ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުގައި ވިކްޓަރީ ސްޕޯޓްސް ކްލަބް 3-0 އިން ބަލިކޮށް މާޒިޔާ ސްޕޯޓްސް އެންޑް ރެކްރިއޭޝަން އިން ލީގު ޗެމްޕިއަންކަން ހޯދުމުގެ ފުރުސަތު ބޮޑުކޮށްފި އެވެ.
އެންމެ ފަހުން ހަތަރު ފަހަރުގެ ލީގު ޗެމްޕިއަން، މާޒިޔާ އިން މި މެޗުގެ ނަތީޖާއާ އެކު، ލީގުގެ އެއް ވަަނައިގައި އޮތީ 14 މެޗުން 40 ޕޮއިންޓާ އެކު، 11 ޕޮއިންޓުގެ ލީޑެއް ނަގައިގެންނެވެ. ދެ ވަނައިގައި އޮތް އޮޑި ސްޕޯޓްސް ކްލަބަށް 13 މެޗުން ވަނީ 29 ޕޮއިންޓް ލިބިފަ އެވެ. އަދި، ތިން ވަނައިގައި، އޮތް ނިއު ރޭޑިއަންޓް ސްޕޯޓްސް ކްލަބަށް ވަނީ 13 މެޗުން 24 ޕޮއިންޓް ލިބިފަ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި، ވިކްޓަރީ ކޮޅަށް މާޒިޔާ އިން ލީޑުނެގީ މެޗުގެ 54 ވަނަ މިނިޓްގަ އެވެ. މިއީ، ހުސެއިން ސިފާއު ޔޫސުފް (ކުރޯ) ނެގި ހުރަހަކަށް އަރައި، އަހުމަދު އައިހަމް (ފަތޯ) ޖެހި ގޯލެކެވެ. އޭގެ ދިހަ މިނިޓް ފަހުން މާޒިޔާގެ ދެ ވަނަ ލަނޑު ޖެހީ ޕެނަލްޓީ އަކުން ހަމްޒާ މުހައްމަދު (ހަމްޕު) އެވެ. މި ޕެނަލްޓީ އަކީ، މާޒިޔާގެ ހަސަން ނަޒީމް ގާސިމް (ޗޯޓު) އަށް އޭރިއާތެރެއިން ވިކްޓަރީގެ އަހުމަދު ފިރާޝް ކުރި ފައުލަކަށް ދިން ޕެނަލްޓީ އެކެވެ.
ދެ ވަނަ ގޯލު ޖެހިތާ ހަތަރު މިނިޓް ފަހުން، މާޒިޔާ އިން ވަނީ ތިން ވަނަ ލަނޑު ޖަހައިފަ އެވެ. މިއީ، މެޗުގެ 68 ވަނަ މިނިޓްގައި، މުހައްމަދު އިލާން އިމްރާން ޖެހި ގޯލެކެވެ. ހަމްޕު ހިލޭ ޖެހުމަކުން ފޮނުވާލި ބޯޅަ ވިކްޓަރީގެ ނޭޕާލް ކީޕަރު، ކިރަން ކުމާރް އަތުގައި ޖެހިފައި ނުކުތް ވަގުތު އިލާން ވަނީ ރަނގަޅުތަނުގައި ހުރެ ގޯލަށް ބޯޅަ ފޮނުވާލައިފަ އެވެ.
މި ނަތީޖާއާ އެކު ވިކްޓަރީ އޮތީ ލީގުގެ 14 މެޗުން ލިބުނު 20 ޕޮއިންޓާ އެކު، ފަސް ވަނައިގަ އެވެ. ހަ ވަނައިގައި އޮތް އީގަލްސް އަށް 13 މެޗުން 19 ޕޮއިންޓް ލިބިފައިވާއިރު، އީގަލްސް މޮޅުވެއްޖެނަމަ ފަސް ވަނަ އަށް އަރާނެ އެވެ.
ލީގުގައި މިރޭ ޔުނައިޓެޑް ވިކްޓަރީ (ޔޫވީ) އިން ނުކުންނާނީ ކްލަބް އީގަލްސްއާ ދެކޮޅަށެވެ.
