އެސްޓީއޯގެ އަމާޒަކީ އަންނަ އަހަރުގެ ފުރަތަމަ ކުއާޓަރުގެ ތެރޭގައި އާންމުންނަށް ޑިޖިޓަލް ބޭންކިން ހިދުމަތް ދޭން ފެށުން ކަމަށް ކުންފުނީގެ މެނޭޖިން ޑިރެކްޓަރު ހުސެއިން އަމްރު ވިދާޅުވެއްޖެ އެވެ.
"އަދަދު" އަށް ދެއްވި ހާއްސަ އިންޓަވިއުއެއްގައި އެސްޓީއޯ އިން ޑިޖިޓަލް ބޭންކިން ދާއިރާއަށް ނުކުންނަން ކުރަމުންދާ މަސައްކަތާ ގުޅޭ ގޮތުން އަމްރު ވިދާޅުވީ، މިހާރު އެކަމަށް ބޭނުންވާ މާކެޓް ސްޓަޑީ ނިމިފައިވާ ކަމަށެވެ.
މި މާކެޓް ސްޓަޑީއަކީ މިދިޔަ މަހު އެސްޓީއޯ އިން ސީޑީއީ ކޮންސަލްޓަންސީ އާ ގުޅިގެން ރާއްޖޭގެ ބޭންކިން ނިޒާމާ ގުޅޭގޮތުން ކުރި ސާވޭއެކެވެ.
އަމްރު ވިދާޅުވީ މި މާކެޓް ސްޓަޑީ ހެދުމަށް ފަހު ބޭރު ބަޔަކާ ގުޅިގެން ކުރެވުނު އިތުރު ދިރާސާތަކުގެ އަލީގައި ބޭންކުން އިތުރު ޑޮކިއުމެންޓޭޝަން ފުރިހަމަ ކޮށްފައިވާ ކަމަށެވެ.
އަދި މިހާރު ރާވާފައިވަނީ ވީހާވެސް އަވަހަކަށް މި މަސައްކަތް ކުރިއަށް ގެންގޮސް ރައްޔިތުންނާ ހަމައަށް މި ހިދުމަތް ފޯރުކޮށްދިނުން ކަމަށް އޭނާ ވިދާޅުވި އެވެ.
އަޅުގަނޑުމެން ޕްލޭން ކުރަނީ ވަރަށް އަވަހަށް މަސައްކަތްތައް ބާރަށް ގެންގޮސް، އަޅުުގަނޑުމެންގެ ޕްލޭންއަކީ އަސްލުގައި ފަށަން އަންނަ އަހަރުގެ ފުރަތަމަ ކުއާޓާ. އެއީ ރައްޔިތުންނާ ހިސާބަށް ހިދުމަތް ދެވޭނެ ދުވަހަކީ
މިއީ އެސްޓީއޯ އިން ޒަމާނީ ހިދުމަތްތައް ތައާރަފުކޮށް، ކުންފުނީގެ މާލީ ވިޔަފާރި އިތުރަށް ފުޅާކުރުމުގެ ގޮތުން ކުރާ މަސައްކަތެކެވެ.
އެސްޓީއޯ އަކީ ދައުލަތް ހިއްސާވާ ކުންފުނިތަކުގެ ތެރެއިން، މިހާރު ވެސް އެންމެ ގިނަ ވިޔަފާރީގެ ހަރަކާތްތައް ހިންގާ ކުންފުންޏެވެ.
އޭގެ ތެރޭގައި ޕެޓްރޯލާއި ޑީސަލުން ފެށިގެން ގޮސް ބޭހާއި ކާޑުގެ ބާވަތްތަކާއި އެހެނިހެން ކާބޯތަކެއްޗާއި ކޮންސްޓްރަކްޝަން ސާމާނު ހިމެނެ އެވެ.
