ދެވަނަ ބުރު އުވާލައި ޕްރިފެރެންޝަލް ވޯޓަކުން ސަރުކާރެއް އެކުލަވައިލުމަށް ތާއީދު ކުރައްވާ ކަމަށް ކުރީގެ ރައީސް، މުހައްމަދު ނަޝީދު މިއަދު ވިދާޅުވެއްޖެ އެވެ.
އެމަނިކުފާނުގެ ރަސްމީ އެކްސް އެކައުންޓުން މިއަދު ކުރެއްވި ޕޯސްޓެއްގައި ވިދާޅުވީ ޕްރިފެރެންޝަލް ވޯޓާއެކު ނަމަ ރިޔާސީ އިންތިހާބުގެ އެއްބުރުން ވޯޓުލައި ސަރުކާރެއް އެކުލަވައިލުމަކީ ރަނގަޅު ކަމެއް ކަމަށް ދެކެވަޑައިގަންނަވާ ކަމަށެވެ.
"ޕްރިފެރެންޝަލް ވޯޓާއެކު ނަމަ އެއްބުރުން ވޯޓުލައި ސަރުކާރެއް އެކުލަވައިލާ އުސޫލަކީ ރަނގަޅު އުސޫލެއް ކަމަށް އަޅުގަނޑު ވެސް ދެކެން،" ނަޝީދު ކުރެއްވި ޕޯސްޓުގައި ލިޔުއްވާފައިވެ އެވެ.
ނަޝީދު މިފަދަ ޕޯސްޓެއް ކުރައްވާފައި މިވަނީ ރިޔާސީ އިންތިހާބުގެ ދެވަނަ ބުރު އުވާލައި ފުރަތަމަ ބުރުން ރައީސަކު ހޮވޭ ގޮތަށް ގާނޫނުއަސާސީ ބަދަލުކުރަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަސައްކަތް ފަށްޓަވާފައިވާ ދަނޑިވަޅެއްގަ އެވެ. އެމަނިކުފާނު ވަނީ ވެރިކަން ކުރާ ޕީއެންސީ މެންބަރުންގެ އަރިހުން އެގޮތަށް އެކަން ކުރެއްވުމަށް ވެސް އެދިވަޑައިގެންފަ އެވެ.
ނަމަވެސް ރިޔާސީ އިންތިހާބުގެ ދެވަނަ ބުރު އުވައިލަން ރައީސް މަސައްކަތް ފެށްޓެވުމާއެކު ގިނަބަޔަކު ދަނީ އެކަމާ ދެކޮޅަށް އަޑުއުފުލަމުންނެވެ. އެގޮތުން އެމީހުން ބުނަމުން ދަނީ ރިޔާސީ އިންތިހާބުގައި ވޯޓުލާ މީހުންގެ 50 ޕަސެންޓު ނުލިބޭ ވެރިއަކަށް ވެރިކަން ލިބޭ ގޮތް ހެދުމަކީ ތާކުންތާކު ޖެހޭ ކަމެއް ނޫން ކަމަށެވެ.
ގާނޫނުއަސާސީގައި މިހާރު އޮންނަ ގޮތުން ރިޔާސީ އިންތިހާބުގެ ފުރަތަމަ ބުރުގައި ވާދަކުރާ ކެންޑިޑޭޓުންގެ ތެރެއިން ބޭފުޅަކު 50 ޕަސެންޓުގެ އިތުރަށް އެއް ވޯޓު ނުހޯއްދަވާ ނަމަ ދެވަނަ ބުރަކަށް ދާން ޖެހެ އެވެ. ދެވަނަ ބުރަށް ދަނީ ފުރަތަމަ ބުރުގައި އެންމެ ގިނައިން ވޯޓު ލިބިވަޑައިގެންނެވި ދެ ކެންޑިޑޭޓުންނެވެ.
ނަޝީދު ތާއީދު ކުރެއްވި ޕްރިފެރެންޝަލް ވޯޓަކީ މިހާރު ވެސް ދުނިޔޭގެ ގައުމުތަކުގައި އަމަލު ކުރަމުން އަންނަ ގޮތެކެވެ. ޕްރިފެރެންޝަލް ވޯޓެއްގައި ނަމަ، އެ އިންތިހާބަކަށް ކުރިމަތިލާފައި ތިބޭ ކެންޑިޑޭޓުންގެ ތެރެއިން އެމީހަކު ވެރިކަމަށް ގެންނަން ބޭނުންވާ ތަރުތީބަކުން ހުރިހާ އެންމެންނަށް ކޮންމެ މީހަކު ވެސް ވޯޓު ދޭން ޖެހޭނެ އެވެ.
އެފަދަ ވޯޓެއްގައި ފުރަތަމަ ގުނާނީ ވޯޓުލީ މީހުން އެންމެ ފުރަތަމަ، އެއްވަނައަށް ވެރިކަމަށް ގެންނަން ބޭނުންވާ ކަމަށް ޖަހާފައިވާ ނަންބަރެވެ. އެ އަދަދު ގުނާއިރު، 50 ޕަސެންޓު ހަމަނުވެއްޖެ ނަމަ ދެން ގުނާނީ ދެވަނައަށް ވެރިކަމަށް ގެންނަން މީހުން ފާހަގަ ޖެހި ވޯޓުތަކެވެ. އެގޮތަށް ގުނަން ފަށާނީ އެންމެ މަދުން ވޯޓު ލިބުނު ކެންޑިޑޭޓުން ބާކީ ކުރުމަށްފަހު އެވެ.
