުނު ނަމަ ކަރަންޓީނުގައި ތިބި މީހުންނަށް ވޯޓުލުމުގެ އިންތިޒާމް ހަމަޖައްސައި، އެމީހުންނަށް ގުޅައިގެން ވޯޓުލާން އަންނާނެތޯ ބަލައި، ޔަގީންކުރެވުނީސް ކަމަށް ޝަރީފް ވިދާޅުވި އެވެ.
"ގާނޫނާ ހަވާލާދީ އެޗްޕީއޭއިން މި ބުނަނީ ޕޮޒިޓިވް މީހުންގެ ލިސްޓެއް ނުދެވޭނެޔޭ. އެހެން ނޫން ނަމަ، އަޅުގަނޑުމެންގެ ފޯކަލް ޕޮއިންޓުންނަށް އެމީހުންނަށް ގުޅާފައި ބަލައިލެވޭނެ، ޕޮޒިޓިވް މީހަކު ވޯޓުލާން އަންނާނެތޯ ނޫންތޯ" ޝަރީފް ވިދާޅުވި އެވެ.
ވޯޓުލުމުގެ އިންތިޒާމްތަކުގައި އީސީގެ ރައީސް ޝަރީފް ހަރަކާތްތެރިވަނީ. -- ފޮޓޯ: ހުސެއިން ވަހީދު/އަދަދު
އެކަމަކު ޕޮޒިޓިވް މީހުންގެ ލިސްޓު ނުލިބޭއިރު، ކަރަންޓީނުގައި މިވަގުތު ތިބި މީހުންގެ ސީދާ އަދަދެއް ވެސް ނޭނގޭ ކަމަށް އިތުރަށް ވިދާޅުވި އެވެ.
އެކަމާ ގުޅިގެން އީސީގެ ނައިބު ރައީސް އިސްމާއިލް ހަބީބު ވިދާޅުވީ ކަރަންޓީނުގައި ތިބި މީހުންނަށް ވޯޓުލުމުގެ ފުރުސަތު ފަހިކޮށްދޭން އެޗްޕީއޭގެ ޒިންމާތަކެއް އެބަ އޮތް ކަމަށެވެ.
"ކަރަންޓީނުގައި ތިބި މީހުންނަށް ހަވީރު 5:00 އިން 6:00 އަށް ވޯޓުލެވޭނެ ފުރުސަތު ފަހިކޮށްދޭން އެޗްޕީއޭއިން އެބަޖެހޭ ޒިންމާ ނަންގަވަން،" ހަބީބު ވިދާޅުވި އެވެ.
މި އިންތިހާބުގައި ވޯޓުލީ މީހުންގެ ނިސްބަތް މެންދުރާ ހަމައަށް ވަރަށް މަދެވެ. އީސީން ލަފާކުރަނީ އިންތިހާބުގައި ވޯޓުލާނީ ގާތްގަނޑަކަށް 40 ޕަސަންޓު މީހުން ކަމަށެވެ.
ވޯޓުލާ މަރުކަޒުތަކުގައި ރައްކާތެރިކަމުގެ ރަނގަޅު ފިޔަވަޅުތައް އަޅާފައިވާކަން ފާހަގަކުރަމުން، އީސީން ވަނީ ވީހާވެސް ގިނަ ބަޔަކު ވޯޓުލާން ނުކުތުމަށް އިލްތިމާސްކޮށްފަ އެވެ.
