ކުޑަ އަންހެން ކުއްޖަކަށް ޖިންސީ ގޯނާ ކުރި ކަމުގެ ތުހުމަތު ކުރެވޭ މާލޭ ސަރަހައްދުގެ ސްކޫލެއްގައި ކިޔަވައިދޭ އިސްލާމް ޓީޗަރެއްގެ މައްސަލަ ތިލަވިތާ މަހަކަށް ވުރެ ގިނަ ދުވަސްވީ ފަހުން، އޭނާ ސަސްޕެންޑުކޮށްފި އެވެ.

މި މައްސަލައިގެ މައުލޫމާތު އެނގޭ މަސްދަރުތަކުން "އަދަދު" ނޫހަށް ކަށަވަރުކޮށް ދިން ގޮތުގައި ތުހުމަތު ކުރެވޭ ޓީޗަރު ސަސްޕެންޑު ކުރީ އިއްޔެގެ މެންދުރު ފަހުގެ ވަގުތެއްގަ އެވެ.

އޭނާގެ މައްސަލަ ފުލުހުން އޮތީ ޕްރޮސިކިއުޓާ ޖެނެރަލްގެ އޮފީހަށް ވެސް ފޮނުވައިފަ އެވެ. ނަމަވެސް ދައުވާކުރުމާމެދު އަދި ގޮތެއް ނުނިންމާ ކަމަށް އަދަދު ނޫހަށް މައުލޫމާތު ދިން މަސްދަރަކުން ބުންޏެވެ.

މި މައްސަލަ ޕޮލިހަށް ހުށަހެޅީ މިދިޔަ ޖެނުއަރީ މަހު މެދެއްހައި ހިސާބު އެވެ. އެޑިއުކޭޝަން މިނިސްޓްރީގެ ސަމާލު ކަމަށް ފުލުހުން މައްސަލަ އޭރު ގެނެސްފައިވެ އެވެ.

އަނިޔާ ލިބުނު އުމުރުން 11 އަހަރުގެ ދަރިވަރަކީ، ތުހުމަތުވާ ޓީޗަރާ އާއިލީ ގޮތުން ގުޅުން އޮތް ކުއްޖެކެވެ.

މި މައްސަލައިގައި ޓީޗަރާ މެދު ފިޔަވަޅެއް އެޅުން އަސްވެގެން ދިޔައީ އޭނާ އާއި ސަރުކާރުގެ ބައެއް ވެރިންނާ އޮތް ގުޅުމުގެ ވަރުގަދަ ކަމުން ކަމަށް، ޖިންސީ ގޯނާ ލިބުނު ކުޑަ އަންހެން ކުއްޖާގެ އާއިލާ މީހުން ގަބޫލުކުރެ އެވެ.