ކުރީ ސަރުކާރުން ވިއްކި 500 މިލިއަން ޑޮލަރުގެ ސުކޫކުގެ ކޫޕަން ޕޭމަންޓުގެ ގޮތުގައި އިންވެސްޓަރުންނަށް ދައްކަން ޖެހޭ 25 މިލިއަން ޑޮލަރު ދައްކާފައިވާ ކަމަށް ފިނޭންސް މިނިސްޓްރީން މިއަދު ބުނެފި އެވެ.

މި 25 މިލިއަން ޑޮލަރަކީ އަންނަ އޭޕްރިލްގައި ސުކޫކުގެ ޕްރިންސިޕަލްގެ ގޮތުގައި ދައްކަން ޖެހޭ 500 މިލިއަން ޑޮލަރާއި އެއާ އެކީ ދައްކަން ޖެހޭ ކޫޕަން ޕޭމަންޓުގެ ކުރިން ފަހުގެ ކޫޕަން ޕޭމަންޓެވެ.

މިކަން ހާމަކޮށް ފިނޭންސުން ނެރުނު ކުރު ބަޔާނެއްގައި ވަނީ އަންނަ އަހަރު މި 525 މިލިއަން ޑޮލަރު ވެސް ދައްކާނެ ކަމުގެ ޔަގީންކަން އިންވެސްޓަރުންނަށް އަރުވާފަ އެވެ. އަދި މިހާތަނަށް އެ ސުކޫކާ ގުޅިގެން ދައްކަން ޖެހުނު އެއްވެސް ކޫޕަން ޕޭމަންޓެއް ވެސް ލަސްނުވެ ދައްކަމުން އައިސްފައިވާ ކަން ފިނޭންސުން ފާހަގަކުރި އެވެ.

"ޒިންމާދާރު ގޮތެއްގައި ދަރަނި މެނޭޖްކުރުމަށް ސަރުކާރުން ދޭ އަހައްމިއްޔަތުކަން އަލުން ހާމަކޮށް، އަންނަ އަހަރު ސުކޫކުގެ އެންމެ ފަހުގެ އެ ސެޓްލްމަންޓަށް ތައްޔާރުވަމުންދާއިރު، މާލީ ހަރުދަނާކަމާއި ދަރަނި އަދާކުރުމުގެ ގާބިލުކަން ދެމެހެއްޓުމަށް ސަރުކާރުން ފިޔަވަޅުތައް އަޅަމުންގެންދާނެ،" ފިނޭންސުން ބުންޏެވެ.

އަންނަ އަހަރު ސުކޫކުގެ ދަރަނި އަދާކުރުމުގެ ޔަގީންކަން ފިނޭންސުން ދިން ނަމަވެސް، މިކަން ކުރާނެ ކަމަށް ބުނި ޕްލޭނާ އެއްގޮތަށް މަސައްކަތެއް ނުހިނގަ އެވެ. މި އަހަރަށް ފާސްކުރި ބަޖެޓުގައި އޮތީ މި ސުކޫކު ރީފައިނޭންސް ކުރަން އިތުރު ސުކޫކެއް ވިއްކާ ގޮތަށެވެ.

ނަމަވެސް ސުކޫކު ދައްކަން ފަސް މަހަށް ވެފައިވާއިރު، ރީފައިނޭންސް ކުރުމުގެ މަސައްކަތެއް ހިނގާ ކަމެއް އަދި ނުހިނގާ ކަމެއް ވެސް ނޭނގެ އެވެ.

ރާއްޖެއިން މި ވަގުތު ސުކޫކެއް ވިއްކަން ބަލާއިރު، އެންމެ ބޮޑު ހުރަހަކަށް އޮތީ ރާއްޖޭގެ ކްރެޑިޓް ރޭޓިން އެވެ. ބޮޑެތި ރޭޓިން އެޖެންސީތަކުން ވަނީ ރާއްޖެއަށް ދަރަނި ނުދެއްކޭނެ ކަމުގެ ބިރު ބޮޑު ކަމަށް ރޭޓިން ދަށްކޮށްފަ އެވެ. މި ހާލަތުގައި ބާޒާރަށް ދާން ގޮންޖެހުން ބޮޑު ވާނެ އެވެ.

ސުކޫކުގެ އިތުރުން އަންނަ އަހަރު އެހެން ލޯނުތަކަށް ދައްކަން ޖެހޭ 500 މިލިއަން ޑޮލަރު ހިމެނޭހެން އެއް ބިިލިއަން ޑޮލަރުގެ ދަރަނި އަދާކުރަން ޖެހެ އެވެ. އަދި މި އަހަރު ވެސް ގާތްގަނޑަކަށް މި ވަރުގެ އަދަދެއް ދަރަނި ދައްކާށާއި ދަރަނީގެ އިންޓްރެސްޓު އަދާކުރަން ހަރަދު ކުރަން ޖެހެ އެވެ.