ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން، ލީގުގެ ދެ ވަނައިގައި އޮތް އޮޑި ސްޕޯޓްސް ކްލަބް ކުޅުނު މެޗުން ބުރު ސްޕޯޓްސް ކްލަބާ 1-1 އިން އެއްވަރުވުމުން، ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަށް ލީގު ޗެމްޕިއަންކަން ޔަގީންވެއްޖެ އެވެ.

މާޒިޔާ އިން ޖެހިޖެހިގެން ފަސް ވަނަ ސީޒަނުގައި ރާއްޖޭގެ ލީގު ޗެމްޕިއަންކަން ހޯދިއިރު، މިއީ އެ ޓީމުން ލީގު ކާމިޔާބުކުރި ހަ ވަނަ ފަހަރެވެ. އެންމެ ފުރަތަމަ ލީގު ނެގީ 2016 ވަނަ އަހަރު އެވެ.

ލީގުގެ އެއް ވަަނައިގައި އޮތް މާޒިޔާ އަށް 16 މެޗުން 44 ޕޮއިންޓް ލިބިފައިވާއިރު، އޮޑިން މިއަދު ބުރުއާ އެއްވަރުވުމުން، 17 މެޗުން ހަމަކުރެވުނީ 39 ޕޮއިންޓެވެ. މާނަ އަކީ ބާކީ އޮތް މެޗުން މޮޅުވެގެން ވެސް މާޒިޔާއާ ހަމަނުކުރެވުމެވެ. މިއާ އެކު، ލީގުގައި، މިރޭ މާޒިޔާ އިން ނިއު ރޭޑިއަންޓް ސްޕޯޓްސް ކްލަބާ ދެކޮޅަށް ނުކުންނާނީ ވެސް ޗެމްޕިއަނުންގެ ގޮތުގަ އެވެ. ނިއުގެ ކޯޗަކަށް ހުރީ މާޒިޔާ އަށް އެންމެ ފުރަތަމަ ލީގު ކާމިޔާބު ކޮށްދިން ކޯޗު އަލީ ސުޒޭން އެވެ.

ގަލޮޅު ދަނޑުގައި މިއަދު ކުޅުނު މެޗުގައި ބުރުން އަށް ވަަނަ މިނިޓްގައި ލީޑުނެގީ އެ ޓީމުގެ ޝަމްވީލް މުހައްމަދު (ބޮންޑާ) ޖެހި ގޯލުންނެވެ. ބުރުގެ އަލީ ހަމްދާން ނެގި ކޯނަރަކުން އޮޑީގެ ކުޅުންތެރިންނަށް ޑިފެންސް ނުކުރެވިގެން ލިބުނު ފުރުސަތުގައި ކުޑަ އޭރިއާތެރެއިން ޝަމްވީލް ވަނީ ގޯލަށް ފޮނުވާލައިފަ އެވެ.

އޮޑިން އެއްވަރުކުރީ މެޗުގެ 57 ވަނަ މިނިޓްގައި އެ ޓީމުގެ އިނގިރޭސި ފޯވާޑް، ކިއާނޫ މާޝް ބްރައުން ޖެހި ގޯލުންނެވެ. އެ ޓީމުގެ މުޒްދާން ހަސަން ބޯޅަ ހިފައިގެން އޭރިއާތެރެއަށް ވަދެ ދިން ބޯޅަ ބްރައުން ވަނީ ތިރީ ކަނަށް ފޮނުވާލައިފަ އެވެ.

ބުރުން ލީގުގެ ހަތަރެއްގައި އޮތީ 37 މެޗުން 29 ޕޮއިންޓާ އެކު އެެވެ.