ތިން މިނިސްޓްރީއެއް ހުންނަ އިމާރާތްތައް އަނދައި އަޅިއަށްވި އަލިފާނުގެ ހާދިސާގެ ތަހުގީގަށް ފަންނީ އެހީތެރިކަން ދެނީ އިންޑިއާގެ ތަޖުރިބާކާރުންގެ ޓީމަކުން ކަމަށް ކޮމިޝަނާ އޮފް ޕޮލިސް (ސީޕީ) އަލީ ސުޖާއު މިއަދު ވިދާޅުވެއްޖެ އެވެ.

ފުލުހުންގެ މީޑިއާ ޓީމު މެދުވެރިކޮށް މީޑިއާތަކަށް ފޮނުއްވި މެސެޖެއްގައި ޝުޖާއު ވިދާޅުވީ، އަލިފާނުގެ ހާދިސާއާ ގުޅިގެން ކުރެވޭ ތަހުގީގުގައި އިންޑިއާގެ ތަޖުރިބާކާރުންގެ ހާއްސަ ޓީމެއް މިހާރު ދަނީ ދިވެހި ފުލުހުންނާއެކު ހަރަކާތްތެރިވަމުން ކަމަށެވެ. އިތުރު ތަފުސީލެއް ނުދެއްވަ އެވެ.

އިންޑިއާގެ ޓީމު މިއަދު އައި އިރު އަލިފާން ރޯވި ދެ އިމާރާތާއި އެ ސަރަހައްދުގެ ބޮޑު ބަޔެއް މިހާރު ވަނީ ސާފުކޮށްފަ އެވެ. ތަހުގީގު ނުނިމެނީސް ތަން ސާފުކުރަން ފެށުމުން ގިނަ ބަޔަކު ސަރުކާރަށް ފާޑުކިޔާފައި ވެސް ވެ އެވެ.

މި މަހު 12، ގެ ހެދުނު އެންމެ ފުރަތަމަ އަލިފާން ރޯވި ކަމަށް ފުލުހުން ބުނީ އެންވަޔަރަމަންޓު މިނިސްޓްރީ ހިންގާ ގްރީން ބިލްޑިންގުގަ އެވެ. ނަމަވެސް އާންމުން ހިއްސާކޮށްފައިވާ ވީޑިއޯތަކުން އެނގޭ ގޮތުގައި ފުރަތަމަ އަލިފާން ރޯވީ އަނެއް ދެ މިނިސްޓްރީ ހިންގާ ޓިނު ބިލްޑިންގަ އެވެ.

މި ތަހުގީގަށް އަލިފާން ރޯވި ސަބަބު އަދި ނުހޯދޭ ކަމަށާއި، އެކަން ދެނެގަތުމަށް ތަހުގީގު ކުރަމުންދާ ކަމަށް ފުލުހުން އިއްޔެ ބުންޏެވެ. ފުލުހުންގެ މީޑިއާ އޮފިޝަލް މީގެ ކުރިން "އަދަދު" އަށް ވިދާޅުވީ އަލިފާނުގެ ހާދިސާއާ ގުޅިގެން އެ ތަންތަނުގެ ފޮރެންސިކް ތަހުލީލުތައް ކުރަމުންދާ ކަމަށެވެ.

އަލިފާނުގެ ހާދިސާގައި އެއްވެސް މީހަކަށް ގެއްލުން ނުވެ އެވެ. ނަމަވެސް ކްލައުޑުގައި ރައްކާކޮށްފައި ހުރި މައުލޫމާތު ފިޔަވައި، ތިން މިނިސްޓްރީ އާއި އީޕީއޭގައި ހުރި ހުރިހާ މައުލޫމާތެއް ކަހަލަ ގޮތަކަށް ވަނީ އަޅިޔަށް ވެފަ އެވެ.

އެ މިނިސްޓްރީތަކުގެ މަސައްކަތް މިހާރު ވަނީ ވަގުތީގޮތުން ދަރުބާރުގެއަށް ބަދަލުކޮށްފަ އެވެ.