ދިރާގު ދިވެހި ޕްރިމިއާ ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަންގެ ހަމްޒާ މުހައްމަަދު (ހަމްޕު)، ފަހު ވަގުތު ޖެހި ގޯލުން 1-0 އިން އޮޑި ސްޕޯޓްސް ކްލަބް ބަލިކޮށް ރެކޯޑް ދަމަހައްޓައި، އެއް ވަނައިގައި ލީޑު ފުޅާކޮށްފި އެވެ.
މި މޮޅާ އެކު، މާޒިޔާ އިން ދަމަހައްޓަމުން އައި ސައްތަ އިން ސައްތަ މޮޅުވުމުގެ ރެކޯޑް އިތުރަށް ދަންމާލައިފައި މި ވަނީ ހަތް ވަނަ މެޗުން ވެސް މޮޅުވެ، 21 ޕޮއިންޓް ހޯދައިގެންނެވެ. ލީގު ތާވަލުގެ ދެ ވަނައިގައި އޮތް އޮޑި އަށް ހަތް މެޗުން 16 ޕޮއިންޓް ލިބިފައިވާއިރު، ތިން ވަނައިގައި އޮތް ނިއު ރޭޑިއަންޓް އަށް ހަ މެޗުން ވަނީ 16 ޕޮއިންޓް ލިބިފަ އެވެ. އޮޑި ކުރީގައި އޮތީ ޖެހި ގޯލުންނެވެ.
ގަލޮޅު ދަނޑުގައި މިރޭ ކުޅުނު މެޗުގައި ދެ ޓީމަށް ވެސް ފުރަތަމަ ހާފުގައި ލަނޑު ޖަހާނެ ރަނގަޅު ފުރުސަތުތަކެއް ލިބި ބޭނުން ނުކުރެވުނެވެ.
އެ ގޮތުން، ފުރަތަމަ ހާފުގައި ލިބުނު ފުރުސަތުތަކަށް ބަލާއިރު، އޮޑި އަށް ކުޅޭ ލިތުއޭނިއާގެ ފޯވާޑް ކަރޮލިސް ލައުކްޒެމިސް އާއި އަހުޒަމް ރަޝީދު (އަހު) އާއި މުޒްދާން ހަސަން އަށް ލިބުނު ބޯޅަތަކުގައި އެޓޭކްކުރެވޭތޯ ބެލި އެވެ. އެހެން ނަމަވެސް، މާޒިޔާގެ ޕޯޗުގީސް ޑިފެންޑަރު، ލުއިޒް އަލްމައިޑާ އާއި ކީޕަރު ހުސެއިން ޝަރީފް (ކީޕަރު ހުސެން) ވަނީ އޮޑިން ލަނޑެއް ޖެހޭތޯ ކުރި މަސައްކަތްތައް ހުއްޓުވައިފަ އެވެ.
ފުރަތަމަ ހާފާ ހިލާފަށް ދެ ވަނަ ހާފުގައި މާޒިޔާ އިން ގިނަ އެޓޭކްތަކެއްކޮށް އޮޑީގެ ގޯލަށް ނުރައްކާތެރި ގިނަ ހަމަލާތަކެއް ފޮނުވާލި އެވެ. އެ ގޮތުން، ހަމްޕު އާއި ގާނާގެ މިޑްފީލްޑަރު، ރޭގަން އޮބެން ފޮނުވާލި ހަމަލާތައް އޮޑީގެ ކީޕަރު މުހައްމަދު ޝަފީއު (ޗެކް) ވަނީ މަތަކޮށްފަ އެވެ. މީގެ ތެރެއިން ހާފުގެ މެދެއްހާ ހިސާބު އަރިމަތިން އޮބެން ފޮނުވާލި ބޯޅަ ކީޕަރު ޝަފީއު މަތަކުރިއިރު، އެ ބޯޅަ ކުޅުމުގެ ތެރެއަށް އައިސް، މާޒިޔާގެ ސްޕެއިން ފޯވާޑް، ސާޖިއޯ މެންޑީ އަށް ލިބުމުން ޖެހި ޝޮޓް ދިޔައީ ހުރަސްދަނޑިމަތިންނެވެ.
އިތުރު ވަގުތުގެ ގޮތުގައި ދިން ފަސް މިނިޓްގެ ތެރެއިން، ހަތަރު ވަނަ މިނިޓްގައި އޮޑީގެ ދެ ކުޅުންތެރިން ކައިރިން ނައްޓާފައި، ހަމްޕު ފޮނުވާލި ބޯޅަ ކީޕަރު ޝަފީއު މަތަކުރި އެެވެ. އެކަމަކު، އޭގެ އިރުކޮޅެއް ފަހުން، ހަމްޕު އަށް ލިބުނު ފުރުސަތުގައި، މި ފަހަރު، އޭނާ ވަނީ، ކީޕަރު ޝަފީއު ކައިރިން ނައްޓައިފައި ގޯލަށް ބޯޅަ ފޮނުވާލައިފަ އެވެ.
ގޯލު ޖަހަން ހަމްޕު، އެ ބޯޅަ ލިބުމުން ކޮންޓްރޯލް ކުރިއިރުު، އޮޑީގެ ކުޅުންތެރިން ތިބީ އޮފްސައިޑް ކަމަށް ބަލައިގެންނެވެ. އެކަމަކު، ރަނގަޅު ތަނުގައި ހުރެ، ލިބުނު ފުރުސަތުގެ ބޭނުންހިފައި ހަމްޕު ވަނީ މާޒިޔާ އަށް މުހިންމު މޮޅެއް ހޯދައިދީފަ އެވެ.
މިއީ، މި ފަހަރުގެ ލީގުގައި އޮޑި ބަލިވި ފުރަތަމަ މެެޗެެވެ. މި އަހަރު އަލަށް ފުރަތަމަ ޑިވިޝަނުގައި ކުޅޭ އޮޑިން ލީގުގައި އަންނަނީ ސްޕެއިނުގެ ކޯޗު، އަންދްރޭ ގާސިއާގެ ކޯޗުކަމުގައި މޮޅު ކުޅުމެއް ދައްކަމުންނެެވެ.
މާޒިޔާގެ ކޯޗު ލުއިސްމާ ހެނާންޑޭޒްގެ އިރުޝާދުގެ ދަށުން އެ ޓީމުން މި ފަހަރުގެ ލީގު ކަޕާއި ޗެރިޓީ ޝީީލްޑް ކާމިޔާބުކޮށް، ލީގުގައި މި އަންނަނީ މޮޅުވުމުގެ ފުރިހަމަ ރެކޯޑެއް ދަމަހައްޓަމުންނެވެ.
