މޯލްޑިވްސް އިސްލާމިކް ބޭންކް (އެމްއައިބީ) އިން ވިސާ ޑެބިޓް ގޯލްޑް އަދި ވިސާ ޑެބިޓް ޕްލެޓިނަމް ކާޑް ތައާރަފުކޮށްފި އެވެ.
އެމްއައިބީން ބުނީ ރާއްޖޭގެ ހުރިހާ ސަރަހައްދެއްގައި ހުރި ވިސާ ބަލައިގަންނަ ޕީއޯއެސް މެޝިންތަކާއި އޭޓީއެމް މެޝިންތަކުން މި ކާޑު ބަލައިގަންނާނެ ކަމަށެވެ. އަދި ޑޮމެސްޓިކް އޮންލައިން ޕޭމަންޓް ޕްލެޓްފޯމްތަކުގައި ވެސް މި ކާޑު ބޭނުން ކުރެވޭނެ އެވެ.
އިގްތިސޯދީ ހާލަތުގެ ސަބަބުން މިހާރު މި ކާޑުތައް އިންޓަނޭޝަނަލް ޓްރާންސެކްޝަންތަކުގައި ބޭނުން ނުކުރެވުނު ނަމަވެސް، މިހާރަށް ވުރެ އިގްތިސާދީ ހާލަތު ރަނގަޅު ވުމުން އެ ނިންމުން މުރާޖައާ ކުރަނާ ކަމަށް އެމްއައިބީން ވަނީ މައުލޫމާތު ދީފަ އެވެ.
އެމްއައިބީ ވިސާ ޑެބިޓް ގޯލްޑް
އެމްއައިބީގެ ވިސާ ޑެބިޓް ގޯލްޑް ކާޑު ތައާރަފުކުރީ އެ ބޭންކުގެ އާ "އެވްރީޑޭ" ބްރޭންޑިންގެ ދަށުންނެވެ. މި ކާޑު ބޭނުންކޮށްގެން ވިޔަފާރި ކުރާ ފަރާތްތަކަށް "އެވްރީޑޭ ބެނެފިޓްސް"ގެ ނަމުގައި އެކްސްކްލޫސިވް ޑިސްކައުންޓްތަކާއި ސްޕެޝަލް އޮފާތައް ލިބޭނެ އެވެ. އަދި ކުރިއަށް އޮތް ދުވަސްތަކުގެ ތެރޭގައި އިތުރު ހިދުމަތްތައް ތައާރަފުކުރާނެ ކަމަށް ވެސް އެމްއައިބީން ބުންޏެވެ.
އެމްއައިބީން ބުނީ، ވިސާ ޑެބިޓް ގޯލްޑް ކާޑުން ލިބޭ އެވްރީޑޭ ބެނެފިޓްސް އާ ގުޅޭ އިތުރު މައުލޫމާތު އެކަމަށް ހާއްސަ ކުރެވިފައިވާ އެ ބޭންކުގެ ވެބްސައިޓް mib.mv/everyday އިން ފެންނަން ހުންނާނެ ކަމަށެވެ.
އެ ސައިޓުން ފެންނަން ހުރި މައުލޫމާތަށް ބަލާއިރު، މިހާރު ވެސް ގިނަ ވިޔަފާރިތަކަކާއި ގުޅިގެން ބޮޑެތި ޑިސްކައުންޓްތަކާއި ހާއްސަ އޮފާތަކެއް ވަނީ ހުޅުވާލާފަ އެވެ. އަދި މާލޭގެ އިތުރުން، އަތޮޅުތެރޭގެ އެކި ވިޔަފާރިތަކުން ވެސް ވަނީ މި ސްކީމްގައި ބައިވެރިވެފަ އެވެ.
އެމްއައިބީ ވިސާ ޑެބިޓް ޕްލެޓިނަމް
އެމްއައިބީގެ ވިސާ ޑެބިޓް ޕްލެޓިނަމް ކާޑަކީ، އެ ބޭންކުގެ ޕްރިމިއަމް އޮފަރިން އެވެ. މިއީ އެ ބޭންކުން އިންވިޓޭޝަން އުސޫލުން ދޫކުރަން ނިންމާފައިވާ ކާޑެކެވެ. މިއީ ބޭންކުގެ ޕްރިމިއަމް ކަސްޓަމަަރުންނަށް ހާއްސަކޮށް އެމްއައިބީން ތައާރަފުކުރި ކާޑެކެވެ. މި ކާޑުގައި ވެސް ގިނަ ބެނެފިޓްތަކެއް އެކުލެވޭނެ ކަމަށް ބޭންކުން ވަނީ ބުނެފަ އެވެ.
